சனல் - 4 விவகாரம்

இலங்கை நிபுணர்குழு புதிய ஆய்வு; பிரிட்டிஷ் தொலைத் தொடர்பு நிறுவனமும் களத்தில்

சனல் -4 போலி வீடியோ ஆவணம் தொடர்பாக பாதுகாப்பு அமைச்சும் நிபுணர்கள் குழுவும் இணைந்து புதிய ஆய்வொன்றினை ஆரம்பித்திருப்பதாக இராணுவப் பேச்சாளர் மேஜர் ஜெனரல் உபய மெதவள நேற்று தெரிவித்தார். பாதுகாப்பு அமைச்சுக்கு கிடைக்கப் பெற்றிருக்கும் மேற்படி சனல்-4 வீடியோ ஆவணம் போலியாக சித்தரிக்கப்பட்டதென்பதற்கு தகுந்த ஆதாரங்கள் கிடைத்துள்ளனவென்றும் அவர் கூறினார். திருத்தங்கள் மேற்கொள்ளப்படாத உண்மையான வீடியோ ஆவணத்தில் தோன்றும் நபர்களின் பேச்சுவார்த்தை தமிழிலேயே உள்ளது. இருப்பினும் அதற்குபதிலாக சிங்கள உரையாடல்களை மேற்படி வீடியோ காட்சிக்கு பதிவு செய்துள்ளனர்.

வீடியோ காட்சியில் எல்.ரி.ரி.ஈ. உறுப்பினர்களே தோன்றுகின்றனர். இவர்கள் இராணுவத்தினரின் சீருடையில் காட்சியளிக்கின்றனர் என்றும் அவர் குறிப்பிட்டார். எல்.ரி.ரி.ஈயினர் தோற்கடிக்கப்பட்டமையை அடுத்து புலிகளுக்கு ஆதரவான குழுவினர் நாட்டுக்கு அபகீர்த்தியை ஏற்படுத்தும் வகையில் சனல்-4 போலி விடியோ ஆவணங்களை தயாரிப்பதன் மூலம் வீணான முயற்சியில் ஈடுபட்டு வருகின்றனர் எனவும் இராணுவப் பேச்சாளர் சுட்டிக்காட்டினார்.

இதேவேளை, இலங்கை ஒலிபரப்புக் கூட்டுத் தாபனத்தில் நேற்று முன்தினம் உரையாற்றிய ஐ.நாவின் இலங்கைக்கான தூதுவரும் பிரதி நிரந்தர வதிவிடப் பிரதிநிதியுமான மேஜர் ஜெனரல் சவேந்திர சில்வா உரையாற்றுகையில், சனல்-4 ஆவணத்தில் வெளியாகும் சிங்கள உரையாடல் ஆவணம் சித்தரிக்கப்பட்டிருக்கும் சூழ்நிலைக்கு சிறிதும் பொருத்தமில்லையெனவும் கூறினார்.

மேற்படி ஆவணத்தில் தனிப்பட்ட நபர்கள் இராணுவ சீருடையில் காணப்படுவதனை சுட்டிக்காட்டிய மேஜர் ஜெனரல் சில்வா, இதற்கு முன்னதாக புலிகள் ஸ்ரீ மகாபோதி வளவிலுள்ள அப்பாவி பக்தர்களை கொலை செய்யும் போதும் கட்டுநாயக்க விமானநிலைய தாக்குதலின் போதும் இராணுவ சீருடையில் தோன்றியிருந்ததை நினைவு கூர்ந்தார்.

மேலும், சனல்-4 ஆவணமானது எல்.ரி.ரி.ஈ. ஆதரவாளர்களினால் சர்வதேச சமூகத்தை திசை திருப்புவதற்காகத் தயாரிக்கப்பட்ட தொன்றாகும் என்றும் அவர் கூறினார்.

இந்த நாட்டை தீவிரவாதிகளிடமிருந்து மீட்டெடுத்த இராணுவ வீரர்களுக்கு அபகீர்த்தியை ஏற்படுத்தும் வகையிலேயே சனல்-4 வீடியோ ஆவணம் வெளிவிடப்பட்டிருப்பதாக பொருளாதார அபிவிருத்தி அமைச்சர் பசில் ராஜபக்ஷ கடந்த வெள்ளிக்கிழமை அழுத்தமாக கூறியிருந்தார். அத்துடன், இலங்கை அதிகாரிகளுக்கு கிடைக்கப்பெற்றிருக்கும் உண்மையான வீடியோ காட்சி மற்றும் அதன் உண்மையான ஒளிபரப்பு ஆகியவற்றுடன் ஒப்பீட்டுப் பார்க்கையில் வெளியாகியிருக்கும் சனல்- 4 வீடியோ ஆவணமானது இயற்கையாகவே மரணிக்கிறதெனவும் அவர் குறிப்பிட்டுள்ளார்.

இதேவேளை இலங்கையின் கொலைக்களங்கள் என்ற தலைப்பில் அண்மையில் பிரிட்டனின் சனல்-4 தொலைக் காட்சியில் ஒளிபரப்பப்பட்ட ஆவணப்படம் தவறான எண்ணத்தை தோற்றுவிப்பதாகவும் உரிய முறையில் பிரதிநிதித்துவப் படுத்தப்படவில்லை என்றும் முறைப்பாடுகள் கிடைக்க பெற்றதையடுத்து பிரிட்டிஷ் அரசாங்கத்தின் தொலைத் தொடர்புக்கான அலுவலகம் அந்த ஆவணப்படத்தின் உண்மைத்தன்மையை பற்றி விசாரிக்கவுள்ளது.

பிரிட்டன் டி.வி. பிக்ஸி என்ற வெப்தளத்தில் அலக்ஸ் கெஸ்ட் என்றவர் பதிவு செய்த அறிக்கையை எடுத்தே மேற்படி அலுவலகம் இந்த விசாரணையை மேற்கொள்கிறது.

கிடைத்த முறைப்பாடுகளைப் பற்றி ஆராய்ந்து குறிப்பிட்ட அமைப்பு (சனல்-4) ஒளிபரப்பிய ஆவணப்படம் பிரிட்டிஷ் ஒளிபரப்புக் கோவைக்கு ஏற்ப உள்ளதா? அது தொடர்பாக மேலதிக விசாரணை அல்லது நடவடிக்கை தேவையா என்பதை (ஜீணீழசீ) அலுவலகம் முடிவு செய்யும்.

ஒளிபரப்பு கோவை மீறப்பட்டதாக கருதப்பட்டால் அந்த ஆவணப்படத்தை ஒளிபரப்பியவருக்கு அபராதம் விதிக்க அந்த அலுவலகத்துக்கு அதிகாரம் உண்டு.

மேற்படி ஆவணப்படத்தில் சனல்-4 மேலதிகமாக சேர்ந்திருந்த பகுதி செம்மைப்படுத்தப்பட்ட வகையில் திரிபு படுத்தப்பட்டிருந்தால் பொதுமக்களுக்கு தவறான எண்ணத்தை தோற்றுவிக்க முயன்றதாக சனல் -4 மீது நடவடிக்கை எடுக்கும் அதிகாரத்தை அந்த அமைப்பு கொண்டிருக்கிறது.

கடந்த 14 ஆம் திகதி சனல்-4 மேற்படி ஆவணப்படத்தை ஒளிபரப்பியதையடுத்து நூற்றுக்கணக்கான முறைப்பாடுகள் கிடைத்திருந்தன.