சிரிய அரச படையின் தாக்குதலை தவிர்க்க கிளர்ச்சியாளர்கள் ஆயுத கோரிக்கை

சிரிய அரச படை அந்நாட்டின் மிகப்பெரிய நகரான அல்ப்போ மீது கடும் தாக்குதல் நடத்தி வரும் நிலையில் சிரிய எதிர்ப்பாளர்களின் தேசிய கவுன்ஸில் கிளர்ச்சியாளர்களுக்கு ஆயுதம் வழங்கும்படி சர்வதேச நாடுகளை கோரியுள்ளது. ஜனாதிபதி பஷர் அல் அஸாத் படுகொலை ஒன்றுக்கு முயற்சிப்பதாகவும் எனவே அலப்போவில் ரத்த ஆறு ஓடுவதை தவிர்க்குமாறும் சிரிய தேசிய கவுன்ஸிலின் தலைவர் அப்துல் பாசித் செய்தா எச்சரித்துள்ளார். ‘ஜெட் விமானங்கள் மற்றும் டாங்கர்களின் தாக்குதலை தடுக்க எமக்கு ஆயுதம் வேண்டும். தற்போது எமக்கு அதுதான் தேவை’ என்று செய்தா ஏ. எப். பி. செய்திச் சேவைக்கு குறிப்பிட்டுள்ளார்.

அதேபோன்று அரபு சகோதரர்கள் மற்றும் நண்பர்கள் சுயாதீன சிரிய படைக்கு ஆதரவளிக்கும் படியும் அவர் அழுத்தம் கொடுத்தார். சிரிய அரசுக்கு எதிராக போராடிவரும் கிளர்ச்சியாளர்களுக்கு சர்வதேச நாடுகள் தற்போது நேரடியாக எந்த ஆயுத உதவியும் வழங்கவில்லை என்பது குறிப்பிடத்தக்கது.

எனினும் கிளர்ச்சியாளர்களின் சுயாதீனப் படைக்கு சம்பளம் வழங்கும் திட்டத்தை வளைகுடா நாடுகள் கடந்த ஏப்ரலில் கொண்டுவந்தது. அந்த நிதி கறுப்பு சந்தையில் ஆயுதம் வாங்க உதவும் என விமர்சனங்கள் எழுந்தன. இந்நிலையில் யெமனின் அமைதி முயற்சி சிரியாவில் கைகூடாது என செய்தா குறிப்பிட்டுள்ளார்.

யெமன் ஜனாதிபதி அலி அப்துல்லா சலாவுக்கு பொதுமன்னிப்பு வழங்கி அவரை பதவியிலிருந்து அகற்றியது போல் சிரியாவில் செய்ய முடியாது. இங்கு படுகொலை முயற்சிகள் இடம்பெறுகின்றன. பஷர் அல் அஸாத் அதற்கு திட்டமிட்டு வருகிறார். அவர் ஒரு குற்றாவளி. அவருக்கு அடைக்கலம் அளிக்கக்கூடாது என்றும் செய்தா குறிப்பிட்டார்.

சிரிய எதிர்ப்பாளர்களின் தேசிய கவுன்ஸில் ஏற்கனவே சிரியாவில் இடைக்கால அரசொன்றை அமைக்கும் திட்டத்திற்கு ஒப்புதல் அளித்திருந்தது. இந்நிலையில் இது குறித்து பேச்சுவார்த்தை நடத்தி வருவதாக அதன் தலைவர் செய்தா குறிப்பிட்டுள்ளார்.

இதேவேளை சிரியாவின் வர்த்தக நகரின் மீது அரச படைகள் குவிக்கப்பட்டுள்ளது குறித்து அவதானமாக இருப்பதாக ஐ. நா. விசேட தூதுவர் கொபி அனான் குறிப்பிட்டுள்ளார். இந்த இராணுவ குவிப்பானது சர்வதேச நாடுகள் ஒன்றிணைந்து சிரியாவுக்கு அழுத்தம் கொடுப்பதற்கான நிர்ப்பந்தத்தையே காட்டுகிறது.

சிரய இராணுவ யுத்த டாங்கிககள் அலப்போ நகரின் தென்மேற்கு பகுதியை நோக்கி நகர்ந்துவருவதாக செயற்பட்டாளர்கள் சனிக்கிழமை குறிப்பிட்டிருந்தனர். இங்கு கிளர்ச்சியாளர் பகுதிக்கு நாள் முழுவதும் தொடர்ந்து தாக்குதல் நடத்தப்படுவதோடு இராணுவ விமானங்கள் தாழ்வாக பறந்து தாக்குதல்களை நடத்துகின்றன என்று செயற்பாட்டாளர்கள் கூறியுள்ளனர்.

கடந்த சனிக்கிழமை அலப்போ நகரின் சலாஹுத்தீன் மற்றும் ஹம்தனியா பகுதிகளில் வன்முறைகள் பதிவாகியுள்ளன. எனினும் அங்கு கிளர்ச்சியாளர்களே தொடர்ந்து ஆதிக்கம் செலுத்தி வருகின்றனர். மூன்று மில்லியன் மக்கள் வசிக்கும் அலப்போ நகரின் மூன்றிலிருந்து மூன்றரைப் பங்கு பகுதி கிளர்ச்சியாளர்களின் கட்டுப்பாட்டில் உள்ளது. குறிப்பாக நகரின் வட கிழக்கு மற்றும் தென்மேற்கு பகுதிகளில் கிளர்ச்சியாளர்களே அதிக்கம் செலுத்துகின்றனர்.

எனினும் அலப்போவில் சிரிய இராணுவத்தின் தாக்குதலில் பல கிளர்ச்சியாளர்கள் கொல்லப்படுவதை தாம் கண்டதாக அங்கிருக்கும் பி. பி. சி. செய்தியாளர் குறிப்பிட்டுள்ளார். கிளர்ச்சியாளர்கள் போதிய ஆயுதங்கள் இன்றி இருப்பதாக பி. பி. சி. செய்தியாளர் குறிப்பிட்டுள்ளார். அத்துடன் அலப்போ நகரில் இருந்து ஆயிரக்கணக்கானோர் தொடர்ந்து வெளியேறிவ வருகின்றனர்.

சிரிய தலைநகர் டமஸ்கஸ்ஸை கைப்பற்றும் முயற்சியில் தோல்வியடைந்த கிளர்ச்சியாளர்கள் தமது தீவிரவாத செயற்பாடுகளுக்காக அலப்போ நகரை கைப்பற்றும் முயற்சியில் ஈடுபட்டிருப்பதாக சிரிய அரசு தொலைக்காட்சி செய்தி வெளியிட்டுள்ளது. அதேபோன்று அரச பத்திரிகையான அல்வதான் வெளியிட்டுள்ள செய்தியில் அலப்போ மோதல் அனைத்தையும் விட பிரதானமானது என குறிப்பிட்டுள்ளது

இந்நிலையில் ரஷ்ய வெளியுறவு அமைச்சர் செர்கி லவ்ரொவ் நேற்று முன்தினம் ஊடகங்களுக்கு கூறியதாவது, அலப்போவில் சோகம் தொடரும் நிலையில் ஆயுதம் ஏந்திய எதிர்ப்பாளர்களை சிரிய அரசு ஏற்கும் என எதிர்பார்ப்பது யதார்த்தமானது அல்ல என கூறியுள்ளார். எனினும் சிரிய ஜனாதிபதி பஷர் அல் அஸாத்திற்கு அடைக்கலம் வழங்குவது குறித்து ரஷ்ய அரசு ஆலோசிக்கவில்லை என லவ்ரொவ் குறிப்பிட்டார்.

சிரியாவில் கடந்த இரு வாரங்களுக்கு மேலாக கிளர்ச்சியாளர்கள் நாட்டின் பல பகுதிகளிலும் தாக்குதல்களை நடத்தி முன்னேறி வருகின்றமை குறிப்பிடத்தக்கது. கடந்த ஜுலை 18 ஆம் திகதி தலைநகர் டமஸ்கஸ்ஸில் உள்ள பாதுகாப்பு தலைமையகத்தின் மீது கிளர்ச்சியாளர்கள் நடத்திய குண்டு தாக்குதலில் சிரிய அரசின் சிரேஷ்ட அதிகாரிகள் நால்வர் கொல்லப்பட்டனர்.

தொடர்ந்து சிரிய சுயாதீனப் படை தலைநகர் டமஸ்கஸ்ஸின் பல பகுதிகளை தமது ஆதிக்கத்தின் கீழ் கொண்டுவந்தனர். எனினும் சிரிய இராணுவம் தலைநகரில் இருந்து கிளர்ச்சியாளர்களை பின்வாங்கச் செய்தனர். மறுப்புறத்தில் சிரியாவின் பல எல்லை முகாம்களையும் கைப்பற்றியதாக கிளர்ச்சியாளர்கள் அறிவித்தனர். துருக்கி, ஈராக் எல்லையின் பெரும் பகுதியை கைப்பற்றியதாக கிளர்ச்சியாளர்க அறிவித்தனர்.

இதனிடையே அயல் நாடான ஜோர்தான் சிரிய அகதிகளுக்கான தற்காலிக முகாம்களை அமைத்துள்ளது. ஜோர்தான் அரசினால் அமைக்கப்பட்டுள்ள சாதரி முகாமில் 10 ஆயிரம் அகதிகள் தங்க முடியும் என்று ஐ.நாவின் அகதிகளுக்கான நிலையம் கூறியுள்ளது. எனினும் இந்தமுகாமில் ஒரு இலட்சம் அகதிகள் தங்க வசதிசெய்யப்பட்டிருப்பதகா கூறப்பட்டுள்ளது.

ஏற்கனவே சிரியாவில் இருந்து 15000 அகதிகள் ஜோர்தானில் தஞ்சம் புகுந்துள்ளனர். சிரியாவில் கடந்த 2011 மார்ச்சில் ஆரம்பமான மக்கள் எழுச்சி போராட்டத்தைத் தொடர்ந்து அங்கு இதுவரை 20,000 பேரளவில் கொல்லப்பட்டிருப்பதாக சிரியா தொடர்பில் கண்காணிப்பு பணியில் ஈடுபட்டிருக்கும் அமைப்பு கூறியுள்ளது.