அரசாங்கத்தை மு.கா. ஆதரித்தால் தமிழருக்கு மட்டுமல்ல முஸ்லிம்களுக்கும் பாதிப்பு - மாவை

கிழக்கு மாகாண சபைத் தேர்தலில் முஸ்லிம் மக்களில் பெரும்பாலானோர் அரசுக்கு ஆதரவு வழங்கக்கூடாது என்ற தமது உள்ளத் துடிப்பை வெளிப்படுத்தி வருகின்றனர் ஸ்ரீலங்கா முஸ்லிம் காங்கிரஸ் கிழக்கு மாகாணசபைத் தேர்தலில் அரசாங்கத்தை ஆதரித்தால் அது தமிழ் மக்களைப் பலவீனப்படுத்துவதாக மட்டுமல்ல முஸ்லிம் மக்களையும் பாதிக்கும் என்று தமிழ் தேசியக் கூட்டமைப்பின் செயலாளரும் யாழ். மாவட்ட எம்.பி.யுமான மாவை சேனாதிராஜா தெரிவித்தார். முஸ்லிம் காங்கிரஸ் கிழக்கு மாகாண சபைத் தேர்தலில் போட்டியிடுவது தொடர்பில் எடுக்கவிருக்கும் முடிவு என்னவென்பது குறித்து முஸ்லிம் மக்கள் இன்று கொந்தளித்துக் கொண்டிருக்கின்றனர். பெரும்பாலான முஸ்லிம் மக்கள் அரசுக்கு ஆதரவை வழங்கக் கூடாது என்ற தமது உள்ளத்துடிப்பை வெளிப்படுத்தி வருகின்றனர் என்றும் அவர் சுட்டிக்காட்டினார்.

கல்முனையிலுள்ள விளையாட்டுக் கழக உறுப்பினர்களுடனான சந்திப்பொன்றின் போது அவர் மேற்கண்டவாறு கூறினார்.

நற்பிட்டிமுனை மணற்சேனையிலுள்ள தமிழ்த் தேசியக் கூட்டமைப்பின் அம்பாறை மாவட்ட அலுவலகத்தில் நேற்று முன்தினம் மாலை நடைபெற்ற இந்நிகழ்வில் அவர் தொடர்ந்தும் கூறியதாவது :

அரசாங்கம் திட்டமிட்ட முறையில் கிழக்கு மாகாண முதலமைச்சரிடமிருந்து எழுத்து மூலம் ஒப்புதல் பெற்றுக்கொண்டு முன் கூட்டியே மாகாண சபையைக் கலைத்து தேர்தலை நடத்தவுள்ளது.

நாட்டில் பேரினவாத சக்திகளுக்கு எதிராகப் போராடிவரும் சிறுபான்மை இனங்களை சீர்குலைத்து விடுவதற்கும், இச்சிறுபான்மை சமூகங்களுக்குப் பிரச்சினைகளே இல்லை என சர்வதேசத்திற்குக் காட்டவும் அரசாங்கம் இம் மாகாண சபைத் தேர்தலை நடத்துகின்றது.

எனவே சிறுபான்மை சமூகங்களான தமிழ், முஸ்லிம் மக்கள் மிக விழிப்புடன் இத் தேர்தலை அணுக வேண்டிய அவசியமுள்ளது.

வடகிழக்கு தமிழர் பிரதேசத்தில் அவர்களுக்கென்று தாயகம், அடிப்படை ஜனநாயக உரிமைகள், மத சுதந்திரம் இருப்பதை இல்லாமல் செய்து விட்டால் இந்நாட்டில் இனப்பிரச்சினையே இல்லை. இவர்களுக்கு அரசியல் பிரச்சினை இல்லை என உலகுக்குக் காட்டுவதற்காக அரசும், அதன் பேரினவாதமும் செயற்பட்டுக் கொண்டிருக்கின்றது.

இதே பேரினவாத அரசு நம் சகோதர இனமான முஸ்லிம் மக்களையும் நசுக்கி அவர்களுக்கும் அநீதி இழைத்து வருகின்றது. தமிழ் மக்கள் வடக்கு கிழக்கில் எதிர்நோக்கி வரும் நில ஆக்கிரமிப்பு, அடக்குமுறை, திட்டமிட்ட குடியேற்றம் போன்ற ஒடுக்கு முறைகள் , முஸ்லிம் மக்கள் மீதும் திணிக்கப்பட்டு வருகின்றன. இத்தகைய சூழ்நிலையில் தான் வஞ்சக நோக்கு கொண்ட கிழக்கு மாகாண சபைத் தேர்தல் நம் முன்வந்துள்ளது.

முஸ்லிம் காங்கிரஸ்

கிழக்கு மாகாண சபைத் தேர்தலில் முஸ்லிம் மக்களின் பெரும்பாலானோர் அரசுக்கு ஆதரவு வழங்கக்கூடாது என்ற தமது உள்ளத்துடிப்பை வெளிப்படுத்தி வருகின்றனர்.

தேர்தல் எப்படி முடியுமென்பது வேறு, ஆனால் முஸ்லிம் காங்கிரஸ் அரசு பக்கம் போய் இத்தேர்தலில் அரசை ஆதரித்தால் தமிழ் மக்களைப் பலவீனப்படுத்துவதாக மட்டுமல்ல, முஸ்லிம் மக்களையும் அது பலவீனப்படுத்துவதாகவே அது அமையும்.

முஸ்லிம் மக்களின் அரசியல் அபிலாஷைகளைக் கொண்டு ஆரம்பிக்கப்பட்ட முஸ்லிம் காங்கிரஸ் பலமாக இருக்க வேண்டுமென்பதே எமது நிலைப்பாடாகும்.

அவர்கள் அரசை இத்தேர்தலில் ஆதரிப்பதன் மூலம் முஸ்லிம் காங்கிரசையும், முஸ்லிம் மக்களின் பலத்தையும் ,பலவீனப்படுத்துவது மட்டுமன்றி தமிழ் மக்களின் பலத்தையும் பலவீனப்படுத்துவதாகவே அமையுமெனக் கருத வேண்டியுள்ளது.

முஸ்லிம் மக்கள் இன்று கொந்தளித்துக் கொண்டிருக்கின்றனர். முஸ்லிம் காங்கிரஸ் அரசை ஆதரித்தால், முஸ்லிம் காங்கிரசுக்கு ஆதரவாக இருந்தவர்களே தமிழ்த் தேசியக் கூட்டமைப்பு வேட்பாளர்களை ஆதரிக்க வேண்டுமென்ற கருத்தையும் பகிரங்கமாக வெளிப்படுத்தி வருகின்றனர்.

எனவே முஸ்லிம் காங்கிரஸ் நிதானமாகத் தீர்மானத்தை எடுப்பதுடன், தமிழ் மக்களோடு செயற்படத்தக்கக் கூடியதாகவும், இத்தகைய தேர்தல் சந்தர்ப்பங்களில் கூட இந்த அரசுக்கு நாம் எதிர்ப்பைக் காட்டக் கூடிய நிலைப்பாட்டையும் எடுக்க வேண்டும்.

முஸ்லிம்களும், தமிழர்களும் தம் இலட்சியத்தை நோக்கி வெற்றி பெற இவை சந்தர்ப்பமாக அமையும்.

மக்கள் திடம்

அரசாங்கம் இன்று தமிழ் மக்கள் தோல்வி கண்டவர்களென்ற சித்தாந்தத்தைக் கொண்டுள்ள போதும் எமது மக்கள் ஜனாதிபதித் தேர்தல் தொடக்கம் நடந்து முடிந்த உள்ளூராட்சித் தேர்தல் வரை தமிழ்த் தேசியக் கூட்டமைப்பின் பின்னால் அணி திரண்டு, எம் போராட்டம் நலிந்து விடவில்லை, முற்றுப் பெறவில்லை, நாம் தோல்வி கண்டவர்களல்லவென்ற செய்தியை உரத்துக் கூறியுள்ளனர்.

ஐ.நா.பேரவை

தமிழ் பேசும் மக்களின் ஒற்றுமை காரணமாகவே சர்வதேசத்தின் முன்னால் அரசு குற்றவாளிக் கூண்டில் நின்று கொண்டிருக்கின்றது.

எம் மக்கள் எங்கிருந்து அகதிகளாக வெளியேறினார்களோ, அங்கு குடியேற்றப்பட வேண்டும். இராணுவம் தமிழ் மண்ணை விட்டும் வெளியேற வேண்டும். கொல்லப்பட்ட, காணாமல் போனவர்கள் பற்றி பொறுப்புக் கூற வேண்டும் என்பன ஐ.நா. மனித உரிமைப் பேரவையினால் அரசுக்கு விடுக்கப்பட்டுள்ள தீர்மானங்களாகவுள்ளதுடன் இனப்பிரச்சினைக்கான தீர்வு காணப்பட வேண்டுமெனவும் வலியுறுத்தப்பட்டுள்ளது.

இதனடிப்படையில் உலகில் இராஜதந்திரப் போர் நடந்து கொண்டிருக்கின்றது. அரசு ஏமாற்றி விட முடியாது. நாம் விழிப்பாகவும், அமைதியாகவுமிருந்து நம் செய்திகளை உலகிற்குச் சொல்லிக் கொண்டிருக்க வேண்டும்.

செப்டெம்பர், ஒக்டோபர் மாதங்களில் ஐ.நா. மனித உரிமைப் பேரவையில் மீண்டும் ஆய்வு நடக்கவிருக்கின்றது. ஏமாற்றப்பட்டால் அடுத்த வருடம் மார்ச் மாதத்தில் தற்போதைய தீர்மானங்களை விடவும் மிகத் தீவிரமான தீர்மானங்களை அரசுக்கு எதிராகப் பேரவை எடுக்கும்.

இதற்காக நாம் சும்மா இருந்துவிடக்கூடாது, தமிழ் மக்கள் தெளிவாக திடமாக வெற்றி பெறும் வகையில் செய்திகளைச் சர்வதேசத்திற்குச் சொல்லிக் கொண்டிருக்க வேண்டும்.

இதற்கு மாகாண சபைத் தேர்தலை நாம் வாய்ப்பாகப் பயன்படுத்த வேண்டும். சுதந்திர ஆட்சி உரிமை, விடுதலை நாம் பெற வேண்டும். இதற்கு எமது இளைஞர்கள் ஒத்துழைக்க வேண்டும். இத்தேர்தலில் தமிழ்த் தேசியக் கூட்டமைப்பு வேட்பாளர்கள் அமோகமாக வெற்றி பெற வைப்பதோடு நம் மக்கள் வாக்குகளை அளிப்பதையும் உறுதிப்படுத்த வேண்டும்.

இணைந்த மாகாணத்தில் வாழ வேண்டும். நம்மை நாம் ஆள வேண்டுமென்ற அடிப்படைக் கொள்கையை வெற்றி பெறச் செய்வோம்' என்றார். _