எதிர் கட்சியினர் சமர்பிப்பு _

ஒற்றையாட்சிக்குள் மாகாணசபைகளுக்கு அதிகாரம்

ஒற்றையாட்சிக்குள் மாகாண சபைகளுக்கு அதிகாரங்கள் பகிரப்பட வேண்டும். தொகுதிவாரி முறைமையையும் விகிதாசாரப் பிரதிநிதித்துவ முறைமையையும் கொண்ட கலப்பு தேர்தல் முறை ஏற்படுத்தப்பட வேண்டும். மத்திய, மாகாண, உள்ளூராட்சி மட்டங்களில் அதிகாரங்கள் பகிரப்பட வேண்டியது அவசியம் என்று சர்வகட்சிக் குழுவின் இறுதி அறிக்கையில் தெரிவிக்கப்பட்டுள்ளது.

இதனை விட மாகாணசபை உறுப்பினர்களைக் கொண்ட செனட்சபை, இந்திய வம்சாவளி மக்களுக்கு சமூக சபை ஏற்படுத்துதல் மற்றும் தேசிய, மாகாண உயர்பதவி நியமன சபை அமைக்கப்படுதல் போன்ற யோசனைகளும் இந்த அறிக்கையில் உள்ளடக்கப்பட்டுள்ளது. சர்வகட்சிக் குழுவின் அறிக்கை இன்று எதிர்க்கட்சியினரால் பாராளுமன்றத்தில் சமர்ப்பிக்கப்படவுள்ளது.

ஐக்கிய தேசியக் கட்சி எம்.பி. ஆர். யோகராஜன் இதனை இன்று சமர்ப்பிக்கவுள்ளார். இதுகுறித்த செய்தியாளர் மாநாடு நேற்று கொழும்பு ரேணுகா ஹோட்டலில் நடைபெற்றது. இந்தச் செய்தியாளர் மாநாட்டில் சர்வகட்சிக் குழுவில் அங்கம் வகித்த உறுப்பினர்களான ஆர். யோகராஜன் எம்.பி., ஸ்ரீலங்கா முஸ்லிம் காங்கிரஸின் பிரதிச் செயலாளர் நிஸாம் காரியப்பர், ஜனநாயக மக்கள் முன்னணியின் செயலாளர் நல்லையா குமரகுருபரன் ஆகியோர் கலந்துகொண்டனர். சர்வகட்சிக் குழுவின் அறிக்கை கடந்தவருடம் ஜனாதிபதி மஹிந்த ராஜபக்ஷவிடம் குழுவின் தலைவரும் அமைச்சருமான திஸ்ஸ விதாரணவினால் கையளிக்கப்பட்டிருந்தது. இதனை வெளியிடுமாறு எதிர்க்கட்சிகள் கோரியிருந்தபோதிலும் இதுவரை அந்த அறிக்கை வெளியிடப்படவில்லை. இந்த நிலையிலேயே இந்த இறுதி அறிக்கையினை பாராளுமன்றத்தில் இன்று சமர்ப்பிக்க உள்ளதாக ஐக்கிய தேசியக் கட்சியின் பாராளுமனற் உறுப்பினர் ஆர். யோகராஜன் அறிவித்துள்ளார்.

நேற்று நடைபெற்ற செய்தியாளர் மாநாட்டில் கருத்துத் தெரிவித்த யோகராஜன் எம்.பி., ஜனாதிபதி சர்வக்கட்சி மாநாட்டை நடத்தி சர்வகட்சி ஆலோசனைக் குழுவும் நிறுவப்பட்டது. அந்த மாநாட்டிற்கு தமிழ் தேசியக்கூட்டமைப்பு தவிர ஏனைய சகல கட்சிகளுக்கும் அழைப்பு விடுக்கப்பட்டிருந்தது.

சர்வக்கட்சி ஆலோசனை குழுவில் மக்கள் விடுதலை முன்னணி மற்றும் பிரதான எதிர்க்கட்சியான ஐக்கிய தேசியக்கட்சி அங்கம் வகித்தபோதிலும் ஆலோசனை குழுவிலிருந்து இடைநடுவிலேயே விலகிக்கொண்டன.

சர்வக்கட்சி ஆலோசனை குழுவிற்கு ஆலோசனைகளை வழங்குவதற்காக ஜனாதிபதியினால் இரண்டு நிபுணர்கள் குழுவும் நியமிக்கப்பட்டது அந்த குழுவின் ஆலோசனைகளும் பெற்றுக்கொள்ளப்பட்டே இந்த இறுதியறிக்கை தயாரிக்கப்பட்டுள்ளது. ஆலோசனை குழுவில் பங்கேற்ற சகல கட்சிகளினதும் ஆலோசனைகளும் இதில் உள்ளடக்கப்பட்டுள்ளன.

ஆலோசனை குழுவில் அரசாங்கத்தில் அங்கம் வகிக்கும் கட்சிகளில் 12 கட்சிகளும் எதிர்க்கட்சி தரப்பில் இரண்டு கட்சிகளின் பிரதிநிதிகளும் பங்கேற்றனர் . இந்த குழு 128 தடவைகள் கூடியதுடன் பாராளுமன்ற ஹன்சாட் அறிக்கையாளர்களினால் ஒவ்வொரு கூட்டமும் அறிக்கையிடப்பட்டுள்ளது.

இறுதியறிக்கை ஜனாதிபதியிடம் கையளிக்கப்பட்டபோது அவர் அதனை பகிரங்கப்படுத்துவார் என்று நினைத்திருந்தோம். ஆனால் பகிரங்கப்படுத்தவில்லை ஆலோசனை குழுவில் அங்கம் வகிக்கும் உறுப்பினர்களுக்கு கூட வழங்கப்படவில்லை. யுத்தம் முன்னெடுக்கப்பட்டபோது அரசியல் தீர்வு தொடர்பில் பேசப்பட்டது. ஜனாதிபதி வெளிநாடுகளுக்கு விஜயம் செய்யும் போது அரசியல் தீர்வு தொடர்பிலும் சர்வக்கட்சி ஆலோசனை குழுத்தொடர்பில் பெரிதாக பிரஸ்தாபிப்பார். அதேபோல வெளிநாட்டு பிரதிநிதிகள் இலங்கைக்கு விஜயம் செய்யும் போது சர்வக்கட்சி ஆலோசனை குழுவின் தலைவர் பேராசிரியர் திஸ்ஸ விதாரண சர்வக்கட்சி ஆலோசனை குழுதொடர்பில் கருத்துரைப்பார்.

13 மாதங்களாகியும் அறிக்கை வெளியிடப்படவில்லை

2009 ஜூன் 30 ஆம் திகதி சர்வக்கட்சி ஆலோசனை குழுவின் இறுதி அறிக்கை தயாரிக்கப்பட்டது. யுத்தம் நிறைவடைந்து 14 மாதங்கள் கடந்து விட்டநிலையில் ஜனாதிபதியிடம் இறுதியறிக்கை கையளிக்கப்பட்டு 13 மாதங்கள் கடந்துவிட்டது இன்னுமே அறிக்கை வெளியிடப்படவில்லை. ஆலோசனை குழுவில் அங்கம் வகிக்கின்ற கட்சி பிரதிநிதிகளுக்கேனும் வழங்கப்படவில்லை.

ஊடகவியலாளரின் கேள்விக்கு பதில்

இந்த ஊகவியலாளர் மாநாட்டில் கலந்து கொண்ட ஊடகவியலாளர்கள் எழுப்பிய கேள்விகளுக்கு இருவரும் பதிலளிக்கையில், சர்வக்கட்சி ஆலோசனை குழுவின் இறுதி அறிக்கையை அடிப்படையாக கொண்டு அரசியலமைப்பில் திருத்தங்களை மேற்கொள்வது சாதாரணமானது என்றும் இதன் மூலமாக தேசிய இனப்பிரச்சினைக்கு தீர்வு கண்டு நிரந்தர சமாதானத்தை ஏற்படுத்த முடியும்.

இறுதி அறிக்கை உத்தியோகபூர்வமாக வெளியிடப்படாத நிலையில் அந்த அறிக்கையின் சாரம்சம் உத்தியோகபற்றற்ற ரீதியில் ஐக்கிய தேசியக்கட்சிக்கு கிடைத்துள்ளது. அதன் பிரகாரம் அக்கட்சி சர்வக்கட்சி ஆலோசனை குழுவின் யோசனைகளுக்கு இணக்கம் தெரிவித்துள்ளது. இந்த அறிக்கை தொடர்பில் தமிழ் தேசியக்கூட்டமைப்புடன் கலந்துரையாடவேண்டும்.

எதிர்க்கட்சிக்கும் அரசாங்கத்திற்கும் இடையில் பேச்சுவார்த்தை முன்னெடுக்கப்பட்டு கொண்டிருக்கின்ற நிலையில் சர்வக்கட்சி ஆலோசனை குழுவின் இறுதியறிக்கையை வெளியிடுவது சால சிறந்தது என்றே கருத்துகின்றோம். இதனை இதற்கு முன்னரே வெளியிட்டிருக்கலாம். இறுதியறிக்கையை அரசாங்கம் இதுவரையிலும் சமர்ப்பிக்காமை அரசாங்கத்தின் கண்துடைப்பாக இருக்கலாம் ஆனால் தீர்வு திட்டமொன்றை முன்வைக்கவேண்டும் என்று நாம் எதிர்பார்த்திருந்தோம்.

வடக்கு மக்கள் அரசியல் தீர்வையல்லை சீமெந்து மூடைகளையும் அபிவிருத்தியையுமே எதிர்பார்க்கின்றனர் என்று கூறுவதில் அர்த்தமில்லை அவையாவும் தேவையாகும். ஆனால் இனப்பிரச்சினைக்கு நிரந்தர தீர்வு காணப்படவேண்டும். ஜனாதிபதி அறிக்கையை வெளியிடால் விடுவதற்கு அரசாங்கத்திலிருக்கின்ற பௌத்தவாத கட்சிகளின் செயற்பாடுகளுக்கு அவர் அச்சம் கொண்டிருக்கின்றமை காரணமாக இருக்கலாம்.

பாராளுமன்றத்தில் இன்று சமர்ப்பிக்கவிருக்கின்ற இறுதி அறிக்கையின் முக்கியமான அம்சங்கள் வருமாறு ;

அரசின் தன்மை:

இலங்கைக் குடியரசானது ஒற்றையாட்சி அரசாகும் என்பதால் உணரப்படுவது யாதெனில் எங்கே அரச அதிகாரமானது மாகாணங்களுக்கிடையே பகிரப்பட்டிருக்க அரச கட்டமைப்பானது பிரிபடாததும் ஒன்றிணைக்கப்பட்டதுமான கட்டமைப்பாக கருதப்படல் வேண்டும்.

அரசாங்கத்தின் வடிவம்/முறைமை

இலங்கை, மத்திய மட்டத்தில் பாராளுமன்ற முறைமை கொண்ட அரசாங்கத்தைக் கொண்டிருக்கும்.

புத்த மதத்தின் அந்தஸ்து

இலங்கை குடியரசு புத்த மதத்திற்கு அதி உன்னதமான இடத்தை வழங்கல் வேண்டும். அத்தோடு அதன் பிரகாரம் அரசாங்கத்தின் கடப்பாடானது 1978 ஆம் ஆண்டு அரசியலமைப்பின் உறுப்புரை 10, 14 (1) (உ) ஆல் அனைத்து மத உரிமைகளும் உறுதிப்படுத்தப்பட்ட பிரகாரம் புத்த சாசனத்தை பாதுகாத்தலோடு பேணிப் போற்றலும் வேண்டும்.

அரச கரும மொழியும் தேசிய மொழியும்

தேசிய மொழியான தமிழும் சிங்களமும் இலங்கையின் அரசகரும மொழியாகவும் இருக்கும்.

ஆங்கில மொழியின் பிரயோகம்:

ஆங்கிலமானது உத்தியோகபூர்வ நோக்கங்களுக்காக பயன்படுத்தப்படலாம்.

அரசியலமைப்பின் மீயுயர் தன்மை/ இறையாண்மை:

அரசியலமைப்பின் இறையாண்மையானது தற்போது காணப்படுகின்ற நீதிமன்ற கட்டமைப்புக்குட்பட்டதும் ஆனால், உயர் நீதிமன்றத்திலிருந்து வேறானதுமான ஓர் அரசியலமைப்பு நீதிமன்றத்தினால் பாதுகாக்கப்படுவதுடன் அங்கீகரிக்கவும் படல் வேண்டும். அரசியலமைப்போடு முரண்படுகின்ற செயல் மற்றும் செய்யாமை தொடர்பான மத்திய மற்றும் மாகாணங்களின் அனைத்துச் செயற்பாடுகளும் வெறிதானதாகும்.

(மத) பேதமைகளுக்கு/ பிரிவினைகளுக்கு எதிரான பாதுகாப்பு:

அரசினது ஒற்றுமை, இறைமை மற்றும் ஒருமைப்பாட்டை பாதுகாப்பதற்கும் (மத) பேதமை/ பிரிவினைப் பாங்கான போக்கை நலிவடையச் செய்வதற்குமான ஆழமான பொறிமுறைகளை கொண்டிருக்க வேண்டும். மாகாணங்கள் மற்றும் உள்ளூர் அதிகார சபைகள் குடியரசினுடைய தேசிய ஒற்றுமையையும் பிரிபடாத்தன்மையையும் பாதுகாப்பதற்கு சட்ட ரீதியாக கட்டளைப்படுத்தப்பட்டிருத்தல் வேண்டும்.

தேர்தல் முறைமை:

அனைத்துக் கட்சிகளின் பிரதிநிதிகள் குழுவானது விகிதாசாரப் பிரதிநிதித்துவ முறைமை காணப்படத்தக்கதாக, தேர்தல் தொகுதி அடிப்படையிலான தொகுதிவாரி முறைமையையும் கட்சி அடிப்படையிலான விகிதாசாரப் பிரதிநிதித்துவ முறைமையையும் கொண்டதான இரண்டு வாக்குச் சீட்டுகளுடனான ஒரு கலப்புத் தேர்தல் முறைமையை ஏற்றுக் கொள்கிறது.

அதிகாரப் பகிர்வு:

மக்களின் அதிகாரமானது அரசாங்கத்தின் மூன்று மட்டங்களிடையே பகிரப்பட்டிருக்கும். குறிப்பாக மத்திய அரசாங்கம், மாகாண மற்றும் உள்ளூர் அரசாங்கங்களிடம் ஒவ்வொரு மட்டமும் வேறான அதிகாரப் பட்டியல்களை அரசியலமைப்பின் ஊடாக கொண்டிருக்கும்.

ஆட்சிப் பேரவை (செனட்):

தேசிய சட்டவாக்கத்தில் பொறுப்பு வகிக்கக் கூடியதான மாகாணங்களைக் கொண்டு ஆட்சிப் பேரவை ஒன்று அமைக்கப்படும். மாகாணங்களிடையே எதிரிடையான விளைவுகளைக் கொண்ட கவனயீனப் போக்கான சட்டங்களுக்கு எதிரான ஆழமான ஒரு பொறி முறையாக இது தொழிற்படும். இது முன்மொழிவது யாதெனில், ஒவ்வொரு மாகாணமும் 63 மொத்த உறுப்பினர்கள் அமைவான, அந்தந்த மாகாண சட்டவாக்கத்தின் உறுப்பினர்களால் ஒற்றை மாற்று வாக்கு முறைமையின் அடிப்படையில் தேர்ந்தெடுக்கப்பட்ட ஏழு பேரவையாளர்களால் பிரதிநிதித்துவப்படும். புறம்பாக 10 பேரவையாளர்கள் (வடக்கு, கிழக்குக்கு புறம்பாக வதியும் முஸ்லிம்களுக்கு ஏனைய ஒன்று இந்திய வம்சாவளித் தமிழர்களுக்கும்) சமூக சபைகளால் தெரிவு செய்யப்படுவார்கள். குடியரசின் ஜனாதிபதி பிரதிநிதித்துவப்படாத சமூக குழுக்களை பிரதிநிதித்துவப்படுத்த இருவரை நியமிப்பார்.

சமூக சபை :

இரண்டு சமூக சபைகள் காணப்படும், ஒன்று இந்திய வம்சாவளித் தமிழர்களுக்கும், மற்றொன்று வட கிழக்குக்கு புறம்பாக, சமூக அங்கத்தவர்களின் அபிவிருத்தி தேவைகளுக்காக வட கிழக்குக்கு வெளியே அவர்கள் எங்கு வசித்த போதிலும் ஆள்புல நோக்குகைகள் இன்றி செயற்படத்தக்க முஸ்லிம்களுக்குமாக காணப்படும். மத்திய மற்றும் மாகாணங்களுக்கிடையே அதிகாரங்களைப் பகிர்ந்தளித்தல்

அதிகாரப் பகிர்வானது வெளிப்படையானதாகவும் முற்றிலும் கவர்பாடற்றதாகவும் இருத்தல் வேண்டும். ஒருங்கிய நிரல் இல்லாமலாக்கப்படுவதுடன் மேற்சொன்ன அதிகாரமõனது மத்திய நிரல் மற்றும் மாகாண நிரல்களுக்கிடையில் தகுந்த முறையில் பகிர்ந்தளிக்கப்படும். மூன்றாவது நிரலானது உள்ளூர் அதிகார சபைகளின் அதிகாரங்களை வெளிப்படையாகக் கூறும் விதமாக தொகுக்கப்பட்டிருக்கும்.

தேசிய மற்றும் மாகாண உயர் பதவி நியமன சபை:

அரச சேவையினது நீதித் துறையையும் சுதந்திரத்தை உறுதி செய்வதற்கும் தேசிய பதவி நியமன சபை காணப்படும்.இந்த தேசிய சபையானது பிரதமர், சபாநாயகர், பாராளுமன்றத்தின் எதிர்க் கட்சித் தலைவர் மற்றும் ஜனாதிபதியினால் நியமிக்கப்படும் பாராளுமன்றத்தை பிரதிநிதித்துவப்படுத்துகின்ற அனைத்துக் கட்சிகளையும் உள்ளடக்கிய ஆறு உறுப்பினர்களைக் கொண்டதாக இருக்கும். இதில் மூன்று பேர் சிறுபான்மை இனங்களைப் பிரதிநிதித்துவப்படுத்துகின்றவர்களாக குறித்த சமூகத்தை பிரதிநிதித்துவப்படுத்துகின்ற பாராளுமன்ற உறுப்பினர்களின் கலந்தாலோசனையுடன் நியமனம் செய்யப்படுவர்.

ஒரு மாகாண உயர் பதவி நியமன சபையானது முதலமைச்சர், சபைத் தவிசாளர் எதிர்க் கட்சித் தலைவர் மற்றும் அனைத்துக் கட்சிகளையும் பிரதிநிதித்துவப்படுத்துகின்ற சபை உறுப்பினர்களை உள்ளடக்கிய குழுவினால் பிரேரிக்கப்படுகின்ற ஆளுனரால் நியமனம் செய்யப்படுகின்ற வேறுபட்ட ஆறு பேரைக் கொண்டதாக இருக்கும். மாகாண சபை கூட்டமைவானது இயன்ற வரை மாகாணங்களின் இனங்களின் சேர்மத்தை பிரதிபலிப்பதாக இருக்கும்.

சீர்திருத்த நடபடிமுறைகள்:

1978ஆம் ஆண்டு அரசியலமைப்பின் உறுப்புரை 82 (5) மற்றும் 83 ஆகியன நிலைப்படுத்தப்பட்டதாக இருக்கும்.அரசியலமைப்பைத் திருத்துவதற்கான அல்லது வேறு அரசியலமைப்பை கொண்டு பிரதியீடு செய்வதற்கான சட்ட மூலமானது பாராளுமன்றத்தினது இரண்டு சபைகளினதும் 2/3 பெரும்பான்மையான உறுப்பினர்களினது வெவ்வேறான அமர்வு மற்றும் வாக்களிப்பால் அங்கீகரிக்கப்பட்டிருக்க வேண்டும்.