பாதாள அறைக்குள் தங்கம், வெள்ளி, இரத்தினம், நாணயங்கள், பொக்கிஷங்களைக் கண்டு கனவுலகம் போல உணர்ந்தேன்

"பத்மநாப சுவாமி கோயில் பாதாள அறைகளை பார்வையிட்டு கணக்கெடுக்க சென்ற போது, நான் அங்கு பார்த்த காட்சி நம்ப முடியாத அனுபமாகவும் கனவுலகம் போலவும் இருந்தது", என ஓய்வு பெற்ற நீதிபதி சி.எஸ். ராஜன் தெரிவித்தார்.

கேரள தலைநகர் திருவானந்தபுரத்தில் உலக பிரசித்தி பெற்ற பத்மநாப சுவாமி கோயிலில் இருந்த ஆறு பாதாள அறைகளில், ஐந்து அறைகளை உயர்நீதிமன்றத்தினால் அமைக்கப்பட்ட குழு திறந்து பார்த்து கணக்கெடுப்பு நடத்தியது.

ஆறாவது அறையை திறக்க முடியாமல் போனதால், அவ்வறையை திறப்பது குறித்து நாளை ஆலோசித்து முடிவெடுக்க உள்ளனர். அக்குழுவில் மன்னர் பரம்பரையைச் சேர்ந்தவரும், நீதிபதியுமான சி.எஸ். ராஜன் மற்றும் எம்.என். கிருஷ்ணன் ஆகியோரும் அடங்குவர்.

தான் பார்த்த கட்சிகள் குறித்து நீதிபதி ராஜன் கூறியதாவது, கோவிலுக்குள் பாதாள அறைகளுக்கு செல்லும் கதவை திறந்ததும், பார்ப்போரை பிரமிக்க வைக்கும் மிக பெரிய கருங்கற்கள் கொண்ட பாதை மறைக்கப்பட்டிருந்தது.

அக்கருங்கற்களை மிகவும் பலசாலிகளான எட்டு பேர் கொண்ட குழு மிகவும் பாடுபட்டு அகற்றியது. கீழே அறைகள் மிகவும் சிறியதாக இருந்தன. கீழ்ப்பகுதியில் நான்கைந்து பேர் மட்டுமே நிற்பதற்குரிய இடமே இருந்தது. அவ்வறைகளில் தேக்கினாலான நிறைய பெட்டிகள் ஒன்றன் மீது ஒன்றாக அடுக்கி வைக்கப்பட்டிருந்தன.

அப்பெட்டிகளில் தான் தங்கம், வெள்ளி, இரத்தினம் மற்றும் விலை மதிக்க முடியாத பொருட்கள் பாதுகாப்பாக வைக்கப்பட்டிருந்தன. அவற்றைப் பார்த்ததும் வியப்படைந்தேன். நம்ப முடியாத மாயலோகத்தில் இருப்பதைப் போல உணர்ந்தேன்.

அங்கிருந்த விலை மதிக்க முடியாத பொக்கிஷங்கள் அனைத்தும் காலம் காலமாக திருவிதாங்கூர் மன்னர் பரம்பரையினர் பத்மநாப சுவாமிக்கு காணிக்கையாக அளித்து வந்துள்ளனர். அவற்றில் மன்னர்களது நண்பர்கள், பிற நாட்டு மன்னர்கள் வழங்கிய பொருட்களும் உள்ளன.

ஒவ்வொரு முறையும் மன்னர் கோவிலுக்கு வரும்போதும், ஒரு தங்க நாணயத்தை சுவாமிக்கு காணிக்கையாக வழங்குவது வழக்கம். இவ்வாறு ஒரு இலட்சத்திற்கும் மேற்பட்ட தங்க நாணயங்களை சுவாதி திருநாள் மன்னர் கோவிலுக்கு காணிக்கையாக வழங்கி உள்ளார்.

இவ்வாறு அங்கு தங்க நாணயங்களே மிக பெரிய சேகரிப்பாக காணப்பட்டன. அவற்றில், "சூரத் நாணயம்" என்று பெயர் பொறிக்கப்பட்டுள்ளது. பல சரித்திர நூல்களை ஆய்வு செய்த போது நேபாள மன்னர் குடும்பத்தினர் 100 ஆண்டுகளுக்கு முன் 25 ஆயிரம் சாளக்கிராம கற்களை திருவிதாங்கூர் மன்னருக்கு வழங்கி உள்ளது தெரிந்தது.

அவை நேபாள தலைநகர் காத்மண்டுவில் இருந்து யானைகள் மீதேற்றி இரண்டரை ஆண்டுகள் கடந்துதான் திருவனந்தபுரத்திற்கு வந்து சேர்ந்தன. அவற்றில் 12 ஆயிரத்து 500 கற்களை கொண்டு தான் தற்போது கோவிலில் உள்ள மூலவர் சிலை உருவாக்கப்பட்டது. மீதமுள்ள கற்கள் பாதுகாப்பாக பத்ம தீர்த்தத்தில் மறைத்து வைக்கப்பட்டுள்ளதாகவும் தெரிந்தது.

பாதாள அறைகளில் இருந்து கணக்கெடுக்கப்பட்டவற்றை புதையலாக கருத முடியாது. புதையல் என்பதற்கு அரசின் விளக்கத்திலும் அவைகள் இடம்பெறாது. அவைகள் அனைத்தும் கோவில் சொத்தாகவே கருத முடியும். மேலும், பாதாள அறைகளில் இருப்பவை குறித்து கணக்கெடுக்க மட்டுமே உச்சநீதிமன்றம் குழுவை நியமித்துள்ளது. அவற்றின் மதிப்பு குறித்து கணக்கெடுக்க அல்ல இவ்வாறு ராஜன் கூறினார்.

இதேவேளை திருவானந்தபுரம் பத்மநாப சுவாமி கோவிலில் பாதாள அறைகளில் இருந்து உச்சநீதிமன்ற உத்தரவுப்படி நடந்து வரும் கணக்கெடுப்பு விவரங்களை வெளியிட தடைவிதிக்கக் கோரி, திருவிதாங்கூர் மன்னர் குடும்பத்தினர் உச்சநீதிமன்றத்தில் மனு தாக்கல் செய்துள்ளனர்.