எல்லையில் பதற்றம்!

பதிலடிக்கு தயாராகிறது இந்தியர் பாகிஸ்தான் படைகளும் உஷார்!

• எதையும் சந்திக்க தயார் என பாதுகாப்பு அமைச்சர் அந்தோனி எச்சரிக்கை

• 10 பாகிஸ்தான் வீரர்களின் தலைகளையாவது வெட்ட வேண்டும் என்கிறார் சுஷ்மா.

• எதிர்க்கட்சிகளுடன் பிரதமர் மன்மோகன் சிங் பேச்சு

பாகிஸ்தான் இராணுவத்தினரால் கொல்லப்பட்ட இந்திய வீரரின் தலை இன்னும் கிடைக்காததால் எல்லையில் பதற்றம் அதிகரித்துவருகிறது. இதனையடுத்து எல்லையில் இரு நாட்டு படைகளும் குவிக்கப்படுவதால் போர் மூளும் அபாயம் ஏற்பட்டுள்ளது. இந்நிலையில் பாகிஸ்தானுக்கு தக்க பாடம் புகட்டுமாறு பேசிய மக்களவை எதிர்க் கட்சி தலைவர் சுஷ்மா சுவராஜ், மாநிலங்களவை எதிர்க் கட்சித் தலைவர் அருண் ஜெட்லி ஆகியோருடன் பிரதமர் மன்மோகன் சிங் நேற்று முன்தினம் அவசர ஆலோசனை நடத்தினார்.

இந்தியா மற்றும் பாகிஸ்தான் இராணுவத்துக்கு இடையே பரஸ்பரம் எல்லையில் போர் நிறுத்த ஒப்பந்தம் அமுலில் உள்ளது. இந்த ஒப்பந்தத்தை பாகிஸ்தான் அடிக்கடி மீறி வருகிறது. கடந்த ஓராண்டில் மட்டும் 120 முறை இந்திய இராணுவ முகாம்கள் மீது பாகிஸ்தான் இராணுவத்தினர் துப்பாக்கிச் சூடு நடத்தியுள்ளனர்.

இந்த சந்தர்ப்பத்தில் தீவிரவாதிகள் இந்திய பகுதிக்குள் ஊடுருவும் முயற்சியும் நடந்தது. இந்நிலையல் காஷ்மீர் எல்லையில் கடும் பனிப்பொழிவை பயன்படுத்திக் கொண்டு கடந்த 8 ஆம் திகதி இந்தியாவின் பூஞ்ச் பகுதிக்குள் அத்துமீறி பாகிஸ்தான் இராணுவத்தினர் நுழைந்தனர். அங்கு பணியில் இருந்த சுதாகர் சிங், ஹேம்ராஜ் சிங் ஆகிய 2 வீரர்களை கொடூரமாக கொலை செய்தனர்.

அத்துடன் ஹேம்ராஜ் என்ற வீரரின் தலையையும் வெட்டியுள்ளனர். இது இந்திய இராணுவத்தினர் மத்தியில் கடும் கொந்தளிப்பை ஏற்படுத்தி உள்ளது. பாகிஸ்தானுக்கு தக்க பதிலடி கொடுக்க வேண்டும் என்று இராணுவத்தினர் வலியுறுத்தி வருகின்றனர்.

இதற்கிடையில் ஹேம்ராஜ் தலை கிடைக்கும் வரை ஓய மாட்டோம் என்று கூறி அவருடைய குடும்பத்தினர் உண்ணாவிரதம் இருந்தனர்.

அவர்களை பல்வேறு தலைவர்கள் சந்தித்து ஆறுதல் கூறி சமாதானம் செய்தனர். இதையடுத்து அவர்கள் உண்ணாவிரதத்தை வாபஸ் பெற்றனர். பாகிஸ்தான் இராணுவத்தினரின் அத்துமீறிய செயலை மன்னிக்க முடியாது ஏற்க முடியாது. அதற்கு எந்த நேரத்தில் எந்த இடத்தில் தக்க பதிலடி கொடுக்க வேண்டும் என்பது இந்தியாவுக்கு தெரியும் என்று இராணுவ தலைமை தளபதி பிக்ரம் சிங் ஆவேசமாக கூறியுள்ளார். பாதுகாப்பு அமைச்சர் ஏ. கே. அந்தோணியும், எதையும் சந்திக்க தயார் என்று பாகிஸ்தானை எச்சரித்துள்ளார்.

பரபரப்பான சூழ்நிலையில் முக்கிய எதிர்க் கட்சியான பா. ஜ. வும் பாகிஸ்தானுக்கு தக்க பாடம் புகட்ட வேண்டும் என கருத்து தெரிவித்துள்ளது. பாகிஸ்தான் வீரர்கள் எடுத்துச்சென்ற இந்திய வீரர் ஒருவரின் தலையை திரும்ப கொண்டுவந்து தராவிட்டால் குறைந்தபட்சம் 10 பாகிஸ்தான் வீரர்களின் தலையை கொண்டு வர வேண்டும் என மக்களவை எதிர்க் கட்சித் தலைவர் சுஷ்மா சுவராஜ் ஆவேசமாக பேசியுள்ளார். எல்லை நிலவரம் குறித்து பிரதமர் மன்மோகன் சிங் மெளனமாக இருப்பது ஏன்? என மாநிலங்களவை எதிர்க் கட்சித் தலைவர் அருண் ஜெட்லி கேள்வி எழுப்பினார்.

இதையடுத்து எல்லை பிரச்சினை குறித்து பிரதமர் மன்மோகன் சிங் நேற்று முன்தினம் மாலை சுஷ்மா சுவராஜ் மற்றும் அருண் ஜெட்லியுடன் அவசர ஆலோசனை நடத்தினார்.