காட்டிக் கொடுக்கும் கைத்தொலைபேசிகள்

இந்த நூற்றாண்டில் விஞ்ஞானம் வழங்கியுள்ள வினோத படைப்புகளுள் ஒன்று இந்த கைடக்க தொலைபேசி. ஆனால், விஞ்ஞானத்தின் மற்ற கருவிகளை போலவே இதற்கும் ஆபத்தான மறுபக்கம் ஒன்று உண்டு. அது என்ன? தீவிரவாதிகள் மற்றும் குற்றப் பின்னணி கொண்டவர்கள் இதை தவறாக பயன்படுத்தும்போது, அது உலக அமைதிக்கே சவால் விடும் ஆபத்தான படைப்பாக மாறிப்போகிறது. பல குற்றப் புலனாய்வுகளில் கையடக்க தொலைபேசி பங்கு எந்த அளவுக்கு இருக்கிறது என்பதை நாம் தினம்தோறும் பத்திரிகைகள் மூலம் அறிகிறோம். எனவே, இந்த கையடக்க தொலைபேசிகளின் நடமாட்டத்தை கண்காணிக்க வேண்டியது அவசியமாகிறது.

தீவிரவாதத்தை ஒடுக்க உலக நாடுகள் எடுத்து வரும் முயற்சிகளை குறைத்து மதிப்பிட முடியாது. அதற்காக செலவிடப்படும பணம் சம்பந்தப்பட்ட நாடுகளில் பட்ஜெடுகளில் ஒரு கணிசமான தொகையாகும். எனவே, கைடக்க தொலைபேசிகளை கண்காணிக்க ஒரு திட்டத்துடன் தயாராகி வருகிறது. இந்திய மத்திய அரசு, ஒருவர் கையடக்க தொலைபேசியில் பேசிக்கொண்டிருக்கும்போதே, அழைத்தவர், அழைக்கப்படுபவர் என இருவரது பேச்சு மற்றும் எந்த இடத்தில் இருந்து பேசுகிறார்கள் ஆகிய விவரங்களை பதிவு செய்ய இந்த திட்டம் வழி செய்கிறது.

இருவரது குரல்களும் தீவிரவாதிகள் மற்றும் குற்றப் பின்னணி உடையவர்களின் குரல்களோடு ஒத்துப் போகின்றனவா என்று ஒப்பிட்டு பார்த்து கையடக்க தொலைபேசி பேச்சு முடிவடைவதற்குள் புலனாய்வு துறை அவர்களை சுற்றி வளைத்துவிட முடியுமென்பது இந்த திட்டத்தின் சிறப்பம்சம்.

சுமார் 450 கோடி ரூபாய் செலவில் அமைய உள்ள இந்த திட்டம் முதல் கட்டமாக இந்தியாவின் 30 மாநில தலைநகரங்களிலும் அறிமுகப்படுத்தப்படுகிறது. இந்த தகவல்கள் அனைத்தும் ஒருங்கிணைக்கப்பட்டு இறுதியாக டில்லியிலிருந்து இயங்கும்படி அமைக்கப்படவுள்ளது.

இதற்கு தேவையான கருவிகள் அனைத்தும் வெளிநாடுகளிலிருந்து இறக்குமதி செய்யப்படும. ஆனால், மென் பொருள்? நாட்டின் பாதுகாப்பு சம்பந்தப்பட்டதல்லவா. ரிஸ்க் எடுக்க முடியாதே எனவே, உள்துறை அமைச்சகம் மென் பொருளை இங்கேயே, நாமே உருவாக்க வேண்டுமென்பதில் உறுதியாக இருக்கிறது.

சரி இதெல்லாம் ஒரு புறமிருக்கட்டும். இதுபோன்ற வசதி தற்போது இல்லவே? இல்லையா; இல்லாமலில்லை ஆனால், அது போதுமானதாக, நவீனமாக இல்லை. கையடக்கதொலைபேசி சேவை நிறுவனங்களிடமிருந்து இந்த வசதியை பெறமுடியும். ஆனால், வெவ்வேறு நிறுவனங்கள் வெவ்வேறு விதமான கருவிகளையும் தொழில்நுட்பங்களையும் பயன்படுத்துவதால் அவற்றை ஒருங்கிணைப்பது சாத்தியமில்லை என்று கருதுகிறது. இந்திய மத்திய அரசு, அதற்காகவே இந்த புதிய திட்டம்.