30 வருடங்களின் பின் தொண்டமனாறு அச்சுவேலி வீதி முழுமையாகத் திறப்பு

யாழ் தென்மராட்சி தனங்கிளப்பு பகுதியில் 271 குடும்பங்கள் நேற்று மீள்குடியமர்த்தப்பட்டன. அதேநேரம், சுமார் 30 வருடங்களின் பின்னர் தொண்டமனாறு-அச்சுவேலி பிரதான வீதி முழுமையாக மக்கள் பாவனைக்குத் திறந்துவிடப்பட்டது. இந்நிகழ்வுகளில் பொருளாதார அபிவிருத்தி அமைச்சர் பசில் ராஜபக்ஷ பிரதம விருந்தினராகக் கலந்துகொண்டார்.

கடந்த யுத்த காலத்தில் தென்மராட்சி தனங்கிளப்பு பகுதியிலிருந்து இடம்பெயர்ந்தவர்களில் 271 குடும்பங்களைச் சேர்ந்த 850 பேர் நேற்று மீள்குடியமர்த்தப்பட்டனர். இவர்களுக்கான அனுமதிப் பத்திரத்தை பொருளாதார அபிவிருத்தி அமைச்சர் பசில் ராஜபக்ஷ வழங்கியதுடன், இப்பகுதிக்கான மின்சார இணைப்புக்களை வழங்குவதற்கான மின்கம்பங்கள் அமைக்கும் திட்டத்தையும் ஆரம்பித்துவைத்தார்.

பூநகரி பகுதிக்குச் செல்வதற்கான பஸ் தரிப்பிடமொன்றுக்கும் அமைச்சர் அங்கு அடிக்கல் நாட்டிவைத்தார். இந்த நிகழ்வில் வெளிநாட்டு வேலைவாய்ப்பு ஊக்குவிப்பு அமைச்சர் டிலான் பெரேரா, பாரம்பரிய கைத்தொழில் மற்றும் சிறுதொழில்முயற்சி அமைச்சர் டக்ளஸ் தேவானந்தா, வடமாகாண ஆளுநர் மேஜர் ஜெனரல் ஜீ.ஏ.சந்திரசிறி உட்பட பலர் கலந்துகொண்டனர்.

இதேநேரம், வலிகாமம் கிழக்கு தொண்டமனாறு-அச்சுவேலி பிரதான வீதியையும் அமைச்சர் பசில் ராஜபக்ஷ நேற்று முற்பகல் திறந்து வைத்தார். 28 வருடங்களின் பின்னர் இவ்வீதி மக்கள் பாவனைக்காக முழுமையாகத் திறந்துவைக்கப்பட்டுள்ளது.

இந்நிகழ்வில் அமைச்சர் டக்ளஸ் தேவானந்தா, வடமாகாண ஆளுநர் மேஜர் ஜெனரல் ஜீ.ஏ.சந்திரசிறி மற்றும் யாழ் மாவட்ட இராணுவ கட்டளைத் தளபதி மேஜர் ஜெனரல் மஹிந்த ஹத்துருசிங்க ஆகியோர் கலந்துகொண்டனர்.

இந்த நிகழ்வுகளில் கலந்துகொண்ட அமைச்சர் கூறியதாவது; மோதல்களால் வடக்கு, கிழக்கு மாகாணங்கள் பாதிக்கப்பட்டுள்ள போதும், வடபகுதியே மோசமாகப் பாதிக்கப்பட்டிருப்பதால் அதன் மீள்கட்டுமானத்தில் அரசாங்கமும், ஜனாதிபதி மஹிந்த ராஜபக்ஷவும் கூடுதல் அக்கறைகாட்டியிருப்பதாக அமைச்சர் பசில் ராஜபக்ஷ தெரிவித்தார்.

யாழ்ப்பாணத்தில் பெரும்பாலான பகுதிகளில் மீள்குடியேற்றங்கள் பூர்த்தியடைந்துள்ளன. எஞ்சிய இடங்களில் கூடிய விரைவில் மீள்குடியேற்ற நடவடிக்கை கள் இடம்பெறும் என்றும் கூறினார்.

தொண்டமனாறு செல்வச்சன்நிதி ஆலயத்திலிருந்து கதிர்காமத்துக்கு பாதயாத்திரை செல்லும் பக்தர்கள் கடந்த காலத்தில் இவ்வீதியூடாகவே சென்றனர்.

இப்பகுதியில் விவசாயிகளின் நிலப்பரப்புக்குள் உவர்நீர் வருவதைத் தடுப்பதற்கு நடவடிக்கை எடுக்குமாறும், அதற்கான கால்வாய்களை அமைக்குமாறும் பொருளாதார அபிவிருத்தி அமைச்சர் பசில் ராஜபக்ஷ கூறினார்.