500 ஆண்டு பழைமை வாய்ந்த யாழ். பழைய பூங்கா புதுப் பொலிவுடன் திறந்து வைப்பு

யாழ்ப்பாணம் பழைய பூங்கா வெள்ளிக்கிழமை பொருளாதார அபிவிருத்தி அமைச்சர் பசில் ராஜபக்ஷவினால் திறந்து வைக்கப்பட்டுள்ளது. தமிழரின் வரலாற்றுப் பொக்கிஷமான இந்தப் பூங்கா 500 ஆண்டுகள் பழைமை வாய்ந்தது. கடந்த யுத்த நடவடிக்கையின் போது முற்றாக சிதைவடைந்த இந்தப் பூங்கா புதுப் பொலிவுடன் திறந்துவைக்கப்பட்டது.
யாழ்.  மாவட்ட செயலகத்திற்கு முன்னால் உள்ள பழைய பூங்காவின் கேணியுடன் அண்டிய முன்பகுதி வடமாகாண ஆளுநர் ஜி.ஏ.சந்திரசிறியினால் பொழுது போக்குமையமாக மாற்றப்பட்டு திறந்து வைக்கப்பட்டது. 18 மில்லியன் ரூபா செலவில் இப்பூங்கா புதிதாக அமைக்கப்பட்டுள்ளது.
இதேவேளை, இந்திய அரசாங்கத்தின் நிதியுதவியுடன் யாழ்ப்பாணம் கைதடிப் பகுதியில் புனரமைப்புச் செய்யப்பட்ட பனை ஆராய்ச்சி நிறுவனமும் அமைச்சர் பசில் ராஜபக்ஷ தலைமையிலான குழுவினரால் நேற்று திறந்து வைக்கப்பட்டுள்ளது.

1986 ஆம் ஆண்டு அமைக்கப்பட்ட இந்த பனை ஆராய்ச்சி நிறுவனம் 1995 ஆம் ஆண்டு வரை தனது சேவையை வழங்கி வந்தது. 1995 ஆம் ஆண்டு இடப்பெயர்வைத் தொடர்ந்து இந்நிறுவனம் செயலிழந்தது. தற்போது இந்திய மற்றும் இலங்கை அரசாங்கத்தின் நிதியுதவியுடன் புனரமைப்புச் செய்யப்பட்டு இன்று திறந்து வைக்கப்பட்டுள்ளது.

பனை சார்ந்த உற்பத்திப் பொருட்களை பொருளாதார ரீதியாக முக்கியத்துவம் வாய்ந்த ஒரு துறையாக மாற்றுவதன் மூலம் மொத்த தேசிய உற்பத்தியில் பனையின் பங்களிப்பை அதிகரிப்பதுடன் பனை மூலம் வேலைவாய்ப்பு, சுயதொழில் வாய்ப்பு அந்நியச் செலாவணி என்பவற்றை ஏற்படுத்தி பொருளாதார அபிவிருத்திக்கு பங்களிப்புச் செய்யும் ஒரு துறையாக பனை சார்ந்த துறையை மேற்படுத்துவதன் நோக்கமாகக் கொண்டு இந்த ஆராய்ச்சி நிலையம் திறந்து வைக்கப்பட்டுள்ளது.

இந்த நிகழ்வுகளில் அமைச்சர் டக்ளஸ் தேவானந்தா, இந்திய உயர்ஸ்தானிகர் அசோக் கேகாந்தா, யாழ். மாவட்டக் கட்டளைத் தளபதி மகிந்த ஹத்துருசிங்க, யாழ். பாராளுமன்ற உறுப்பினர் சில்வேஸ்திரி அலன்ரின் மற்றும் யாழ். மாவட்டச் செயலர் சுந்தரம் அருமைநாயகம் ஆகியோர் கலந்துகொண்டனர்.