மீண்டும் தமிழீழ குத்துக்கரணம்

ஜெயலலிதா, சீமான், வைகோ போன்றவர்களுக்கு பிழைப்பை ஏற்படுத்திய கருணாநிதி

டெசோ மாநாட்டில் தனி ஈழம் குறித்த தீர்மானம் நிறைவேற்ற உத்தேசமில்லை,'' என, தி.மு.க., தலைவர் கருணாநிதி நேற்று திடீரென அறிவித்தார். மேலும், ""ஆயுதப் போராட்டத்தையும் விரும்பவில்லை,'' என்றும் திட்டவட்டமாக தெரிவித்தார். இலங்கைத் தமிழர்களுக்கு தனி ஈழம் அமைத்துத் தருவதற்காக, "தமிழ் ஈழ ஆதரவாளர் அமைப்பை' கருணாநிதி மீண்டும் துவங்கினார். இந்த அமைப்பின் மாநாடு, ஆகஸ்ட் 12ம் தேதி சென்னையில் நடத்தவும் திட்டமிட்டு, அதற்கான பணிகளை தி.மு.க., முடுக்கிவிட்டுள்ளது. இந்நிலையில், விடுதலைப்புலிகள் மீதான தடையை மத்திய அரசு நீட்டித்ததோடு, புலிகள் ஆதரவு சக்திகள் தமிழகத்தில் பலம் பெற்று வருவது கவலையளிப்பதாகவும் தெரிவித்தது.தி.மு.க., நடத்தும், "டெசோ' மாநாட்டிற்கு, பல்வேறு தரப்பில் எதிர் கருத்துகள் எழுந்தன. இந்நிலையில், நேற்று தி.மு.க., தலைவர் கருணாநிதி தன் நீண்ட பேட்டியில், "தனி ஈழ ஆதரவு இல்லை' என்பதை தெளிவுபடுத்தினார்.
 

சென்னையில் கருணாநிதி அளித்த பேட்டி விவரம்

டெசோ மாநாட்டில் தனி ஈழம் பற்றி கருத்து இருக்கிறதே தவிர, அதை இப்போது அழுத்தந் திருத்தமாகச் சொல்லி, அதற்கான கிளர்ச்சிகளை நடத்துவதாக உத்தேசமில்லை. ஏனென்றால், அங்கே நடந்த ஆயுதப் போராட்டத்திற்கு பின், ஆயுதப் போராளிகளை சிங்கள ராணுவம் அழித்து ஒழித்துள்ளது. இந்த நேரத்தில் எஞ்சியுள்ள இலங்கைத் தமிழர்களைப் பாதுகாப்பது, அவர்களின் வாழ்வாதாரங்களை வளப்படுத்துவது, அவர்களுக்கு போரினால் ஏற்பட்ட இன்னல்களைக் களைவது, இவற்றில் எப்படியெல்லாம் நடவடிக்கை எடுக்கலாம் என்பதற்காகத் தான் இந்த மாநாடு கூட்டப்படுகிறது.

அறவழி போராட்டம்

அதில் கலந்து கொள்கிறவர்களின் அறிவுரை, கருத்துரை ஆகியவற்றையும் நாங்கள் முக்கியமாக் கருதி, அவற்றின் அடிப்படையில் அமைதியான முறையில் அறவழியில் நடவடிக்கைகளை மேற்கொள்ளலாம் என்பது தான் இந்த மாநாட்டைநடத்துகிற எங்களுடைய திட்டம்.விடுதலைப்புலிகள் மீதான தடையை அவர்களுக்கு மட்டுமான தடை என, கருத முடியாது. இந்தியாவில், குறிப்பாக தமிழகத்தில், பயங்கரவாதம், ஆயுதப் போராட்டங்கள் நடைபெறக் கூடாது என்பதில் நானும் அழுத்தந் திருத்தமான கருத்து கொண்டவன்.விடுதலைப்புலிகள் மீதான தடை தேவை தானா என்பது குறித்து தமிழக அரசு தான் கவலைப்பட வேண்டும்; இது பற்றி நடவடிக்கை எடுக்க வேண்டியவர்கள் மாநில அரசினர் தான்.போர்க்குற்றங்களை விசாரிக்க வேண்டும் என்பதில் எங்களுக்கு வேறுபட்ட கருத்து கிடையாது.என்னைப் பொருத்தவரை ஆயுதப் போராட்டத்தை விரும்பவில்லை. போராளிகளுடைய ஆயுதங்கள், சிங்களராணுவத்திலே உள்ள ஆயுதங்கள், இந்த இரண்டு பலத்தையும் வைத்துப் பார்த்தால் போராளிகளால் வெல்ல முடியாது.

நெருக்கடி இல்லை

மாநாட்டிற்கு மத்திய அரசின் நெருக்கடி எதுவும் இல்லை. டெசோவிற்கு காங்கிரஸ் ஆதரவில்லை என, ஞானதேசிகன் அவசரப்பட்டு கருத்து சொல்லியிருக்கிறார். ஏன் இந்த மாநாட்டை நடத்துகிறோம் என்பதைப் பற்றி கூட அவர் அறிந்து கொள்ள விரும்பாமல் அறிக்கை வெளியிட்டிருப்பது துரதிருஷ்டம் தான்.சிதம்பரத்துடன் டெசோ பற்றி பேசவில்லை.

நிறைவேறாத ஆசை

என்னுடைய நிறைவேறாத ஆசை, தமிழ் ஈழம் தான் என்று எப்போதும் சொல்வேன். தனி ஈழத்துக்காக போராட்டமோ, கிளர்ச்சிகளோ எதுவும் இப்போது இல்லை. தனி ஈழம் கிடைத்தால், யாரும் வேண்டாமென சொல்ல மாட்டார்கள். தனி ஈழம் என்பதை மாற்ற, எந்த நெருக்கடி கொடுத்தாலும் பயப்பட மாட்டேன்.தனித் தமிழ் ஈழம் என்னுடைய குறிக்கோள் என்று சொல்வதில் நான் தயங்கவில்லை. தனி ஈழம் ஒரு காலத்தில் அமையலாம். டெசோ மாநாட்டிற்கு மறுநாளே தனி ஈழம் அமைந்து விடும் என்று நான் எதிர்பார்க்க வில்லை. எதற்கும் ஒரு கால அவகாசம் வேண்டும். தற்போது நடக்கவுள்ள டெசோ மாநாட்டின் தலைப்பு, "ஈழத் தமிழர் உரிமை பாதுகாப்பு மாநாடு!'இவ்வாறு கருணாநிதி கூறினார்.