தேர்தல் திருத்த சட்ட மூலம் எந்தவொரு சமூகத்திற்கும் அநீதி ஏற்படாத வகையில் அமைய வேண்டும் - நீதி அமைச்சர் ரவூப் ஹக்கீம்

தேர்தல் திருத்த சட்ட மூலம் எந்தவொரு சமூகத்திற்கும் கட்சிக்கும் அநீதி ஏற்படாத வகையில் அமைய வேண்டும் என்பதே சகலரதும் எதிர்பார்ப்பாகுமென நீதியமைச்சர் ரவூப் ஹக்கீம் பாராளுமன்றத்தில் தெரிவித்தார். எப்போதும் இரண்டுங்கொட்டான் நிலையிலிருந்து செயற்படும் ஐக்கிய தேசியக் கட்சி இது விடயத்தில் முழங்காலுக்கும் மொட்டைத்தலைக்கும் முடிச்சுப் போட்டு சந்தர்ப்பவாத அரசியல் செய்ய முனைகிறது எனவும் அமைச்சர் தெரிவித்தார்.

பாராளுமன்றத்தில் நேற்று உள்ளூராட்சி சபைகள் தேர்தல் திருத்தச் சட்டமூலம் மீதான விவாதத்தில் உரையாற்றிய அமைச்சர் தமதுரையில் மேலும் தெரிவிக்கையில், அரச தரப்பில் புதிதாக இணைந்து கொண்ட கட்சி என்ற வகையில் ஸ்ரீல.மு. காங்கிரஸ¤க்கு இந்த சட்டமூலத்தின் பின் விளைவுகள் சம்பந்தமாக ஆழமாக ஆராய வேண்டியுள்ளது. தேர்தலை ஒத்திவைப்பதென்பது அவ்வளவு சிறந்ததல்ல. உள்ளூராட்சி சபை தேர்தல் உரிய காலத்தில் நடத்தப்பட்டு உறுப்பினர்கள் தேர்ந்தெடுக்கப்பட வேண்டும். இந்தப் புதிய திருத்தச் சட்ட மூலம் நடைமுறைக்கு வர காலம் எடுக்கும் என்பதால் காலம் தாழ்த் தாது உள்ளூராட்சித் தேர்தல் நடத் தப்பட வேண்டும்.

எல்லை மீள் நிர்ணயக்குழு எல்லைகளை வரையறை செய்து பிரதேசங்களுக்கேற்ப வட்டாரத்திற்கேற்ப தேவைப்படின் இரட்டை வட்டார சபையை ஏற்படுத்தவும் நடவடிக்கை எடுக்கும். கடந்த கால எல்லை மீள் நிர்ணயக்குழுவில் இன ரீதியான பிரதிநிதித்துவம் இடம்பெறவில்லை என்பதால் தேசிய எல்லை நிர்ணய குழுவுக்கு இன ரீதியான பிரதிநிதிகளை நியமிக்க நடவடிக்கை எடுக்கப்பட்டுள்ளது. அதற்காக ஜனாதிபதி அவர்களுக்கு நன்றி தெரிவிக்கின்றோம்.

எல்லை மீள் நிர்ணயக் குழுவின் செற்பாடுகளுக்கு மேலும் ஆறு மாதங்களாவது தேவைப்படுகிறது. ஏப்ரலுக்கிடையில் தேர்தல் நடத்த வேண்டிய தேவையும் உள்ளது. இந்தநிலையில் தேர்தல் திருத்த சட்ட மூலத்தை இன்று நிறைவேற்ற வேண்டும் என்று ஐக்கிய தேசியக் கட்சி கூறுவது விந்தையாக உள்ளது.

இது முழு நாட்டுக்கும் தேவையான சட்டமூலம், எந்த சமூகத்திற்கும் அநீதி ஏற்படாத வகையில் இந்த சட்ட மூலம் அமைய வேண்டும். அதற்கான சாதக பாதகங்களில் அழுத்தம் கொடுப்பது எமது பொறுப்பாகும்.

இப்போதிருக்கும் தேர்தல் முறையில் வெல்ல முடியாது என நினைக்கும் ஐக்கிய தேசியக் கட்சி அவசரமாக இந்த திருத்த சட்ட மூலத்தை நிறைவேற்ற நினைக்கிறது. அக்கட்சி தமது சந்தர்ப்பவாத அரசியலுக்கு இவ்விவாதத்தைப் பயன்படுத்துகிறது எனவும் அமைச்சர் மேலும் தெரிவித்தார்.

கரு ஜயசூரிய: (ஐ.தே.க. எம்.பி)

கடந்த ஒன்பது வருட காலம் தேர்தல் முறை மாற்றம் தொடர்பாக நாம் கலந்துரையாடியுள்ளோம்.

நாட்டு மக்கள் தமது பிரதிநிதிகளை எந்தவித சிக்கலுமின்றி தேர்ந்தெடுக்கும் வகையிலேயே தேர்தல் திருத்தச் சட்டமூலம் ஏற்படுத்தப்பட்டது.

விருப்பு வாக்கு முறை மாற்றம் தொடர்ச்சியாக மக்களால் எதிர்ப்பார்க்கப்பட்ட ஒன்றாகும். புதிய அரசியல் கலாசாரம் ஒன்றை மக்கள் எதிர்பார்த்துள்ளார்கள். அதனால் தாமதியாது இந்த தேர்தல்கள் திருத்த சட்டமூலம் நிறைவேற்றப்பட்டு நடைமுறைப்படுத்தப்பட வேண்டும். தேர்தல் ஆணைக்குழு தொடர்பிலும் நாம் பெரும் எதிர்பார்ப்புடன் உள்ளோம்.

ஆர். யோகராஜன்: (ஐ.தே.க. எம்.பி)

மலையகப் பகுதிகளில் எல்லை மீள் நிர்ணயத்தின் போது முக்கிய கவனம் செலுத்தப்பட வேண்டும். பல பிரதேசங்களில் மக்கள் சனத்தொகை அதிகரித்து காணப்படுகிறது.

அம்பேகமுவ பிரதேச சபைப் பகுதியில் 3 இலட்சத்துக்கு மேற்பட்டவர்கள் வாழ்கின்றனர். இங்கு எல்லை மீள் நிர்ணயம் முக்கியத்துவம் பெறுகிறது.

பெருந்தோட்டப்புற மக்களின் வீடுகள் காணிகள் பிரதேச சபைகளின் அதிகாரத்தின் கீழ் கொண்டு வரப்படவேண்டும். அப்போதுதான் தோட்ட நிர்வாகங்களின் பிடியிலிருந்து அவர்கள் மீள முடியும்.

அதேவேளை, தோட்டப்புற மக்க ளுக்கு அரசாங்கத்தின் நம்மைகள் கிடைக்க வேண்டுமானால் அதன் நிர்வாகம் பிரதேச சபைக்குக் கீழ் வருவது அவசியம்.