வாக்குகளை சிதறடிக்காது தமிழ் மக்கள் நிதானமாக செயற்பட வேண்டும்

கிழக்கு மாகாண சபை தேர்தலில் ஸ்ரீ லங்கா முஸ்லிம் காங்கிரஸ் ஆளும்கட்சியை விட்டும் பிரிந்து சென்று தனித்து போட்டியிடுவதை நாம் குறையாக பார்க்க முடியாது என மீள்குடியேற்ற பிரதியமைச்சர் விநாயகமூர்த்தி முரளிதரன் தெரிவித்தார். சனிக்கிழமை 21 ஆம் திகதி மட்டக்களப்பிலுள்ள சுபராஜ் விடுதியில் நடத்திய ஊடகவியலாளர் மாநாட்டின் போதே பிரதியமைச்சர் முரளிதரன் மேற்கண்டவாறு கூறினார். கிழக்கு மாகாண சபை தேர்தலில் மட்டக்களப்பு மாவட்டத்தில் ஆளும் ஐக்கிய மக்கள் சுதந்திர முன்னணியில் போட்டியிடும் ஸ்ரீலங்கா சுதந்திரக் கட்சியின் வேட்பாளர் களை அறிமுகம் செய்யும் இந்த ஊடகவிய லாளர் மாநாட்டில் தொடர்ந்து கருத்து தெரிவித்த பிரதியமைச்சர் விநாயக மூர்த்தி முரளிதரன்; ஸ்ரீலங்கா முஸ்லிம் காங்கிரஸ் தனிக்கட்சி, அவர்களுக்கென்று கொள்கை இருக்கின்றது.

அந்த வகையில் அவர்கள் பிரிந்து சென்று தனியாக போட்டியிடுகின்றனர். அதை நாம் குறையாக கூறமுடியாது. எனினும் கிழக்கு மாகாண சபை தேர்த லின் பின்னர் கிழக்கு மாகாண சபையில் ஸ்ரீலங்கா முஸ்லிம் காங்கிரஸ் அரசுடன் இணைந்து செயற்படும் என்ற நம்பிக்கை எமக்கிருக்கின்றது.

கிழக்கு மாகாண சபைதேர்தலில் விருப்பு வாக்கின் அடிப்படையிலேயே முதமைச்சர் தெரிவு செய்யப்படுவார். கிழக்கு மாகாணம் பல்லின சமூகங்கள் வாழும் மாகாணம் என்பதால் இனத்துவேசமற்ற வகையில் திறமையான தகுதியான முதலமைச்சர் தெரிவு செய்யப்பட வேண்டும்.

எம்மைப்பொறுத்த வரைக்கும் கிழக்கு மாகாண சபை தேர்தலில் நிச்சயம் ஆளும் கட்சி வெற்றி பெறும். அதிகூடிய ஆசனங்களை ஆளும் ஐக்கிய மக்கள் சுதந்திரக் கூட்டமைப்பு பெற்று ஆட்சியமைக்கும்.

மட்டக்களப்பு மாவட்டத்தில் எமது ஆளும் கட்சி 5 ஆசனங்களை பெறும் அந்தவகையில் தமிழ் மக்கள் மிகவும் நிதானமாக வாக்களிக்க வேண்டும.

எமது வாக்கை சிதறடிக்காமல் ஆளும் கட்சிக்கு வாக்களித்து தமிழ்பிரதிநிதிதுவத்தை ஆளும் கட்சியினூடாக தமிழ் மக்கள் உறுதி செய்ய வேண்டும்.

மட்டக்களப்பு மாவட்டத்தில் ஆளும் கட்சிக்கு தமிழ் மக்கள் ஒற்றுமையுடன் ஒன்றுபட்டு வாக்களித்தால் நிச்சயமாக மூன்று தமிழர்களை நாம் ஆளும்கட்சியில் பெற்றுக்கொள்ள முடியும். இந்த சந்தர்ப் பத்தை நாம் சரியாக பயன்படுத்திக் கொள்ள வேண்டும்.

மட்டக்களப்பு மாவட்டத்தில் ஆளும் ஐக்கிய மக்கள் சுதந்திரக் கூட்டமைப்பில் ஸ்ரீலங்கா சுதந்திரக் கட்சி மற்றும் அகில இலங்கை முஸ்லிம் காஙகிரஸ், தமிழ் மக்கள் வீடுதலைப் புலிகள் கட்சி ஆகிய மூன்று கட்சிகளும் போட்டியிடுகின்றன.

நாம் ஸ்ரீலங்கா சுதந்திரக் கட்சியின் சார்பில் தகுதியான, திறமையான வேட்பாளர்களை நிறுத்தியுள்ளோம். அந்தவகையில், கிறிஸ்தவ சமூகத்தை சேர்ந்த ஹன்றி பெர்வோ மற்றும் சமூக சேவையாளர் இராஜன் மயில்வாகனம் 25 வருடங்கள் ஆசிரியராகவும் அதிபராகவுமிருந்து ஸ்ரீலங்கா சுதந்திரக் கட்சியின் மட்டக்களப்பு மாவட்ட மகளிர் பிரிவு தலைவியாக செயற்பட்டு வரும் எனது சகோதரி ருத்மலர் ஞான பாஸ்கரன் ஆகியோரை நாம் எமது கட்சியினூடாக வேட்பாளர்களாக நிறுத்தியுள்ளோம். அந்த வகையில் மட்டக்களப்பு மாவட்ட தமிழ் மக்கள் இம் மூவரையும் ஆதரிக்க வேண்டும்.

ஜனாதிபத மஹிந்த ராஜபக்ஷவின் தலைமைத்துவத்தின் கீழ் அவரின் வழி காட்டலில் சிறந்த முறையில் மட்டக்களப்பு மாவட்டத்திற்கு பல்வேறு அபிவிருத்தி வேலைத் திட்டங்களை மேற்கொண்டு வருகின்றோம். மட்டக்களப்பு மாவட்டத்தில் 60000 க்கு மேற்பட்ட மில்லியன் ரூபா பணங்களை செலவளித்து மாவட்ட அபிவிருத்தி நடவடிக்கைகள் மேற்கொள்ளப்படடுள்ளன.

விவசாயம், கைத்தொழில், வாழவாதாரம், சுகாதாரம், கல்வி என்பன அபிவிருத்தி செய்யப்பட்டுள்ளதுடன் தொடர்ந்து அபிவிருத்தி செய்யப்பட்டு வருகின்றன.

மட்டக்களப்பு மாவட்டத்தில் 3000 பட்ட தாரிகளுக்கு அரச தொழில் நியமனங்கள் வழங்கப்பட்டுள்ளன. மீன்பிடி துறை இன்று அபிவிருத்தி கண்டுள்ளது.

எனவே தான் எதிர்காலத்திலும் நாம் ஆளும் கட்சியை ஆதரிப்பதன் மூலம்சிறந்த அபிவிருத்தியை மேற்கொள்ள முடியும்.

எதிர்வரும் கிழக்கு மாகாண சபை தேர்தல் வன்முறையற்ற ஜனநாயக சுதந்திரமான தேர்தலாக அமையவுள்ளது

இந்த தேர்தலை தமிழ் மக்கள் முழுமை யாக பயன்படுத்தி ஆளும் ஐக்கிய மக்கள் சுதந்திர முன்னணியையும் அதில் போட்டியிடும் எமது ஸ்ரீலங்கா சுதந்திரக் கட்சி வேட்பாளர்கள் மூவரையும் ஆதரித்து வெற்றி பெறச் செய்ய வேண்டும் என அவர் மேலும் இங்கு தெரிவித்தார்.