பயம், அழுத்தம் காரணமாகவே புலிகளுடன் அப்பாவி மக்கள் இணைந்து செயற்பட்டனர்

இந்த அதியுயர் சபையில் சமுகமளிக்க இன்று எனக்குக் கிடைத்துள்ள இந்த வாய்ப்பை எனக்குக் கிடைத்த ஓர் பேறாகவே கருதுகிறேன். எனக்கு இந்த அரிய பதவியை அளித்தமைக்காக முதலில் நான் எல்லாம்வல்ல அல்லாஹ்வுக்கு நன்றி செலுத்துகிறேன்.

இரண்டாவதாக சாதி, இன, மத பேதம் எதுவுமின்றி தமிழர், சிங்களவர், முஸ்லிம்கள் என்ற பாகுபாடின்றி எனக்கு வாக்களித்து இப்பதவிக்கு தெரிவுசெய்யப்பட்ட காரணமாக எனது கட்சியின் பட்டியலில் இரண்டாவதான தெரிவுக்கு உயர்த்திய வன்னி வாக்காளப் பெருமக்கள் அனைவருக்கும் எனது உளப்பூர்வமான நன்றிகளைத் தெரிவித்துக் கொள்கிறேன் என வன்னி மாவட்டப் பாராளுமன்ற உறுப்பினராகப் பதவியேற்றுள்ள எம்.பி. பாரூக் தனது கன்னியுரையில் தெரிவித்தார்.

இருந்தபோதிலும் இப்பதவியையிட்டு நான் அதிகளவு மகிழ்ச்சிகொள்ள முடியாதவனாக இருக்கிறேன். ஏனெனில், 02.12.2010 அன்று காலை மனதைத் தாக்கி உலுக்கிய அந்தத் துயரச் செய்தியிலிருந்து நான் இன்றும் விடுபடாத நிலையில் இதயத்தில் பாரத்தைச் சுமந்தவனாகவே நின்றுகொண்டிருக்கிறேன்.

எங்களால் அதிகம் நேசிக்கப்பட்டவராகிய வன்னி மாவட்ட பாராளுமன்ற உறுப்பினர் மர்ஹும் நூர்தீன் மசூர் ஹாஜியார் அவர்களின் மரணமானது எங்கள் இதயங்களில் இன்னும் சுமையாகவே அழுத்திக் கொண்டிருக்கிறது.

அவருடைய உருவில் அவருடைய நிழலாக இன்று இச்சபையில் நுழைந்திருக்கும் நான் அவர் பற்றிய சில நல்லுரைகளையும், அவரது சேவைகளுக்கான பாராட்டுக்களையும் இங்கு எடுத்துரைப்பதை எனது பாரிய கடமையாகக் கருதுகிறேன்.

என்னைப் பொறுத்தவரையில் அவர் ஒரு உறுதியும், ஆக்கபூர்வமான கொள்கைகளையும் கொண்டிருந்த ஓர் தீவிர இலட்சியவாதி என்றே கருதுகிறேன். 2001இல் அவர் ஐ. தே. க. அரசாங்கத்தின் ஓர் அமைச்சராக, மன்னார் கக்சேரியில் நடந்த ஓர் கூட்டத்தில் அவர் ஆற்றிய ஓர் உரையினை நினைவு கூருகின்றேன்.

அவர் கூறினார், ‘தனது இளமைப் பருவ கனவு இந்த மன்னார் பாலத்தையும், தாம்பூதியையும் திருத்தியமைப்பது அல்லது மீளக்கட்டியமைப்பது என்றும், எவ்வகையிலேனும் இவ்வேலையைப் பூர்த்தி செய்வேன் என்பதே அது.

அப்போது அது செய்து முடிக்கப்பட முடியாத ஓர் விடயமாகவே எனக்குத் தோன்றியது. ஏனெனில், அப்படியான ஒரு பெரும் செலவிலான பாரிய திட்டம், இந்த ஒதுக்குப் புறமானதும், போரினால் சிதைந்து போயிருப்பதுமான ஓர் மாவட்டத்தில் சாத்தியமானதா? என்பதே எனது கருத்தாக இருந்தது.

இருந்தபோதிலும் அவரால், உருவாக்கப்பட்ட அந்த சிந்தனைக் கரு செயலாக மாற்றப்பட்டு, இன்று இதை இரண்டு கிலோ மீட்டர் நீளமான அந்தப் பாதையில் நாம் சந்தோசமானதும், வசதியானதுமான பிரயாணத்தை அனுபவிக்கின்றோம்.

அவரது எச்சங்கள் இன்று அமைதிக்குள் புதைக்கப்பட்டு விட்ட போதிலும், இன்று இந்த சபையில் பிரசன்னமாயிருக்கும் நாஙகள் யாராவது அந்தப் பாதை வழியாக பிரயாணிக்கின்ற போது அவரை நினைவுகூருவோம்.

வன்னிப் பிரதேசம் விவசாயமும், மீன் பிடியும் நிறைந்த ஓர் வளமான மாவட்டமாகும். இப்போது சில பாரிய அபிவிருத்தி நடவடிக்கைகள் மேற்கொள்ளப்பட்டு வருவதற்காக அரசாங்கத்துக்கு எனது நன்றியைத் தெரிவித்துக்கொள்கிறேன். இருந்தும் இன்னும் அதிகமாகப் பல செய்யப்பட வேண்டியுள்ளன. எனவே, காலநேரம் வரும்போது பல புதிய திட்டங்களையும், ஆலோசனைகளையும், முன் வைப்பேன் என்று மக்களுக்கு இச்சபையின் மூலம் வாக்குறுதியளிக்கின்றேன்.

கடந்த காலங்களில் மக்கள் மன்னார் மாவட்டத்தின் பல பகுதிகளிலிருந்தும் பற்பல தேவைகளுக்காகவும் உதவிகளுக்காகவும் அலைந்து திரிந்ததைப் பார்த்திருக்கிறேன். அதுபோலவே மன்னாருடன் இணைப்பு மாவட்டங்களான வவுனியா மற்றும் முல்லைத்தீவு பகுதிகளிலிருந்தும் இடம்பெயர்ந்து வந்த மக்களும் அதே பரிதாப நிலையில் அலைந்ததைக் கண்டுள்ளேன். எனவே, நான் மன்னாரில் நிரந்தரமாகத் தங்கியிருந்து மக்களின் தேவைகளில் துணையாயிருப்பேன். உதவுவேன் என்று வாக்களிக்கின்றேன். எனது சேவை தாமதமின்றி கிடைக்கும் என்பதனையும் இச்சபையில் நான் உறுதியளிக்கிறேன்.

தற்சமயம் நடைமுறையிலிருக்கும் காணி ஆட்சியுரிமைச் சட்டம் சில பிரிவுகளிலும் ஆரம்ப நீதிமன்ற நடைமுறைகள் சிலவும் என்னை மிகவும் கலவரப்படுத்தும் விடயங்களாகும்.

கடந்த 31.12.2010 வரை சட்ட உதவி ஆணைக் குழுவின் மன்னார் கிளையின் சட்ட அலுவலராகப் பணியாற்றியுள்ளேன். இக்காலத்தில் ஏழைகள், பிற்படுத்தப்பட்ட மக்கள், இடம்பெயர்ந்த மக்கள் சம்பந்தமாக உதவிகள் பற்றிய பயிற்சிகளைப் பெற்றுள்ளேன்.

இதன்போது நான் பெற்ற அனுபவத்தின்படி காணி ஆட்சி உரிமைச் சட்டத்தின் 10 வருட விதியும், ஆரம்ப நீதிமன்றங்களின் 2 மாத விதியும் சுயநலத்துடன் செயற்படும் புத்திசாலித்தனமான சட்டவிரோத ஊடுருவல்காரர்களால் மேலும் சுயநலவாதிகளால் யுத்தத்தால் பாதிக்கப்பட்ட வடக்கில் உள்ள நூற்றுக் கணக்கான இடம்பெயர்ந்தவர்களை காணியிழக்கச் செய்வதாகக் காண்கிறேன்.

இந்நிலை ஓர் அவசரமான மாற்று நிவாரணக் கோரிக்கை ஒன்றை முன்வைத்து நிற்கிறது. எனது கருத்து என்னவென்றால், குறைந்தபட்சம் தற்காலிக அடிப்படையிலாவது வடக்கில் இச்சட்டங்களிலிருந்து மாற்றங்களை செய்ய வேண்டிய அவசியமுள்ளது.

இதுபற்றி மேலும் நான் விபரிக்க விரும்பவில்லை. ஆனால் சம்பந்தப்பட்ட அமைச்சர்களை என் கோரிக்கைக்கு செவிமடுக்குமாறு வேண்டுகிறேன்.

மேலும் இடம்பெயர்ந்தவர்கள் தம்மை வாக்காளர் இடாப்புகளில் பதிவு செய்வதற்காக விதிக்கப்பட்டுள்ள காலக்கெடு பற்றி அரசாங்கத்தின் கவனத்தை கோருவதற்கு இச்சந்தர்ப்பத்தைப் பயன்படுத்த விரும்புகின்றேன்.

எனது வன்னி மாவட்டத்திலிருந்து இடம்பெயர்ந்துள்ள மக்களைப் பொறுத்தவரையில் சில கட்டுப்பாடுகளைக் கொண்டுள்ளது என்பது வெளிப்படை யாகத் தெரிந்த விடயமாகும். இது எம்மக்களைப் பொறுத்தவரையில் பாரதூரமான விளைவுகளை ஏற்படுத்தும். எனவே இதனை மீள பரிசீலனை செய்து காலக்கெடுவை நீடிக்குமாறு அரசாங்கத்தை வேண்டுகிறேன்.

பயங்கரவாதத்தின் இடுக்குப் பிடியிலிருந்து இன்று மக்கள் மீட்கப்பட்டு விடுதலை அடைந்துள்ளார்கள். ஜனாதிபதியின் இந்தத் துணிகர நடவடிக்கைக்காக எனது நன்றியைத் தெரிவித்துக் கொள் கிறேன்.

ஓர் அடிப்படை உண்மை என்னவென்றால், இளைஞர்களும், யுவதிகளும் ஏன் வயதானவர்கள் கூட பயங்கரவாதத்தில் முழுமையாக ஈடுபட்டவர்கள் அல்ல என்பதுடன், அவர்கள் பயம் அல்லது அழுத்தம் காரணமாக உதவியாளர்களாக செயற்பட்டவர்கள் என்பதாகும்.

ஆகவே, இன்று எனது அனைத்து உண்மைத் தன்மையோடும் அரசுக்கும் விண்ணப்பிப்பது என்னவென்றால், இவர்கள் அனைவருக்கும் பொது மன்னிப்பு வழங்கி மூன்று தசாப்த காலமாக எமது அன்புக்குரிய நாட்டைப் பாதித்து வந்த துயரமான கதைகளுக்கு முடிவு கட்டவேண்டும் என்பதுமாகும். அதன் மூலம் நாம் அனைவரும் ஒன்றிணைந்து கரம் கோர்த்து எம் இலங்கை மாதாவுக்கு மரியாதை வணக்கம் செலுத்த முடியும்.

அப்படி நிகழ்ந்தால் மட்டும் எமது நாட்டை அமைதியும், இயல்பு நிலையும் ஆட்சி செய்ய முடியும் என்பதோடு, எமது மக்களுக்கும், சமாதான வாய்ப்பை உறுதி செய்ய முடியும்.

எனக்குத் தெரிந்த மதக் கோட்பாடு ஒன்று கூறுகிறது. ‘சமாதானம் செய்ப வர்கள் பாக்கியவான்கள்’ ஏனெனில், அவர்கள் கடவுளின் மக்கள் எனப் படுவார்கள். இந்த விழுமியம் அரசாங் கத்தின் சொத்தாக வேண்டும் என்று வாழ்த்துகிறேன். இன்னொரு மதக் கோட்பாடு கூறுகிறது, ‘அன்பு அன்பைப் பெற்றுக் கொள்கிறது. பகைமை பகைமையைப் பெற்றுக்கொள்கிறது’

இந்தப் புனிதமான கோட்பாடுகளின் கருத்துக்கள் பிசகாமல் கடைப் பிடிக்கப்படுமானால், எந்த ஒரு அரசும் தன் பிரஜைகள் மீது சமாதானத்தையும், பசுமை வளத்தையும் பொழிந்ததாக மிளிரும்.

அத்துடன் நான் அரசின் சகல முன்னேற்றகரமான சமூக நலச் சேவைகளுக்கும், கொள்கைகளுக்கும் எப்போதும் ஒத்துழைப்பை எவ்வித தடையுமின்றி நல்குவேன் என உறுதியளித்துக் கொள்கிறேன்.