இலங்கைத் தமிழர் விவகாரம்; இந்தியப் பிரதமருடன் உலகத் தமிழ் அமைப்புகளின் கூட்டமைப்பு சந்திப்பு 13 ஆவது திருத்தத்தின் பிரகாரம் முழு அதிகாரங்களும் வழங்கப்பட உறுதி செய்யுமாறு வேண்டுகோள்

இந்தியப் பிரதமர் மன்மோகன் சிங்கை உலகத் தமிழ் அமைப்புகளின் கூட்டமைப்பின் தலைவர் சேதுராமன் உட்பட முக்கிய தமிழ் ஆர்வலர்கள் நேற்று முன்தினம் புதன்கிழமை சந்தித்து இலங்கைத் தமிழர் பிரச்சினை தொடர்பாக கோரிக்கைகளை முன்வைத்துள்ளனர். பிரதமர் கலாநிதி மன்மோகன் சிங்கின் இல்லத்தில் இந்தச் சந்திப்பு சுமார் 15 நிமிடங்கள் இடம்பெற்றது. தமிழக காங்கிரஸ் தலைவர் தங்கபாலுவும் இச்சந்திப்பில் உடனிருந்தார். இலங்கைப் பிரச்சினை, ஐக்கிய நாடுகள் சபையில் வாக்கெடுப்புக்கு வரும் போது, தமிழர்களுக்கு ஆதரவாக இந்தியா நிற்க வேண்டும், போரால் பாதிக்கப்பட்ட மக்களுக்கு நிவாரணம் வழங்குவதற்கு அனைத்து நடவடிக்கைகளையும் விரைந்து செய்ய வேண்டும். 13 ஆவது சட்டத்திருத்தம் அளிக்கும் அனைத்து உரிமைகளையும் இந்திய தமிழர்களுக்கு பெற்றுத்தர இந்தியா நடவடிக்கை எடுக்க வேண்டும் என இந்திய பிரதமரிடம் கோரிக்கை விடுக்கப்பட்டுள்ளது.

பெங்களூர் தமிழ்ச் சங்கத் தலைவர் மீனாட்சி சுந்தரம் உள்ளிட்ட சில முக்கிய தமிழ் ஆர்வலர்கள் மனுவையும் கொடுத்துள்ளார்கள். பிரதமரிடம் அளிக்கப்பட்ட மனுவில் இலங்கைத் தமிழர் விவகாரம் குறித்த கோரிக்கைகள் இடம்பெற்றிருந்தன.

இலங்கையில் தமிழர்கள் மீது அந்நாட்டு இராணுவம் நிகழ்த்திய கோர தாண்டவம் எப்படியெல்லாம் இருந்தது என்ற விவரங்கள் இப்போது வெளியில் வந்துவிட்டது. மனிதாபிமானம் உள்ள யாருமே அதைப்பார்த்து கண்கலங்காமல் இருக்க முடியாது. அத்தனை துயரமும் அவலமும் நிறைந்த காட்சிகளாக அவை இருந்தன. இவ்வளவு போர்க்குற்றங்களை தமிழர்களுக்கு எதிராக அந்நாட்டு அரசு இழைத்துள்ளதை உலகம் தற்போது கண்கூடாகப் பார்த்துவிட்டது. இந்த சூழ்நிலையில் இலங்கை விவகாரம் குறித்து ஐக்கிய நாடுகள் சபையில் விரைவில் வாக்கெடுப்பு நடக்கவுள்ளது. அதில் தமிழர்கள் பக்கம் இந்தியா நிற்க வேண்டும். தமிழர்களுக்கு ஆதரவான நிலைப்பாட்டை இந்திய எடுக்க வேண்டும்.
இந்தியா உள்ளிட்ட உலக நாடுகள் அளிக்கும் உதவித் தொகைகள் எல்லாமே, சிங்களவர்களின் மேம்பாட்டிற்காக செலவிடப்படும் அவல நிலையும் காணப்படுகிறது. இந்த உதவிகள் அனைத்தும் தமிழர்களுக்கு மட்டுமே கிடைக்க வேண்டும். இதற்கான ஏற்பாட்டை இந்தியா செய்ய வேண்டும்.

இலங்கையில் தற்போது நடந்து முடிந்த உள்ளூராட்சித் தேர்தல்களில் தமிழ்த் தேசியக்கூட்டமைப்பைச் சேர்ந்தவர்கள் தான் பெரும் வெற்றி பெற்றுள்ளனர். தங்களது பிரதிநிதிகளாக இவர்களைத் தான் தமிழ் மக்கள் அங்கீகரித்துள்ளனர். எனவே, 13 ஆவது சட்டத்திருத்தத்தின் படி தமிழர்களுக்கு உள்ள உரிமையை பெற்றுத்தர இந்தியா, முழு மூச்சாக பாடுபட வேண்டும்.

தமிழ் மீனவர்கள் மீது இலங்கை கடற்படை தொடர்ந்து தாக்குதல் நடத்தி வருகிறது. கச்சதீவில் தமிழ் மீனவர்களுக்கு உள்ள உரிமையைப் பறித்துக் கொண்டு இலங்கை சர்வாதிகாரப் போக்குடன் நடந்து கொள்கிறது. இதை இந்தியா தட்டிக்கேட்டு கச்சதீவு உரிமைகளை மீண்டும் பெற்றுத்தர வேண்டும். இவ்வாறு மனுவில் தெரிவிக்கப்பட்டிருந்தது.
மனுவைப் பெற்றுக்கொண்ட பிரதமர் மன்மோகன் சிங், "தமிழக மீனவர்கள்மீதான தாக்குதல் சம்பவங்கள் எதுவும் சமீபத்தில் இடம்பெறவில்லை. அந்நாட்டு அரசுக்கு இது தொடர்பாக முறைப்படி அறிவுறுத்தல் செய்யப்பட்டுள்ளது.

"மீறினால், தகுந்த நடவடிக்கை எடுக்கப்படும்' என தெரிவிக்கப்பட்டுள்ளது. 13 ஆவது சட்டதிருத்தத்தில், தமிழர்களுக்கு என்னென்ன உரிமைகள் உள்ளனவோ அவற்றையெல்லாம் தர வேண்டும் என இலங்கை அரசிடம் சந்தர்ப்பம் வாய்க்கும் போதெல்லாம் இந்தியா எடுத்துக் கூறிவருகிறது.

"தமிழர்களுக்கு வழங்கப்படும் நிவாரண உதவிகள்அனைத்தையும் கொழும்பில் உள்ள இந்திய உயர்ஸ்தானிகராலய அலுவலக அதிகாரிகள் கண்காணித்து தக்க முறையில் நடவடிக்கைகள் எடுக்கும்படி அறிவுறுத்தப்பட்டுள்ளது' என பிரதமர் தெரிவித்ததாக தகவலறிந்த வட்டாரங்கள் கூறியதாக தமிழகத்திலிருந்து வெளிவரும் "தினமலர்' பத்திரிகை நேற்று தெரிவித்துள்ளது.