இனப்பிரச் சினைத் தீர்விற்கான

உத்தேச பாராளுமன்ற தெரிவுக்குழு பலம் பொருந்தியதாக இருக்கும்

சர்வகட்சிப் பிரதிநிதிகள் குழு மற்றும் கடந்தகாலத்தில் நியமிக்கப்பட்ட ஆணைக் குழுக்களைவிட இனப்பிரச் சினைத் தீர்வு தொடர்பாக ஆராய்வதற்கு நியமிக்கப்படவிருக்கும் பாராளுமன்றத் தெரிவுக்குழு பலம் பொருந்தியதாக இருக்கும் என அரசாங்கம் தெரிவித்துள்ளது.

பாராளுமன்றமானது நாட்டின் அனைத்துப் பாகங்களிலுமுள்ள மக்களால் தெரிவுசெய்யப்பட்ட பிரதிநிதிகளைக் கொண்டது. மக்களால் தெரிவுசெய்யப்பட்ட பாராளுமன்ற உறுப்பினர்களைக் கொண்ட தெரிவுக்குழுவின் ஊடாக இனப்பிரச்சினைத் தீர்வு தொடர்பாக ஆராய்வதானது பலம்மிக்கதாகவிருக்கும், என அமைச்சரவைத் தீர்மானங்களை அறிவிக்கும் ஊடகவியலாளர் மாநாட்டில் கலந்துகொண்ட ஊடகத்துறை அமைச்சர் கெஹலிய ரம்புக்வெல்ல நேற்று கூறினார்.

தெரிவுக்குழுவை அமைப்பதானது காலத்தை இழுத்தடிக்கும் செயற்பாடு என முன்வைக்கப்படும் குற்றச்சாட்டுக்கள் அர்த்தமற்றவை. கடந்த காலத்தில் ஜனாதிபதியால் நியமிக்கப்பட்ட சர்வகட்சிப் பிரதிநிதிகள் குழுவில் அங்கம் வகித்த பிரதான எதிர்க்கட்சிகளான ஐக்கிய தேசியக் கட்சி, தமிழ்த் தேசியக் கூட்டமைப்பு, ஜே.வி.பி. போன்றவை அதிலிருந்து விலகிச் சென்றதால் அதன் செயற்பாடுகள் பாதிக்கப்பட்டதாக அவர் குறிப்பிட்டார்.

எனினும், இனப்பிரச்சினைத் தீர்வு தொடர்பாக ஆராயும் பாராளுமன்றத் தெரிவுக்குழு அவ்வாறானதாக இருக்காது. பாராளுமன்றத்தில் அங்கம் வகிக்கும் உறுப்பினர்கள் அனைவருக்கும் இதுவிடயத்தில் பொறுப்பு உள்ளது. தெரிவுக்குழுவில் பங்கெடுக்கப்போவ தில்லையெனக் கூறுபவர்கள் பாராளுமன்ற ஜனநாயகத்துக்கு எதிராகச் செயற்படுபவர்களாகக் கருதப்படுவர் என்றும் அமைச்சர் தெரிவித்தார்.

அங்கு மேலும் கருத்துத்தெரிவித்த அமைச்சர் கெஹலிய ரம்புக்வெல, இனப்பிரச்சினைக்கு பாராளுமன்றத்தின் ஊடாகத் தீர்வொன்று முன்வைக்கப்படவேண் டும் என்பதே ஜனாதிபதி மஹிந்த ராஜபக்ஷவின் நிலைப்பாடு. நிறைவேற்று அதிகாரமுடையவர் என்ற ரீதியில் தீர்மானமொன்றை அவர் முன்வைக்கலாம். எவ்வாறான தீர்மானம் முன்வைக்கப்பட்டாலும் அது பாராளுமன்றத்துக்கு கொண்டுவரப்பட்டு அங்கு விவாதிக்கப்பட்டே நடைமுறைக்குக் கொண்டுவரப்படவேண்டும். இதற்கு நீண்டகாலம் எடுக்கும். நேரடியாக பாராளுமன்றத் தெரிவுக்குழுவின் ஊடாகத் தீர்வொன்றைப் பெற்றுக்கொண்டால் காலத்தை மிச்சப்படுத்த முடியும் என்பதாலேயே தெரிவுக்குழுவொன்றை அமைக்கும் விடயத்தில் ஜனாதிபதி அக்கறைகாட்டிவருகிறார்.

தெரிவுக்குழுவை அமைப்பதானது காலத்தை இழுத்தடிக்கும் செயற்பாடு எனக் கூறமுடியாது. அத்துடன், தெரிவுக்குழுவை அமைப்பது தொடர்பான பிரேரணை கூடிய விரைவில் பாராளுமன்றத்தில் சமர்ப்பிக்கப்படும் என்றும் ஊடகத்துறை அமைச்சர் கெஹலிய ரம்புக்வெல மேலும் தெரிவித்தார்.