நிறைவேற்று அதிகார முறையை ஜே.ஆர் இல்லாமல் செய்திருக்க வேண்டும் - சி.வி

நிறைவேற்று அதிகாரமுறையை ஜே.ஆர்.ஜெயவர்த்தன உருவாக்கிய போது, அதனை அவரது ஆட்சிக்காலம் முடிவடைய இரத்துச் செய்து நாடாளுமன்ற அதிகாரத்தை நிலைக்க வழி செய்யுமாறு சிரேஷ்ட அரசியல்வாதியும் சட்டத்தரணியுமான கொல்வின்.ஆர்.டி.சில்வா, ஜே.ஆர் ஐ கேட்டிருந்தும் அதனை அவர் நடைமுறைப்படுத்தவில்லை என வடமாகாண முதலமைச்சர் சி.வி.விக்னேஸ்வரன் தெரிவித்தார்.

வட மாகாண சபையின் அமைச்சர்கள், உறுப்பினர்கள், அலுவலர்கள் ஆகியோரின் வருட இறுதி கருத்துப் பரிமாற்றக் கூட்டம் 'வடமாகாண சபையின் குறுங்கால, இடைக்கால சவால்கள்' எனும் தொனிப்பொருளில் யாழ் நூலக கருத்தரங்க மண்டபத்தில் புதன்கிழமை (31) இடம்பெற்ற நிகழ்விலே முதலமைச்சர் இவ்வாறு கூறினார்.

அவர் தொடர்ந்து கூறுகையில்,

1956ஆம் ஆண்டில் தனிச்சிங்களச் சட்டம் கொண்டு வந்த போது 'இரு மொழிகள், ஒரு நாடு; ஒரு மொழி இரு நாடுகள் என்று கூறிய கலாநிதி கொல்வின்.ஆர்.டி சில்வா, நிறைவேற்று அதிகாரங்கொண்ட ஜனாதிபதி என்ற பதவியை ஜே.ஆர்.ஜெயவர்த்தன உருவாக்கியபோது, உன் காலத்தில் இந்தச் சட்டத்தை வேண்டுமானால் நீ நடைமுறைப்படுத்து. ஆனால் நீ போகும் போது இந்த சட்டத்தை இரத்துச் செய்து நாடாளுமன்ற அதிகாரம் நிலைக்க வழிவகுத்து விட்டு செல். உனக்கு பின்வரும் ஒருவன் உன்னை போல் அந்தச் சட்டத்தை நடைமுறைப்படுத்தமாட்டான். கொடூரமாக அவன் இதனை நடைமுறைப்படுத்தக்கூடும் என்று கூறினார்.

அதாவது அதிகாரம் என்பது ஒருவர் வசம் இருந்து அந்த அதிகாரத்தைப் பாவிக்கும் போது சட்டதிட்டங்களுக்கு அமைவாக, மனிதஉரிமைகளைப் பேணிப்பாதுகாக்கும் விதத்தில், மனிதாபிமான முறையில் பாவிக்கத் தலைப்பட்டால், சட்டம் எவ்வாறு அமைந்திருந்த போதும் அங்கு நல்லாட்சியும் நீதியும் நிலைக்கலாம்.

ஆனால் தான்தோன்றித்தனமாக, ஒருதலைப்பட்சமாக சிந்திக்கும் வண்ணம் நடைமுறைப்படுத்த எத்தனித்தால் அங்கு வல்லாட்சி நிலைக்கும். அதனால்தான் சட்டம் எமது உரித்துக்களை இன்னொருவரின் தன்னிச்சைக்கு ஆட்படுத்தி அமைந்திருப்பதை நாம் எதிர்க்கின்றோம்.

அண்டிவாழ நாம் ஆசைப்படாதிருப்பது இந்தக் காரணத்தினால் தான். வடமாகாண ஆளுநர் ஜி.ஏ.சந்திரசிறியை அண்டிச்சென்று, ஜனாதிபதி மஹிந்த ராஜபக்ஷவை நாடிச்சென்று, அவரது சகோதரர்களுக்கு பல்லிளித்துப்பல நன்மைகளை நாம் பெற்றுக்கொள்ளலாம் என்பது உண்மைதான்.

ஆனால் அப்பேர்ப்பட்ட அடிமைத்தனத்தால் நாம் பெறும் நன்மைகள் நிரந்தரமானவை அல்ல. பல் இளிக்கும் வரை தான் பலன் கிடைக்கும். நாடும் வரையில் தான் நன்மை கிட்டும் என்றென்றும் அண்டி வாழ்ந்தால் தான் அதிக நன்மை அடையலாம்.

வடக்கு, கிழக்கு மாகாண மக்களின் உயிர்த்தியாகம், உடல் ஊனம் அடைந்தமை, காணிகளைப் பறிகொடுத்தமை, பெண்கள் தம் வாழ்வை இழந்தவை, எமது இளைஞர்கள் இன்றும் சிறைக் கம்பிகளை எண்ணிக் கொண்டு நிற்பது எல்லாம் அதற்காக இல்லை.ஆகவே உண்மையான அதிகாரப்பகிர்வை எதிர்பார்த்தே எமது மக்கள் நிற்கின்றனர். நாங்கள் சலுகை அரசியலுக்கு சரிந்துவிடாமல் சட்டவாக்க நிவர்த்தியை நாடி நிற்கின்றோம்.

மேற்கு மாகாண ஆளுநர்கள் பலர் என் நண்பர்களாக இருந்தவர்கள். பிரதம நீதியரசர் சர்வானந்தா, நீதியரசர் விக்னராஜா, தற்போதைய ஆளுநர் அலவி மௌலானா, எல்லோருமே மேல் மாகாண அன்றாட நிர்வாக விடயங்களில் தலையிடாது தமது கடமையை செய்துவந்தனர். வருபவர்கள். இங்கும் கிழக்கிலும் மட்டும் படைப்பிரிவில் பதவி வகித்தவர்களை பாவித்து மத்திக்கு சார்பான நடவடிக்கைகளை நடைமுறைப்படுத்தி வருகின்றது தற்போதைய அரசாங்கம்.

பொது மக்கள் வாழ்க்கையில் இராணுவம் உள்நுழைவதை உடனே நிறுத்த வேண்டும். மக்கள் சுதந்திரத்துடனும் பயப்பீதி இல்லாமலும் தமது மண்ணில் நடமாட இடமளிக்க வேண்டும். போர் முடிந்தும் போர் வீரர்கள் தொடர்ந்து இங்கிருப்பது, எப்பொழுதேனும் வன்செயல்களில் அவர்களோ மற்றவர்களோ ஈடுபடக்கூடும் என்பதை எடுத்துக் காட்டும்.

பொலிஸார் இங்கு பெருமளவில் கொண்டுவரப்பட்டு இராணுவத்தினர் படிப்படியாக குறைக்கப்பட்டாலும் பொலிஸார் இடையே தமிழ் பேசும் பொலிஸ் அதிகாரிகள், அலுவலர்கள் இருப்பது மிக அவசியமாகும். அவ்வாறு இருந்தால் தான் அவர்கள் மக்கள் மனமறிந்து, தேவைகள் அறிந்து செயற்பட முடியும்.

மக்களின் காணிகளை மக்களுக்கே இராணுவம் மீளக் கையளிக்காது இருப்பது ஒரு மிகப்பெரிய சவாலாக இருக்கின்றது. ஒவ்வொரு குடிமகனும் தன் சொந்தக் காணியில் போய் திரும்பவும் குடியிருக்க வழி அமைத்துக் கொடுக்க வேண்டும்.

எமது காணிகளை அரசாங்கமும், அரசியல்வாதிகளும், இராணுவமும் கையேற்பதை அடியோடு நிறுத்த வேண்டும். மில்ரோய் பெர்ணாண்டோ என்ற ஒரு தெற்கத்தைய அரசியல் வாதி வவுனியாவில் ஒரு குறிப்பிட்ட இடத்தில் குடியிருக்கும் மக்களை வெளியேற்றிக் காணியைத் தனக்குத் தருமாறு நிர்ப்பந்தித்துக் கொண்டு வருகின்றார் என்று கேள்விப்படுகின்றேன் என முதலமைச்சர் மேலும் தெரிவித்தார்.

அமைதி சமாதானம் ஜனநாயகம்

www.sooddram.com