தேசிய பிரச்சினைக்கு தீர்வு

வாக்குறுதிகளை நிறைவேற்றினால் ஒத்துழைக்கத் தயார் - சம்பந்தன்

தேசிய பிரச்சினைக்கு துரிதமாக அரசியல் தீர்வுகாண அரசாங்கம் நடவடிக்கை எடுக்க வேண்டும் என தமிழரசுக்கட்சி பாராளுமன்றக் குழுத் தலைவர் இரா. சம்பந்தன் நேற்று பாராளுமன்றத்தில் தெரிவித்தார். ஜனாதிபதி மஹிந்த ராஜபக்ஷ அவர்கள் வாக்களித்த படி அர்ப்பணிப்புடன் செயற்பட்டு இனப்பிரச்சினை தீர்வு தொடர்பான தனது வாக்குறுதியை நிறைவேற்ற வேண்டும் எனவும் அதற்கு உதவ தமது கட்சி முன்வந்துள்ளதாகவும் அவர் குறிப்பிட்டார். வடக்கு, கிழக்கு நிலவரம் தொடர்பாக நேற்று முழு நாள் விவாதம் நடத்தப்பட்டது. இது தொடர்பான பிரேரணையை முன்வைத்து உரையாற்றிய அவர், யுத்தம் 2009 மே மாதத்தில் தோற்கடிக்கப்பட்டு முடிவுக்கு வந்து இப்போது இரண்டு ஆண்டுகளும் மேலாகிவிட்டது. பிரிவுபடாத ஐக்கிய இலங்கையில் சம பிரஜைகளாக வாழ்வதற்கான தங்கள் விருப்பினைத் தமிழ் மக்கள் தெரிவித்துள்ளனர்.

இப்பிணக்கு சம்பந்தப்பட்ட பிரதான விடயங்களை கையாள்வதற்கும் நீண்டகாலமாகப் புரையோடிப்போயுள்ள இப்பிரச்சினைக்கு ஏற்றுக்கொள்ளக்கூடிய அரசியல் தீர்வொன்றை உருவாக்குவதற் கும் பல நடவடிக்கைகள் ஆரம்பிக்கப் பட்டுள்ளன.

இலங்கை வாழ் பல்வேறு சமூகங்களுக்கும் மக்களுக்கும் மத்தியில் உண்மையான நல்லிணக்கத்தையும் ஒற்றுமையையும் ஏற்படுத்தும் ஏற்றுக்கொள்ளக்கூடிய அரசியல் தீர்வொன்றை உருவாக்குவதற்கும் இப்பிணக்கு சம்பந்தப்பட்ட பிரதான விடயங்களை கையாள்வதற்குமான அவசரத்தேவை மீது இச்சபையினதும், அரசாங்கத்தினதும் நாட்டினதும் கவனத்தை ஈர்ப்பதே இப்பிரேரணையின் நோக்கமாகும்.

இந்நாட்டைச் சேர்ந்தவர்களான இந்த நாட்டுக்கு சட்டபூர்வமாக உரித்துடையவர்களான இலங்கைத் தமிழ் மக்கள் இலங்கையில் தொடர்ந்து வாழக்கூடியதாகச் செய்வது அவசியமாகும்.

அம்மக்களின் பாதுகாப்பை உறுதி செய்வதும் அவர்களது கெளரவத்தை மீள ஏற்படுத்துவதும், ஆள்வதற்கான வாய்ப்பைக் கொண்டிருப்பதன் மூலம் தமது சட்டபூர்வ அரசியல், சமூக, பொருளாதார, கலாசார அபிலாசைகளை அவர்கள் பூர்த்தி செய்யக்கூடியதுமான ஏற்றுக்கொள்ளக்கூடிய அரசியல் தீர்வொன்று இருந்தால் மாத்திரமே இது சாத்தியமாகும்.

முரண்பாட்டுக்குக் காரணமான அடிப்படை விடயங்களை தீர்ப்பதற்காக ஏற்றுக்கொள்ளக்கூடிய ஒரு அரசியல் தீர்வை காணலாம்.

இடம்பெயர்ந்த மற்றும் பாதிக்கப்பட்ட மக்கள் தமது வாழ்க்கையை மீளக்கட்டியெழுப்பவும் மீள ஆரம்பிக்கவும் உதவும் பொருட்டு வடிவமைக்கப்பட்ட நிகழ்ச்சி நிரலொன்றை துரிதகதியில் நடைமுறைப்படுத்தவும்.

தமிழ் மக்கள் மீது பாதகமான அரசியல் சமூக, பொருளாதார மற்றும் கலாசார தாக்கங்களை ஏற்படுத்துகின்ற பல்வேறு நடவடிக்கைகளை மாற்றியமைப்பதற்கும் சீர்செய்யவும் மற்றும் நிவர்த்தி செய்யும் அவசர நடவடிக்கைகள் மேற்கொள்ளப்பட வேண்டுமென வலியுறுத்துகிறோம்.

தமிழ் மக்களின் அபிலாசைகளை நிறைவேற்ற சகல முயற்சிகளையும் மேற்கொள்வதாகவும் ஏற்கக்கூடிய அரசியல் தீர்வொன்றை ஏற்படுத்துவதாகவும் ஜனாதிபதி தெரிவித்துள்ளார்.

இதற்கு முன்னர் அரசியல் தீர்வு காண சர்வ கட்சி மாநாடு நடத்தப்பட்டது. தமிழ் தரப்புடன் பேசி தேசிய பிரச்சினைக்கு நிரந்தர தீர்வு காண ஜனாதிபதி உறுதி அளித்துள்ளார். இந்த பிரச்சினையை தனது அதிகாரத்தைப் பயன்படுத்தி தீர்க்க ஜனாதிபதி நடவடிக்கை எடுக்க வேண்டும். அவர் தனது பொறுப்பை நிறைவேற்ற வேண்டும். தற்பொழுது அரசாங்கத்திற்கு 2/3 பெரும்பான்மை பலம் உள்ளது.

தேசியப் பிரச்சினைக்கு தாமதமின்றி தீர்வு காண வேண்டும். அதிகமான மக்கள் அமைதித்தீர்வையே விரும்புகின்றனர்.

பிரிக்கப்படாத இலங்கைக்குள் கெளரவமான அரசியல் தீர்வொன்றை பெற்றுக்கொடுக்க வேண்டும் என்பதே எமது கோரிக்கையாகும் என்று குறிப்பிட்டார்.