தெல்லிப்பழை யூனியன் கல்லூரி மாணவர்கள் நேற்று புதன்கிழமை நடத்திய போராட்டத்தை முடக்க கூட்டமைப்பு முற்பட்டதாக குற்றச்சாட்டுக்கள் எழுந்திருக்கின்றது. வழமை போன்றே பாடசாலை முடிவடைந்த பின்னர் கவனயீர்ப்பு ஆர்ப்பாட்டம் ஒன்றில் ஈடுபட்டிருந்த நிலையிலேயே அவர்கள் மிரட்டப்பட்டுள்ளனர். இந்த ஆர்ப்பாட்டத்தை நிறுத்துமாறு உடனடியாகவே வடக்கு மாகாணக் கல்வி அமைச்சு உத்தரவிட்டதாகவும் அந்த உத்தரவை மீறியும் மாணவர்கள் தமது நியாயமான கோரிக்கையை வலியுறுத்தி ஆர்ப்பாட்டம் நடத்தியதாகவும் தெரியவருகின்றது.

யூனியன் கல்லூரி, மகாஜனக் கல்லூரி ஆகியவற்றின் மாணவர்கள் இந்தப் போராட்டத்தை நடத்த முடிவெடுத்த போதிலும் வடக்கு மாகாணக் கல்வி அமைச்சு இவ்வாறான போராட்டத்தை நடத்தவேண்டாம் என்று உத்தரவிட்டதாகவும் இந்த உத்தரவுக்கமைய மகாஜனக் கல்லூரி மாணவர்கள் போராட்டம் நடத்தவில்லையென்றும் குறித்த பாடசாலைகளின் உள்ளகத் தகவல்கள் தெரிவிக்கின்றன.

தண்ணீரில் எண்ணெய் கலந்துள்ளமை தொடர்பில் யாழ்ப்பாணத்திலிருந்த நாடாளுமன்ற உறுப்பினர்கள், மாகாண சபையினர் போன்ற எவரும் காத்திரமான நடவடிக்கை எடுக்காத நிலையிலேயே மாணவர்களும் மக்களும் கவனயீர்ப்பு போராட்டங்களை நடத்தினர்.

இந்த நிலையில் போராட்டம் நடத்திய மாணவர்களிடம் இன்று காலை விசாரணைகள் இடம்பெற்றதாகவும் அதிபர் ஆசிரியர்கள் அச்சுறுத்தப்பட்டதாகவும் தெரியவருகின்றது.

ஆனால், இந்தப் போராட்டத்திற்கும் தமக்கும் எந்த தொடர்பும் இல்லையென்றும் பாடசாலை முடிந்து மாணவர்கள் வெளியே சென்ற சமயம் அவர்களின் கையில் யாரோ சுலோகங்களைக் கொடுத்து இந்தப் போராட்டத்தை நடத்தினர் என்றும் பாடசாலை அதிபர் ஊடகவியலாளர்களிடம் தெரிவித்திருக்கின்றார்.

தங்களை யாரும் அச்சுறுத்தவில்லையென்றும் அவர் கூறியிருக்கின்றார்.
தங்கள் பாடசாலைக் கிணற்றில் கழிவு எண்ணெய்க் கசிவு படர்ந்துள்ளதால் அதற்கு உரிய நடவடிக்கை எடுக்குமாறு கோரியே மாணவர்கள் ஆர்ப்பாட்டத்தில் ஈடுபட்டிருக்கின்றனர்.

இவர்களின் போராட்டத்திலுள்ள நியாயப்பாட்டை எவரும் மறுக்க முடியாது. உணவின்றி வாழ முடிந்தாலும் நீரின்றி வாழ முடியாது என்பதை எவராலும் மறுத்துரைக்க முடியாது.

தமக்கு சுத்தமான குடிதண்ணீரை வலியுறுத்தி வலி.வடக்கு மக்கள் கடந்த வாரம் ஆர்ப்பாட்டத்தில் ஈடுபட்டதன் பின்னணியில், மக்களின் தண்ணீர் நெருக்கடிக்கு தீர்வு காணுமாறு மருத்துவர்கள் உண்ணாவிரதம் இருந்து வரும் பின்னணியில் தெல்லிப்பழை யூனியன் கல்லூரி மாணவர்களின் இந்தப் போராட்டம் இடம்பெற்றுள்ளது. மாணவர்கள் தமது இடத்தை விட்டு வேறெங்கோ சென்று ஆர்ப்பாட்டம் நடத்தவில்லை.

கல்வி நடவடிக்கைகளைப் புறந்தள்ளி போராட்டத்தில் ஈடுபடவில்லை. பாடசாலை முடிவடைந்த பின்னர் தங்கள் பாடசாலைக்கு முன்பாக நின்று அமைதியான முறையில் ஒரு கவனயீர்ப்பு போராட்டத்தை நடத்தினர். இதில் என்ன தவறிருக்க முடியுமென்று கல்வியியலாளர்கள் கேள்வி எழுப்பியுள்ளனர்.

ஆனால், இந்தப் போராட்டத்தில் ஈடுபட்ட மாணவர்களை அச்சுறுத்துவது, அவர்களை வழிநடத்தும் அதிபர், ஆசிரியர்களிடம் விசாரணை நடத்துவதென்பது ஏற்றுக்கொள்ள முடியாதது.வடக்கு மாகாணக் கல்வி அமைச்சு இந்த மாணவர்களையும் அதிபர், ஆசிரியர்களையும் அச்சுறுத்திய செயற்பாட்டில் ஈடுபட்டிருந்தால், ஈடுபடுமாக இருந்தால் அது சர்வாதிகாரத்தின் வெளிப்பாடாகவே அமையும்.

நியாயமான முறையில் தமது கருத்தை வெளிப்படுத்திய மாணவர்கள் மீது வடக்கு மாகாணக் கல்வி அமைச்சு நடவடிக்கை எடுக்க முனைவது உண்மையாக இருந்தால் அது வன்மையாகக் கண்டிக்கப்படவேண்டிய விடயமாகுமெனவும் கல்வியாளர்கள் தெரிவித்துள்ளனர்.

முன்னதாக கூட்டமைப்பு சார்பு அமைச்சர் ஜங்கரநேசன் மற்றும் உறுப்பினர்கள் குழு நேரினில் சென்று கழிவு ஓயில் கலக்கவில்லையென வாதிட்டிருந்தமை குறிப்பிடத்தக்கது.

அமைதி சமாதானம் ஜனநாயகம்

www.sooddram.com