வட பகுதி மக்களின் மனோநிலையை அறிந்துகொள்ள மாகாண சபை தேர்தல் அவசியம் - ஜே.வி.பி.

அரசாங்கத்தின் வேலைத் திட்டங்களை வெளிப்படுத்தும் நிறுவனங்களாக மாகாண சபைகள் மாறிவிட்டன. இவற்றின் மூலம் நாட்டின் இனப்பிரச்சினைக்குத் தீர்வு காண முடியாது. இந்நிலையில் வடக்கில் மாகாண சபைத் தேர்தலை நடத்தினாலும் அங்குள்ள மக்களின் பிரச்சினைகளுக்குத் தீர்வு கிடைத்துவிடப் போவதில்லை என தெரிவித்துள்ள ஜே.வி.பி. ஆனாலும் வடக்கில் மக்களின் மனதை சோதிக்க வேண்டுமென்றால் இதுவரை நடத்தப்படாதிருக்கும் வட மாகாண சபை தேர்தலையே அரசாங்கம் முதற்கட்டமாக நடத்தியிருக்க வேண்டுமென தெரிவித்துள்ளது.

நேற்று ஞாயிற்றுக்கிழமை ஜே.வி.பி. தலைமையகத்தில் நடைபெற்ற ஊடக சந்திப்பில் கலந்துகொண்டு உரையாற்றிய அந்தக் கட்சியின் பாராளுமன்ற உறுப்பினர் அனுரகுமார திசாநாயக்க இவ்வாறு தெரிவித்தார்.
அநுரகுமார திசாநாயக்க அங்கு தொடர்ந்து உரையாற்றுகையில்;
நாட்டின் பொருளாதாரம் வீழ்ச்சியடைந்து பொருட்களின் விலை அதிகரிப்புகளினால் பாதிக்கப்பட்டுள்ள மக்கள் அதற்கு எதிராக போராட்டங்களையும் முன்னெடுத்து வருகின்றனர். அத்தோடு அரசாங்கத்தின் அமைச்சர்களும் ஜனாதிபதியின் குடும்பத்தினரும் நாட்டு மக்களின் பணத்தை கொள்ளையடிக்கும் வகையிலான செயற்பாடுகளுக்கு எதிராகவும் போராட்டங்களை முன்னெடுத்து வருகின்றனர்.
இந்நிலையில் இவ்வாறு அரசாங்கத்திற்கு எதிராக முன்னெடுக்கப்படும் போராட்டங்களை ஒன்றாக இணையவிடாத வகையில் குட்டித் தேர்தலொன்றை நடத்த முயற்சித்துள்ளது. இதன்படி அரசாங்கத்தின் முழு ஆதாரங்களையும் இந்த மாகாண சபைத் தேர்தலுக்குள் செலுத்தி அந்தந்த மாகாணங்களுக்குள் தான சாலைகளை திறந்து அரசாங்கத்தின் பணம், வாகனங்கள், சொத்துகள் என சகலதையும் பயன்படுத்தி மக்கள் மனதை திசை திருப்ப அரசாங்கம் முயற்சிகளை மேற்கொண்டுள்ளது.
இதனால் இந்தத் தேர்தலை அரசாங்கத்திற்கு எதிரான பாதாளமாக மாற்றியமைக்க வேண்டும். இதற்காக ஜே.வி.பி. மூன்று மாகாண சபைகளிலும் சக்தி மிக்க வேட்பாளர் குழுக்களையே நிறுத்தியுள்ளது. இந்நிலையில் நாம் மக்களிடம் கேட்பது என்னவென்றால் மானியங்கள், தொழில்வாய்ப்புகள், வீட்டு கடன்கள் போன்ற பொய்களால் நிறைந்த வாக்குறுதிகளுக்கு ஏமாறாமல் உண்மையினை நோக்கிய தேர்தலாக இதனை பயன்படுத்த வேண்டும்.
இதேவேளை தற்போது மாகாண சபை என்பது அரசாங்கத்தின் வேலைத்திட்டங்களைக் காட்டும் நிறுவனமாகவே மாற்றம் பெற்றுள்ளது. இதன் மூலம் தேசிய இனப்பிரச்சினைக்குத் தீர்வு காண முடியாது. இதனால் வடக்கில் மாகாண சபைத் தேர்தலை நடத்தினாலும் அந்த பகுதி மக்களின் பிரச்சினைகளுக்கு தீர்வு கிடைக்கும் என நாம் நம்பவில்லை. ஆனால், அந்த பகுதி மக்களின் மன நிலைகளை பரிசோதிக்க வேண்டுமென அரசாங்கம் எண்ணினால் இதுவரை  நடத்தப்படாதிருக்கும் வட மாகாண சபைத் தேர்தலையே முதற்கட்டமாக நடத்த வேண்டும்.
ஆனாலும் அரசாங்கம் தனது அதிகார வேலைத்திட்டங்களுக்கு அது பொருத்த மற்றது என்ற காரணத்தினாலேயே அங்கு தேர்தலை நடத்தாது பின் வாங்கியுள்ளது.