கண்டி மாவட்ட மலையக மக்களின் பாராளுமன்ற பிரதிநிதித்துவமும் சவால்களும் என்ற தலைப்பிலான கருத்துக் களம் நாளை ஞாயிற்றுக்கிழமை கண்டி இந்து கலாசார மண்டபத்தில் இடம்பெறும். ஜனநாயக மக்கள் முன்னணியின் தலைவர் மனோ கணேசன், கலாநிதி சந்திரபோஸ் ஆகியோர் பங்குபற்றும் இக் கருத்து களத்தில் அமைப்புக்களும் பொது மக்களும் கலந்து கொள்ளுமாறு கண்டியில் இயங்கும் மனித அபிவிருத்தித் தாபனத்தின் தலைவர் பி. பி. சிவப்பிரகாசம் வேண்டுகோள் விடுத்துள்ளார்.

மலையக சிறு அரசியற் கட்சிகளின் ஜனநாயக உரிமை அவர்கள் அரசியலில் போட்டியிடுவது. ஆனால் அது கண்டி மாவட்டத்தில் வசிக்கும் ஒன்றரை இலட்சம் தமிழ் மக்களது பிரதிநிதித்துவத்தை பலவீனப்படுத்துவதாக அமைந்துள்ளது என்றும் சிவப்பிரகாசம் கண்டியில் உள்ள மக்கள் ஒத்துழைப்பிற்கான நிதியக்கட்டத்தில் இடம் பெற்ற ஊடக சந்திப்பின் போதே அவர் இதனைத் தெரிவித்தார்.

கண்டி மாவட்டத்தில் 2012ஆம் ஆண்டு எடுக்கப்பட்ட புள்ளி விபரப்படி தமிழ் மக்கள் 154321 பேர் வசிப்பதாகத் தெரிய வந்துள்ளது. இதில் சுமார் ஒரு இலட்சம் முதல் ஒரு இலட்சத்து பத்தாயிரம் தமிழ் வாக்காளர்கள் வரையில் உள்ளனர். ஆனால் பாராளுமன்றத்தில் கண்டி தமிழ் மக்களின் குரல் ஒலிக்க ஒரு பிரதிநிதி இல்லை. இதனை விட சற்று அதிகமான முஸ்லிம் சகோதர இனத்திற்கு கண்டி மாவட்டத்தில் மட்டும் நான்கு பிரதிநிதிகள் உள்ளனர். இந்த வேறுபாடு கண்டி மாவட்ட தமிழ் மக்களின் சிந்தனையை கிளறவேண்டும் என்பதே எமது நோக்கம். அரச சார்பற்ற ஒரு அமைப்பு அரசியல் பேசலாமா? என சிலர் சிந்திக்கலாம். எமக்கும் அரசியலுக்கும் தொடர்பில்லை. ஆனால் கண்டி மாவட்டத்தின் தமிழ் மக்களது பரிதாபத்தை பற்றிப் பேசுவதற்கு, விவாதிப்பதற்கு, கருத்து வௌியிடுவதற்கு ஒரு மேடை அல்லது களம் அமைத்துக் கொடுக்கப்பட வேண்டும். அதனையே எம்போன்ற அமைப்புக்கள் செய்ய வேண்டிய ஒரு பணியாக உள்ளது.

எனவே 8ஆம் திகதி கண்டி இந்து கலாசார மண்டபத்தில் பொதுக் கருத்துப் பகிர்வு நிகழ்வு ஒன்றை ஏற்பாடு செய்துள்ளோம். கண்டி மாவட்ட மலையக மக்களின் பாராளுமன்ற பிரதிநிதித்துவமும் சவால்களும் என்ற தலைப்பிலாகும். இது பிற்பகல் 2.00 மணி முதல் 4.30 வரை நடைபெற உள்ளது. இதில் ஜனநாயக மக்கள் முன்னணியின் தலைவர் மனோகணேசன், கலாநிதி ஏ.எஸ்.சந்திரபோஸ், சட்டத்தரணி எஸ்.பரஞ்சோதி, பேராதனைப் பல்கலைக்கழக துணை நூலகர் ஆர்.மகேஸ்வரன், உட்பட பொதுமக்கள் பிரதிநிதிகள் பங்கு பற்றி கருத்துரை வழங்க உள்ளனர். இது அவசரமும் அவசியமுமான ஒன்றாகும். தற்போதைய அரசு நடைமுறைப்படுத்திவரும் நூறுநாள் வேலைத்திட்டத்தில் 23 தினங்கள் கழிந்து விட்டன. அதன்பின் பாராளுமன்றம் கலைக்கப்படலாம். அது ஏப்ரல் 23ஆம் திகதிக்குப் பின் எப்பொழுதும் அது நடக்கலாம் என்பதை ஜனாதிபதியும் பிரதமரும் மீள வலியுறுத்தி வருகின்றனர்.

அத்துடன் பாராளுமன்றத்தில் நடக்கும் விவாதங்களைப் பார்க்கும் போது அது கட்டுக்கடங்காது போனால் மேலே குறிப்பிட்ட திகதி வரையில் தாக்குப் பிடிக்க வைப்பது ஒரு பாரிய சவாலாக இருக்கப் போகிறது. அதாவது பாராளுமன்றத் தேர்தலுக்கு கட்டியம் கூறுவதை யாரும் மறுக்க முடியாது. இதையே கடந்த வரவு–செலவுத்திட்டமும் கட்டியம் கூறியது. எனவே, அரசு ஒரு பொதுத்தேர்தலுக்குத் தயார் என்பதை மீண்டும் மீண்டும் வலியுறுத்தி வருகிறது. ஆனால் கண்டி மாவட்ட தமிழ் மக்கள் தயாரா? என்றால் கடந்த கால வரலாறுகள்தான் நினைவிற்கு வருகிறது.

இந்நிலையில் கண்டி மாவட்ட தமிழ் பிரதிநிதித்துவம் பற்றிய ஒரு சிந்தனையை தமிழ் பல் ஊடகங்கள் நினைவு படுத்தி வருகின்றன. இவ்வாறு எம்மை சிந்திக்க வைத்துள்ள தமிழ் அச்சு, இலத்திரனியல் ஊடகங்களுக்கு நாம் நன்றி கூறக் கடமைப்பட்டுள்ளோம். ஆனால் அதனை நடைமுறைப் படுத்த ஒரு கருத்து மேடை தேவை. அதனையே நாம் செய்கின்றோம்.
அது மட்டுமல்ல கண்டி மாவட்டத்தில், வெறுமனே தோட்டத் தொழிலாளர்களை மட்டும் வைத்து அரசியல் செய்ய முடியாது. ஏனெனில் தோட்டப் பகுதியில் ஒருகாலத்தில் 99 முதல் 100 சதவீதம் தோட்ட மக்களே இருந்தனர்.

இன்று நிலைமை மாறி 40 சதவீதமானவர்கள் அல்லது அதிலும் குறைந்தவர்கள்தான் தோட்டத் தொழிலாளர்களாக உள்ளனர். இதனை வேறு விதம் கூறுவதாயின் 60 சதவீதத்திற்கும் மேற்பட்டவர்கள் வெவ்வேறு துறைகளில் உள்ளனர். தொழிலாளி என்ற எல்லையைக் கடந்து அவர்கள் மத்திய தர வர்க்கமாக உருவாகி வருகின்றனர். ஆசிரியர்கள், இலிகிதர்கள், அரச சேவையாளர்கள், சிறிய அளவிலான வர்த்தகர்கள், மற்றும் பெருந் தோட்டங்களுக்கு வெளியே வந்து தொழில் புரிபவர்கள் போன்றோரே தற்போது தோட்டங்களைவிட்டு வெளியேறி விட்டனர். அவர்களும் படிப்படியாக நகர மயமாக்கலில் உள்வாங்கப்பட்டு வருகின்றனர். நகரப் பகுதிகளை அண்டி வாழும் தமிழ் வர்த்தகப் பிரமுகர்களும் தாம் தோட்டப் பரம்பரை அல்லது இந்திய வம்சாவளி என்று தம்மை அடையாளப்படுத்தினாலும் அவர்களை தொழிலாளி என யாரும் கணிப்பதில்லை. அப்படி கணிக்கவும் முடியாது. ஏனைய மக்களும் இவர்களை தோட்டத் தொழிலாளிகள் என்று அடையாளமிடுவதும் இல்லை.

எனவே, பழைய சம்பிரதாயப்படி தோட்டங்களை மட்டும் இலக்காகக கொண்டு அரசியல் செய்ய முற்பட்டால் அது தோல்வியில் முடியலாம். தோட்டத் தொழிலாளர்களை மட்டும் இலக்கு வைத்து கண்டி மாவட்டத்தில் அரசியல் மேற்கொள்ளவது அல்லது முன் நகர்வுகள் எடுப்பது தமிழ் பிரதி நிதித்துவத்திற்கு பயன் அளிக்காது. இதனை கடந்த ஜனாதிபதித் தேர்தல் நன்கு வெளிப்படுத்தி உள்ளதைக் காண முடிகிறது. கை, யானை, நாற்காலி, வெற்றிலை சின்னங்கள் என்ற சம்பிரதாயங்கள் மாறி மலையக மக்களும் அன்னப் பட்சிக்கும் வாக்களித்த நிலையை அறிய முடிகிறது. எனவே பழைய அரசியலை விட்டு மக்கள் சிந்திக்கத் துவங்கி விட்டனர். இதனை சாதகமாக்கி எமது பிரதிநிதித்துவத்தை தக்கவைக்க வேண்டும் என்றார்.
(நன்றி  வீரகேசரி)

அமைதி சமாதானம் ஜனநாயகம்

www.sooddram.com