வடக்கு மக்களின் பிரச்சினைகளுக்கு சிறந்த தீர்வை பெற்றுக்கொடுங்கள்

வடபகுதி அரச ஊழியர்கள் மத்தியில் ஜனாதிபதி

வடபகுதியில் இன்று குறிப்பிடத்தக்க அபிவிருத்தி ஏற்பட்டுள்ளது. அரசியலை ஒரு பக்கம் வைத்துவிட்டு மக்களின் கண்ணீரை துடைக்க நீங்கள் அனைவரும் ஒன்றிணைய வேண்டிய காலம் வந்துவிட்டது. நாம் அனைவரும் மக்களுக்காக சேவையாற்ற வேண்டும் என்று ஜனாதிபதி மஹிந்த ராஜபக்ஷ கூறினார். கிளிநொச்சியில் நேற்று (14) அரசாங்க ஊழியர்கள் மத்தியில் உரையாற்றும் போதே ஜனாதிபதி இவ்வாறு கூறினார்.

தொடர்ந்து அங்கு உரையாற்றிய ஜனாதிபதி மேலும் கூறியதாவது : 30 வருட காலம் இடம்பெற்ற பயங்கரவாதத்தினால் பாதிக்கப்பட்ட மக்களின் வாழ்க்கையை நாம் கட்டியெழுப்ப வேண்டும். அன்று பயங்கரவாதிகள் எமது பிள்ளைகளை கொன்றனர். கர்ப்பிணித் தாய்மாரை, பால் கொடுக்கும் தாய்மாரை கொன்றனர். இவற்றை நாம் அறிவோம். அவ்வாறான துயரத்தை சந்தித்த மக்களின் வாழ்க்கையை கட்டியெழுப்புவது எமது இப்போதைய கடமை. மக்களுக்காக செயலாற்ற, மக்களுக்கிடையே சென்று அவர்களது பிரச்சினைகளை இனங்கண்டு அவர்களுக்கு சேவையாற்ற நாம் தயாராக வேண்டும்.

இப்பிரதேசத்தில் ஏற்பட்டுள்ள அபிவிருத்தி தெளிவாக தெரிகிறது. உலகில் எங்குமே இடம்பெறாத வகையில் இங்கு மக்களை மீள் குடியமர்த்தும் நடவடிக்கைகளை நாம் மேற்கொண்டோம். அவர்களுக்கு தேவையான பாதுகாப்பையும் வழங்கினோம். ஒவ்வொருவருக்கும் வெவ்வேறு அரசியல் கொள்கைகள் இருக்கலாம். எனினும் உங்களது இன்றைய பொறுப்பு அரசியலை மறந்து மக்களுக்கு சேவை செய்வதாகும். அபிவிருத்திக்காக அர்ப்பணிப்பு செய்வதாகும்.

அடுத்து ஜனாதிபதி தமிழில் உரையாற்றுகிறார். இன்று ஒரு வரலாற்று பூர்வமான நாளாகும். நாட்டின் தலைவர் ஒருவர் கிளிநொச்சியில் அரசாங்க அதிகாரிகளிடையே உரையாற்றுவது இது முதல் முறை என நான் நினைக்கிறேன். வட மாகாணம் முழுவதும் வாழ்வதற்கு மிகவும் உகந்த சூழலுடன் கூடிய இடமாக மாற்றப்பட்டுள்ள நிலையில் உங்களிடையே உரையாற்ற முடிந்ததையிட்டு நான் மிகவும் மகிழ்ச்சியடைகிறேன். நீங்கள் அனைவரும் பொறுப்புமிக்க அரசாங்க ஊழியர்கள். உங்கள் சேவை நாட்டு மக்களுக்கு மிகவும் அத்தியாவசியமானது. அந்தக் காலத்தில் எமது தமிழ் நண்பர்கள் பலர் அரச சேவையில் இருந்தனர். அதனை கெளரவமான சேவை என்று மக்கள் கருதினர். அவர்களில் சிலர் முக்கியமான உயர் பதவிகளை வகித்தனர். அதனை எவரும் மறுக்கமுடியாது.

வடபகுதி மக்களுக்கு சேவையாற்றக் கூடிய நல்லவொரு சூழல் மீண்டும் ஏற்பட்டுள்ளது. அப்பாவி மக்கள் உங்களை தேடி வரும் போது அவர்களுக்கு கருணை காட்டுங்கள். அவர்களுக்கு முடிந்தவரை சிறப்பான தீர்வை பெற்றுக் கொடுக்க வேண்டும். அவர்கள் திருப்தியுடன் திரும்பிச் செல்ல வேண்டும் என்பதே முக்கியமாகும். மக்கள் சேவை என்பது கடவுளுக்கு செய்யும் சேவைக்கு ஒப்பானது. இதை எப்போதும் மறக்க வேண்டாம். 30 வருட காலத்தில் வட பகுதி அப்பாவி மக்களுக்கு முழுமையாக கிடைக்காத வசதிகளை விரைவில் பெற்றுத் தருவது உங்கள் பொறுப்பாகும்.

வடபகுதி மக்கள் பல்வேறு பிரச்சினைகளை கொண்டவர்கள் அதனை மனதில் வைத்துக்கொண்டு நீங்கள் அவர்களுடன் பேச வேண்டும்.  அபிவிருத்திக்கென நாம் பாரிய நிதியை ஒதுக்கியுள்ளோம். அதன் மூலம் உயரிய பயனை மக்களுக்கு பெற்றுத்தர வேண்டும். பெற்றோர் தமது பிள்ளைகளை பார்த்துக்கொள்வதைப் போல் நீங்கள் மக்கள் பாதுகாக்கப்படும் வகையில் சேவையாற்ற வேண்டும். அரச சேவை வெறுமனே பெயரளவில் இருக்கக் கூடாது. அது மக்களுக்கான சேவையாக இருக்க வேண்டும்.

காலனித்துவ நாட்களைப் போலன்றி இப்போது நாம் அனைவரும் சமமானவர்கள். எமக்கிடையே வர்க்கப் பாகுபாடு இல்லை. உங்களுக்கு இலவச கல்வியை பெறும் வாய்ப்பு இருந்துள்ளது. எனவே அதில் ஒரு பகுதியை நீங்கள் தாய்நாட்டுககு திருப்பிச் செலுத்த வேண்டிய காலம் வந்துள்ளது.