நிமல் ரூபனின் உயிருக்கு அரசாங்கமே பொறுப்புக் கூறவேண்டும்

வவுனியா சிறைச்சாலையிலிருந்து சிறைச்சாலை அதிகாரிகளால் ராகம போதனா வைத்தியசாலைக்கு மாற்றப்பட்டு, பின்னர் உயிரிழந்த நிமல் ரூபனின் உயிருக்கு மஹிந்த ராஜபக்ஷ அரசாங்கமே முழு பொறுப்புக் கூற வேண்டும் என பாராளுமன்ற உறுப்பினர் ஜயலத் ஜயவர்தன தெரிவித்தார். அவர் விடுத்துள்ள ஊடக அறிக்கையில் மேற்கண்டவாறு தெரிவிக்கப்பட்டுள்ளது.அதில் மேலும் தெரிவிக்கப்பட்டுள்ளதாவது, அரசியல் நோக்கத்திற்காக இலங்கையிலுள்ள சிறைகளில் பல்லாயிரக்கணக்கான தமிழ் அரசியல் கைதிகள் உள்ளனர். இவர்கள் உண்மையிலேயே அரசியல் கைதிகளாவர். இந்தக் கைதிகள் குறித்து இந்த அரசாங்கம் எந்தவொரு நடவடிக்கையும் எடுக்கவில்லை.

பொய் வாக்குறுதிகளை மாத்திரம் தாராளமாக வழங்கி வருகின்றது. இவ்வாறு பொய் வாக்குறுதிகளை வழங்கி அரசாங்கம் ஏமாற்றி வருகின்ற நிலையில், அண்மையில் வவுனியா சிறைச்சாலையில் கைதிகள் துரதிஷ்டவசமான சம்பவத்திற்கு முகங்கொடுத்தனர்.

இந்தப் பொறுப்பில்லாத அரசாங்கத்தின் கைதிகள் குறித்தான கவனயீன, ஏனோதானோ என்ற நடவடிக்கையே இச் சம்பவத்திற்குக் காரணமாகும். அரசாங்கத்திற்கு ஆதரவளிக்கும் எந்தவொரு கைதிக்கும் விடுதலை பெற்றுக் கொடுக்க இந்த அரசாங்கம் தயார் என்பது தற்போது நிரூபணமாகிவிட்டது.

தமிழீழ விடுதலைப் புலிகளின் முக்கிய தலைவர்களாக செயற்பட்ட கருணா அம்மான் என்ற தற்போதைய பிரதியமைச்சர் விநாயகமூர்த்தி முரளிதரனுக்கு ஸ்ரீலங்கா சுதந்திரக் கட்சியின் உப தலைவர் பதவியை இந்த அரசாங்கம் வழங்கியுள்ளதோடு, பிள்ளையான் என்ற சிவநேசதுரை சந்திரகாந்தனுக்கு கிழக்கு மாகாண முதலமைச்சர் பதவியையும் வழங்கியுள்ளது. அத்துடன் சர்வதேச பொலிஸாரால் பிடிவிறாந்து பிறப்பிக்கப்பட்டுள்ள கே.பி என்ற குமரன் பத்மநாதனுக்கு மறைவிடமான சொகுசு வாழ்க்கையை அரசாங்கம் தனது நிழலில் வழங்கியுள்ளது. அரசாங்கத்திற்கு ஆதரவு அளிக்காதோருக்கு தேசத்துரோகி என்ற பெயர் சூட்டப்படுகிறது.

அரசியல் நோக்கத்திற்காக சிறை வைக்கப்பட்டுள்ள கைதிகளுக்கு பொது மன்னிப்பு வழங்க ஜனாதிபதி மஹிந்த ராஜபக்ஷவுக்கு அதிகாரம் உள்ளது.

அவருக்கு நெருக்கமான கைதிகளுக்கு பொது மன்னிப்பு வழங்குகிறார். இவ்வாறு ஜனாதிபதி மஹிந்த ராஜபக்ஷ பொது மன்னிப்பு வழங்கிய பலர் கொலைக் குற்றவாளிகளே. எதிர்க்கட்சி நாடாளுமன்ற உறுப்பினராக மஹிந்த ராஜபக்ஷ இருந்த போது அரசியல் கைதிகளை விடுதலை செய்க என்று உள்நாட்டிலல்லாமல் வெளிநாடுகளிலும் குரல் எழுப்பியிருந்தார். இன்று அவர் நிறைவேற்று அதிகாரமுடைய ஜனாதிபதி.

எனினும் அவர் அன்று கடைப்பிடித்த அதே கொள்கையில் இன்றும் இருக்க வேண்டும்.

நிமல் ரூபனின் கொலை மற்றும் வவுனியா சிறைச்சாலை சம்பவம் தொடர்பில் பக்கச் சார்பின்றிய விசாரணைகளை அரசாங்கம் முன்னெடுக்க வேண்டும். அதே போன்று குற்றவாளிகள் எவராகவிருந்தாலும் தண்டனை வழங்கப்பட வேண்டும். சிறைச்சாலைகளிலுள்ள தமிழ் அரசியல் கைதிகளின் உயிர்களைப் பாதுகாக்கும் பொறுப்பை அரசாங்கம் ஏற்க வேண்டும்.

மேலும் இக் கைதிகள் குறித்து கவனம் செலுத்துமாறு சர்வதேச செஞ்சிலுவைச் சங்கத்தின் இலங்கைப் பிரதிநிதியிடமும், மனித உரிமைகள் ஆணைக்குழுவின் தலைவரிடமும் நான் கேட்டுக் கொள்கின்றேன். _