தமிழர்கள் மீது உண்மையான அக்கறை இருந்தால் கூட்டமைப்பு அரசுடன் பேசவேண்டும்

இலங்கையில் மழைபெய்ய கூட்டமைப்பினர் அமெரிக்காவிலும் ஆபிரிக்காவிலும் குடைபிடிப்பது தவறு. தமிழ் மக்கள் குறித்து உண்மையான அக்கறை இருந்தால் தமிழ் தேசிய கூட்டமைப்பு அரசாங்கத்துடன் பேச வேண்டும். இதற்காக நாங்கள் மீண்டும் அழைப்பு விடுக்கின்றோம். தவறும் பட்சத்தில் இருக்கும் தமிழ் கட்சிகளுடன் அரசாங்கம் பேசி தீர்வை வழங்கும் என்று பாரம்பரிய கைத்தொழில் மற்றும் சிறு தொழில் முயற்சி அபிவிருத்தி அமைச்சர் டக்ளஸ் தேவானந்தா பாராளுமன்றத்தில் தெரிவித்தார். மக்களின் உரிமைக்காக குரல் கொடுப்பதாக கூறிக்கொண்டு ஜனநாயகத்திற்கு எதிராக செயற்படுவதை ஒரு போதும் ஏற்றுக்கொள்ள முடியாது என்றும் அவர் மேலும் தெரிவித்தார்.

எதிர்கட்சிகளின் சத்தியாக்கிரகத்தை சிலர் குழப்ப முயன்றது தொடர்பாக தமிழ் தேசிய கூட்டமைப்பு முன்வைத்த ஒத்திவைப்பு பிரேரணைக்கு பதிலளித்து உரையாற்றிய அமைச்சர் டக்ளஸ் தேவா னந்தா மேலும் குறிப்பிடுகையில் :-

தமிழ் கூட்டமைப்பின் செயற்பாடுகள் தமிழ் மக்களுக்கு இருப்பதையும் இழக்க வைக்கச் செய்வதற்கு துணைபோகிறது. தமிழ் தேசிய கூட்டமைப்பு போராட்டம் நடத்தி எதுவும் நடைபெறப் போவதில்லை. கோழி கூவி பொழுது விடிவதில்லை என்பது தான் உண்மை.

மீள் குடியமர்த்தப்பட வேண்டும் என்று கோரும் மக்களின் போராட்டத்தை நாங்கள் மதிக்கின்றோம். ஆனால் கறையான் புத்துக்குள் கருநாகம் உள்ளது போன்று அதனை த. தே. கூட்டமைப்பு அரசியல் மயப்படுத்தியது.

இந்த நாட்டில் இனி அதிஉயர் பாதுகாப்பு வலயம் என்று ஒன்று இருக்காது என்று ஜனாதிபதி மஹிந்த ராஜபக்ஷ அவர்கள் அன்று கூறினார்.

இதன் ஓர் அங்கமாக வலிகாமம் வடக்கின் 9 கிராம சேவகர் பிரிவுகளில் முழுமையாக மீள் குடியேற்றமும், 8 கிராம சேவகர் பிரிவுகளில் பகுதியளவிலான மீள் குடியேற்றமும் செய்யப்பட்டுள்ளது. எஞ்சியுள்ள பகுதிகளிலுள்ள மக்களும் வெகுவிரைவில் மீள்குடியமர்த்தப்படுவர். இது தொடர்பில் நாங்கள் ஜனாதிபதி, பாதுகாப்புச் செயலாளர் மற்றும் யாழ் படை அதிகாரிகளுடன் பேசி வருகின்றோம்.

புலிகள் இயக்கம் தமக்கு கிடைக்கப்பெற்ற பல வாய்ப்புக்களை தவறவிட்டது போன்று தமிழ் தேசிய கூட்டமைப்பினரும் தமக்கு கிடைத்த பொன்னான சந்தர்ப்பங்களை தட்டிக் கழித்தும், தவறவிட்டும் வருகிறது.

விரும்பியதை பேசவும் எண்ணியதை எழுதவும் ஜனநாயக சுதந்திரம் தேவை. மக்களின் உரிமைக்காக இழைக்கப்படும் அநீதிக்காக பேசவோ, வாதாடவோ நாங்கள் ஒரு போதும் தயங்க மாட்டோம்.

எனவேதான் பலத்த சவால்களுக்கு மத்தியில் 20 வருடங்களாக மக்கள் எம்மை தெரிவு செய்கின்றனர்.

எதுவாக இருந்தாலும் அதனை அரசாங்கத்துடன் தான் பேசி பெற்றுக்கொள்ள வேண்டும்.

இலங்கையில் மழை பெய்ய அமெரிக்கா ஆபிரிக்காவுக்கு சென்று குடைபிடிப்பது தீர்வாகாது. ரி. என். ஏ. என்ற ஆங்கிலப் பதத்திற்கு அன்று தமிழ் தேசிய இராணுவம், இன்று தமிழ் தேசிய கூட்டணி என்பதாகும்.

உயர் பாதுகாப்பு வலயம் நிரந்தரமானது. அது விடுவிக்கப்பட மாட்டாது என்று தேசிய கூட்டமைப்பு கூறிவந்தது. ஆனால் இன்று படிப்படியாக உயர் பாதுகாப்பு வலயம் விடுவிக்கப்பட்டு வருகின்றது.

கூட்டமைப்பின் ஒருவரது வீடும் விடுவிக்கப்பட்டுள்ளது அதேபோன்று இடம்பெயர்ந்த எமது மக்கள் தமது சொந்த இடங்களில் மீளக் குடியமர்த்தப்பட்டு வருகின்றார்கள்.

அழிவு யுத்தத்தை முடிவுக்குக் கொண்டு வந்த ஜனாதிபதிக்கு நன்றி கூறக் கடமைப்பட்டுள்ளேன். தாம் வளர்த்துவிட்ட பயங்கரவாதத்திற்கு தாமே பலியானது தான் தமிழ் தலைமைகளுக்கு நடந்தது. த. தே. கூட்டமைப்பு இருக்கும் முன்னேற்றகரமான சூழலில் இருந்து தமிழ் மக்களை ஆயுத கலாசாரத்தில் தள்ள முயல்கின்றது.

தமிழ் மக்கள் குறித்து உண்மையான அக்கறை இருந்தால் தமிழ் தேசிய கூட்டமைப்பு அரசாங்கத்துடன் பேச வேண்டும். இன்றேல் இருக்கும் தமிழ் கட்சிகளுடன் அரசாங்கம் பேசும். எதிர்க் கட்சி கூட்டணியின் கூட்டத்தின் மீது தாக்குதல் நடத்தப்பட்டிருந்தாலோ ஏதும் தவறு நடந்திருந்தால் நிச்சயம் தண்டிக்கப்படும் என்றார்.