முஸ்லிம்களிடம் இருந்து ஐரோப்பாவை காப்பதற்கே தாக்குதல் நடத்தினேன்

“ஐரோப்பாவில் இஸ்லாமியர்கள் குடியேறுவதைத் தடுத்து நிறுத்தவும், மக்களுக்கு இதன் மூலம் உறுதியான செய்தி விடுக்கவும் தான் நான் தாக்குதல் நடத்தினேன்” என்று நோர்வே இரட்டை தாக்குதல் குற்றாவளி ஆண்டர்ஸ் பேரிங் ப்ரீவிக், நீதிமன்றத்தில் நேற்று முன்தினம் கூறினார். இதையடுத்து அவரை எட்டு வாரங்கள் தனிமைச் சிறையில் அடைக்க நீதிபதி உத்தரவிட்டார்.

நோர்வேயில் சமீபத்தில் நடந்த பிரதமர் அலுவலக குண்டு வெடிப்பு மற்றும் உடோயா தீவு துப்பாக்கிச் சூடு சம்பவங்கள் உலகையே குலுக்கின. இச்சம்பவத்தில் கைது செய்யப்பட்ட ஆண்டர்ஸ் பேரிங் ப்ரீவிக் நேற்று முன்தினம் அந்நாட்டு நீதிமன்றத்தில் ஆஜர்படுத்தப்பட்டார்.

ஆஜராவதற்கு முன் அவர் தன் வழக்கறிஞர் மூலம் நீதிபதிக்கு சில வேண்டுகோள்கள் விடுத்திருந்தார். அதன்படி பொலிஸ் உடையில் மக்கள் முன்னிலையில் தோன்றி தான் குண்டு வெடிப்பு நடத்தியது எதற்காக என்று விளக்கப் போவதாகவும், அதற்கு அனுமதி அளிக்கும்படியும் கோரியிருந்தார்.

மேலும் ஐரோப்பாவை காப்பாற்றும் இந்தப் பணியில் இளைஞர்களை ஈடுபடுத்தும் பிரசார முயற்சியாக இதைப் பயன்படுத்தப் போவதாகவும் கூறியிருந்தார்.

ஆனால் இச்சம்பவங்களில் தான் கைது செய்யப்பட்டு நீதிமன்றத்தில் ஆஜர்படுத்தப்பட்டால் அங்கு என்ன சொல்ல வேண்டும் என்பதையும் அவர் ஏற்கனவே தயாரித்து வைத்துள்ளார்.

ப்ரீவிக்கின் கோரிக்கைகளை நிராகரித்த நீதிபதி, முதல் விசாரணை நீதிமன்றத்தின் மூடிய அறைக்குள் நடக்க வேண்டும். பத்திரிகையாளர்கள் உட்பட யாருக்கும் அனுமதி அளிக்கப்படமாட்டாது என திட்டவட்டமாகத் தெரிவித்துவிட்டார். அதன்படி நேற்று முன்தினம் நோர்வே நேரப்படி நண்பகல் 12 மணியளவில் ப்ரீவிக் நீதிமன்றத்தில் ஆஜர்படுத்தப்பட்டார். விசாரணை 35 நிமிடங்கள் நடந்தது.

விசாரணையில் ப்ரீ விக் கூறுகையில் “குண்டு வெடிப்பு மற்றும் துப்பாக்கிச் சூடு இரண்டையும் நான் தான் நடத்தினேன். ஆனால் அது குற்றச் செயல் அல்ல. சட்டப்படி இது குற்றமும் அல்ல. முஸ்லிம்கள் ஐரோப்பாவில் தொடர்ந்து குடியேறி வருகின்றனர். அதனால் அவர்களிடம் இருந்து ஐரோப்பாவைக் காப்பாற்றத்தான் நான் இப்படி செய்தேன். இதன் மூலம் மக்களுக்கு உறுதியான செய்தி அளிக்க முடிவெடுத்தேன்” என்றார்.

விசாரணை முடிவில் அவருக்கு எட்டு வார தனிமை சிறைத் தண்டனை விதிக்கப்பட்டது. அவர் மீதான குற்றச்சாட்டு உறுதி செய்யப்பட்டால் அவருக்கு 21 ஆண்டுகள் தண்டனை கிடைக்கும்.

இந்நிலையில் உடோயா தீவில், தண்ணீரில் மூழ்கி இறந்தோரை தேடும் பணி தொடர்கிறது. நோர்வே இளவரசரின் உறவினரான ஓர் இளைஞரும் துப்பாக்கிச் சூட்டில் பலியாகியுள்ளார்.

எனினும் இந்த இரு தாக்குதல்களிலும் மொத்தம் 76 பேரே கொல்லப்பட்டதாக நோர்வே பொலிஸார் நேற்று உத்தியோகபூர்வமாக அறிவித்தனர். முன்னதாக இத்தாக்குதலில் 93 பேர் கொல்லப்பட்டதாக கூறப்பட்டிருந்தமை குறிப்பிடத்தக்கது.

இந்நிலையில் பிரான்ஸ் நாட்டின் தென்பகுதியில், கொரானல் என்ற இடத்தில் உள்ள ப்ரீவிக்கின் தந்தை வீட்டில் நேற்று பிரான்ஸ் பொலிஸார் சோதனை நடத்தினர். ஆனால் ப்ரீ விக்கின் தந்தை ஜென்ஸ் ப்ரீவிக் பல ஆண்டுகளாக தன் மகனுடன் தொடர்பில்லாமல் இருந்துள்ளார் என பத்திரிகைகள் தெரிவித்துள்ளன.

நோர்வேயின் ‘டிவி2’ தொலைக்காட்சிக்கு ப்ரீவிக்கின் தந்தை அளித்த பேட்டியில், தனது மகனை கடைசியாக அவனது 17 வயதில் பார்த்ததாக குறிப்பிட்டுள்ளார். அத்துடன் இவ்வளவு பேரை கொல்வதை விட அவன் தற்கொலை செய்து கொண்டிருந்தால் நான்றாக இருக்கும் என அவர் குறிப்பிட்டுள்ளார்.

இந்த தாக்குதல் சம்பவத்திற்கு முன்னதாக ப்ரீவிக் லண்டன் முகவரியிட்ட 1,500 பக்க அறிக்கை ஒன்றை எழுதியுள்ளார். அதில் தனது தலைவர் இங்கிலாந்தைச் சேர்ந்த ரிச்சர்ட், இஸ்லாத்தை பொறுத்துக்கொள்ளும் ஐரோப்பிய நாடுகளை கவிழ்ப்பதற்காக என்னை போன்று 80 பேர் தேர்தெடுக்கப்பட்டுள்ளனர் என்று குறிப்பிட்டுள்ளதாக ‘தி டெலிகிராப்’ நாளிதழ் செய்தி வெளியிட்டுள்ளது.

இதையடுத்து லண்டனுக்கு ப்ரீவிக் எப்போது வந்து சென்றார் என்பது பற்றி ஸ்கொட்லான்ட் பொலிஸார் விசாரணையை தொடங்கியுள்ளனர்.

இதேவேளை நோர்வே இரட்டைத் தாக்குதலுக்கு அஞ்சலி செலுத்தும் நிகழ்வு தலைநகர் ஒஸ்லோவில் நேற்று முன்தினம் இடம்பெற்றது. இதில் ஒரு லட்சத்திற்கும் மேற்பட்ட மக்கள் கலந்து கொண்டு கொல்லப்பட்டோருக்காக இறுதி அஞ்சலி செலுத்தினர்.

இந்நிகழ்வில் பேசிய நோர்வே பிரதமர் ஜென்ஸ் ஸ்டெல்டன்பேர்க், இந்த கொடூர சம்பவத்தால் நோர்வே வீழ்ச்சியடையப் போவதில்லை. பயங்கரவாதிகளால் மனிதர்களையே கொல்ல முடியும், முழு நாட்டையும் வீழ்த்த முடியாது.

2011 ஜுலை 22 க்கு பின்னரான நோர்வேயில் ஜனநாயகம், கருத்துக்கூறும் உரிமை என்பவற்றை வலுப்படுத்த உறுதி பூணுவோம் என்றார்.