டமஸ்கஸ்ஸில் 5ஆவது நாளாகவும் மோதல், நகரெங்கும் புகைமூட்டம்

சிரிய தலைநகர் டமஸ்கஸ்ஸின் பல பகுதிகளிலும் 5 ஆவது நாளாக நேற்றைய தினத்திலும் அரசு படைக்கும் கிளர்ச்சியாளர்களுக்கும் இடையில் கடும் மோதல் இடம்பெற்றுள்ளது. ஜனாதிபதி பஷர் அல் அஸாத்தின் மூன்று முக்கிய பிரமுகர்கள் குண்டு தாக்குதலில் நேற்று முன்தினம் கொல்லப்பட்ட நிலையில் தலைநகரில் மோதல் நீடிக்கிறது. இதில் டமஸ்கஸ்ஸின் பல பகுதிகளில் இருந்தும் புகை மண்டலம் வெளியேறி வருகிறது. அரச படைகள் தலைநகரின் கபூன் மற்றும் பர்சா பகுதிகளில் நேற்றைய தினத்தில் எறிகணை தாக்குதல் நடத்தின. அதேபோன்று அல் மீதான், சாஹிர பகுதிகளில் கடும் மோதல் இடம்பெற்று வருவதோடு மஷ்ரூ டுமார் பகுதியில் பாரிய வெடிப்பு சத்தங்கள் கேட்பதாக சிரியாவுக்கான இணைப்புக் குழு செய்தி வெளியிட்டுள்ளது. இதில் கடந்த புதன்கிழமை நடத்தப்பட்ட குண்டு தாக்குதல் சிரியாவில் மக்கள் எழுச்சி போராட்டம் ஆரம்பமான 16 மாத காலத்தில் அஸாத் அரசுக்கு ஏற்பட்ட பாரிய இழப்பு என கருதப்படுகிறது. இந்த குண்டு தாக்குதலில் பாதுகாப்பு அமைச்சர் ஜெனரல் தாவுத் ரஜா மற்றும் ஜனாதிபதி அஸாத்தின் சகோதரியை மணந்தவரும் அந்நாட்டின் துணை பாதுகாப்பு அமைச்சருமான அஸ்ஸாப் ஷசுகத் மற்றும் நெருக்கடி முகாமை அலுவலக பிரதித் தலைவர் ஜெனரல் ஹஸன் துர்கொமனி ஆகியோர் கொல்லப்பட்டனர்.

இது தவிர இந்த குண்டு தாக்குதலில் சிரிய உள்துறை அமைச்சர் மொஹமட் இப்ராஹிம் அல்ஷா மற்றும் தேசிய பாதுகாப்பு சபையின் தலைவர் ஹிஷாம் இக்கியர் ஆகியோர் காயமடைந்தனர்.

எனினும் இந்த தாக்குதலை நடத்தியவர் யார் மற்றும் தாக்குதல் எவ்வாறு நடத்தப்பட்டது என்பது குறித்து உறுதியான தகவல் வெளியிடப்பட வில்லை. இந்த குண்டு தாக்குதல் குறித்து அந்நாட்டு அரச ஊடகம் எந்த காட்சியையும் வெளியிடவில்லை.

அதேபோன்று ஜனாதிபதி அசாத்தும் இந்த குண்டு தாக்குதலை குறித்து எந்த அறிவிப்பையும் வெளியிடவில்லை என்று ராய்ட்டர் குறிப்பிட்டுள்ளது. ஆனால் புதிய பாதுகாப்பு அமைச்சராக ஜெனரல் பவாத் ஜெஸ்ஸிம் பராஜ் நியமிக்கப்பட்டுள்ளதாக அரச ஊடகச் சேவையான சனா குறிப்பிட்டுள்ளது.

இந்த குண்டு தாக்குதலை நடத்தியதாக கிளர்ச்சியாளர்களின் சுயாதீன சிரிய இராணுவம் பொறுப்பேற்றுள்ளதோடு இஸ்லாமிய படை என்ற மற்றுமொரு குழுவும் இந்த தாக்குதலுக்கு பொறுப்பேற்றுள்ளது.

இதில் டமஸ்கஸ்ஸில் ஆரம்பிக்கப்பட்டுள்ள எரிமலை இராணுவ நடவடிக்கையின் கீழ் இந்த குண்டு தாக்குதல் நடத்தப்பட்டதாக சுயாதீன சிரிய படை கூறியுள்ளது. மேற்படி தேசிய பாதுகாப்பு தலைமையகத்தில் கூட்டம் இடம்பெறுவதற்கு முந்தைய தினமே அங்கு குண்டு வைக்கப்பட்டதாக கிளர்ச்சியாளர்கள் கூறியுள்ளனர். ஆனால் இது தற்கொலை தாக்குதல் என அரச தரப்பில் கூறப்பட்டுள்ளது.

எனினும் இராணுவத்திலிருந்து பிரிந்தோர் மற்றும் ஆயுத மேந்திய சிவிலியன்களைக் கொண்ட அரசுக்கு எதிராக போராடி வரும் சுயாதீனப் படை டமஸ்கஸ்ஸில் விடுதலைக்கான பேராட்டம் ஆரம்பிக்கப்பட்டதாக பிரகடனப்படுத்தப்பட்ட பின்னரே இந்த குண்டு தாக்குதல் இடம்பெற்றமை குறிப்பிடத்தக்கது.

இந்நிலையில் பஷர் அல் அஸாத் கட்டுப்பாட்டை இழந்து வருவதாக அமெரிக்கா குறிப்பிட்டுள்ளது. அரச எதிர்ப்பாளர்கள் மேலும் வலுப்பெற்று வருகிறார்கள். பஷர் அல் அஸாத் கட்டுப்பாட்டை இழந்து வருகிறார் என்று வெள்ளை மாளிகை பேச்சாளர் டொம்மி வைட்டர் தெரிவித்துள்ளார்.

இதேவேளை சிரிய அரசுக்கு அழுத்தம் கொடுக்கும் பாதுகாப்பு சபை தீர்மானத்தின் மீது நேற்று முன்தினம் முன்னெடுக்கப் படவிருந்த வாக்கெடுப்பு ஒரு தினத்திற்கு பிற்போடப்பட்டது. சிரியாவில் கண்காணிப்பு பணியில் ஈடுபட்டிருக்கும் ஐ.நா. கண்காணிப்பாளர்களின் கெடு இன்றுடன் முடிவடையவுள்ளது. இதனை நீடிப்பதற்கு மேற்கு நாடுகள் கொண்டு வந்த தீர்மானத்தின் மீதான வாக்கெடுப்பே. பிற்போடப்பட்டமை குறிப்பிடத்தக்கது.

இதேவேளை நேற்று முன்தினம் இடம்பெற்ற மோதல்களில் நாடுபூராவும் 200 பேரளவில் கொல்லப்பட்டுள்ளதாக லண்டனை மையமாக கொண்டு இயங்கு சிரியா தொடர்பிலான மனித உரிமைகள் காணிப்பகம் குறிப்பிட்டுள்ளது. இதில் 34 பேர் தலைநகர் டமஸ்கஸ்ஸில் கொல்லப்பட்டுள்ளதாக குறிப்பிட்டுள்ளது.