கூட்டமைப்பு தெரிவுக்குழுவை பகிஷ்கரிப்பது

தமிழ் மக்களுக்கு இழைக்கும் மிகப்பெரிய துரோகம் - அமைச்சர் வாசுதேவ நாணயக்கார

பாராளுமன்றத் தெரிவுக்குழுவை பகிஷ்கரிக்க கூட்டமைப்பு எடுத்த தீர்மானம் அவர்களை நம்பி வாக்களித்த தமிழ் மக்களுக்கு இழைக்கும் மிகப் பெரிய துரோகமாகுமென தேசிய மொழிகள் மற்றும் சமூக ஒருமைப்பாட்டு அமைச்சர் வாசுதேவ நாணயக்கார தெரிவித்தார். தெரிவுக்குழுவுக்கு சமுகமளிக்காமை மூலம் பாராளுமன்ற உறுப்பினர்கள் தமது பொறுப்புகளிலிருந்து விலகி நடப்பதாகவும் அவர் குறிப்பிட்டார். நியமிக்கப்பட்டிருக்கும் தெரிவுக்குழு பாராளுமன்ற விதிமுறைகளுக்குட்பட்ட தொன்றே தவிர அரசாங்கத்தின் செயற்பாடல்ல என்பதனை கூட்டமைப்பின் எம். பிக்கள் புரிந்துகொள்ள தவறியி ருப்பதாகவும் அமைச்சர் வாசுதேவ சுட்டிக்காட்டினார். பாராளுமன்றத் தெரிவுக்குழுவை மறுக்கும் இவர்கள் எதற்காக பாராளு மன்றத்திற்கு மட்டும் சமுகமளிக்க வேண்டுமெனவும் அமைச்சர் கேள்வியெழுப்பியுள்ளார். இருப்பினும், அரசாங்கம் என்ற வகையில் நாம் தொடர்ந்தும் தமிழ் தேசியக் கூட்டமைப்பினருடன் இது குறித்து பேச்சு நடத்தி அவர்களை பாராளுமன்றத் தெரிவுக் குழுவில் அங்கம் வகிப்பதற்காகத் தொடர்ந்தும் தூண்டுதல்களை விடுத்து கொண்டேயிருப் போமெனத் தெரிவித்த அமைச்சர், இறுதித் தறுவாயிலாயினும் கூட்டமைப்பின் பிரதிநிதிகள் தெரிவுக்குழுவுக்கு சமுக மளிப்பதே சிறப்பானதாக அமையுமெனவும் குறிப்பிட்டார்.

தேசிய மொழிகள் மற்றும் சமூக ஒருமைப்பாட்டு அமைச்சில் நேற்று நடைபெற்ற செய்தியாளர் மாநாட்டில் ஊடகவியலாளர்களின் கேள்விகளுக்கு பதிலளிக்குகையிலேயே அமைச்சர் மேற்கண்ட விளக்கத்தையளித்தார்.

கூட்டமைப்பு எம். பி. க்கள் தெரிவுக் குழுவுக்கு சமுகமளிக்காவிடினும் அதன் செயற்பாடுகள் தொடர்ந்தும் முன்னெடுக் கப்படுமென்பதில் ஜயமில்லை. இருந் தாலும், கூட்டமைப்பினர் தமது கருத்துக்களை முன்வைக்க கிடைத்த அரிய சந்தர்ப்பத்தை வீணாக தவறவிடு கின்றனர் என்றே கூற வேண்டும்.

தமிழ் மக்களின் வாக்குகளால் பாராளுமன்றத்தின் பிரதிநிதிகளாகத் தெரிவு செய்யப்பட்டுள்ள கூட்டமைப்பு எம் பிக்கள் பாராளுமன்றத்தின் அனைத்துச் செயற்பாடுகள் மற்றும் ஒழுங்குவிதி முறைகளுக்கும் கட்டுப்பட்டவர்கள்.

அரசியலமைப்பு மறுசீரமைப்பு தொடர்பில் ஆராய்வதற்காகவே சபாநாயகரினால் தெரிவுக்குழு நியமிக்கப்பட்டுள்ளது. இது பாராளுமன்ற நடைமுறைகளுக் குட்பட்டதொரு செயற்பாடே தவிர அரசாங்கத்தின் செயற்பாடல்ல என்பதனை அவர்கள் புரிந்துகொள்ள வேண்டும். கூட்டமைப்பினரின் நிலைப்பாட்டினை பாராளுமன்ற அமர்வுகளின் போது நாட்டு மக்களுக்காக அறிவிக்க முடியு மாகவிருந்தால், தெரிவுக் குழுவில் கலந்துகொண்டு தமது நிலைப்பாட்டினை அரசாங்கத்துக்கும் நாட்டு மக்களுக்கும் தெரிவிக்க முடியுமே எனவும் அமைச்சர் கூறினார்.

மேலும் பாராளுமன்றத்தின் கணக்கு விவரம் குழுவுக்கு சமுகமளிக்கும் கூட்டமைப்பினர் தெரிவுக் குழுவுக்கு சமுகமளிக்காமை தங்களுக்குள்ள பொறுப்புக்களிலிருந்து விலகி நடப்பதாகவும் அமைச்சர் குறிப்பிட்டார்.

தெரிவுக் குழுவில் அங்கம் வகித்ததன் பின்னர் கூட்டமைப்பினர் தமது நிலைப்பாட்டினை எவ்வகையிலாவது வெளிப்படுத்த முடியுமெனவும் அமைச்சர் இதன்போது தெரிவித்தார்.

ஊடகவியலாளர் மாநாட்டில் செய்தி யாளர்களின் கேள்விகளுக்குத் தொடர்ந்தும் பதிலளிக்கையில், அமைச்சர் வாசுதேவ, பாராளுமன்ற தெரிவுக் குழுவுக்கு அமைச்சர் திஸ்ஸ விதாரண மற்றும் அமைச்சர் ரவூப் ஹக்கீம் ஆகியோருக்கும் அழைப்பு விடுத்திருக்கலாமென்பதே தனது தனிப்பட்ட கருத்தெனவும் கூறினார். ஏகாதிபத்தியத்திற்கு எதிர்ப்புத் தெரிவிக்கும் நான் ஒரு ஜனநாயகவாதியெனக் குறிப்பிட்ட அமைச்சர், நாட்டில் பிரிவினை வாதம் தோன்றாமல் இருப்பதற்கு மாகாண சபைகள் முறைமை அவசிய மென்பதையும் வலியுறுத்தினார்.

மேலும் மாகாண சபைகள் முறைமை முற்றாக இல்லாதொழிப்பதனை நான் ஏற்க மறுக்கிறேன் எனவும் கூறிய அமைச்சர் அதிக மக்களை பிரதிநிதித் துவப்படுத்தும் முக்கிய கட்சிகள் மாகாணசபை முறைமைக்கு பாரிய எதிர்ப்பைத் தெரிவித்திருக்கவில்லையெனவும் குறிப்பிட்டார்.

அத்துடன் அரசியலமைப்பின் 13வது திருத்தம் குறித்து இந்திய அரசாங்கத்திடம் இருந்து எவ்வித அழுத்தங்களும் இலங்கை அரசாங்கத்திற்கு இல்லை. தமிழ் தேசியக் கூட்டமைப்பினர் சம்பந்தப்பட்டவர்களுடன் உள்நாட்டில் பேச்சு நடத்துவதனை விடுத்து இந்தியாவின் மத்திய அரசாங்கத் திடம் பேச்சு நடத்தி திரும்பியுள்ளனர்.

மோதல் காலத்தில் இலங்கை அரசாங்கத்திற்கு பூரணமான ஒத்துழைப்பை வழங்கி பக்கபலமாகவிருந்த இந்திய அரசாங்கம், உள்நாட்டு விவகாரங்களை ஏதேனுமொரு வழியில் தீர்த்துக் கொள்ளுங்கள் என்றே கூட்டமைப்பினருக்கு பதிலளித்துள்ளதே தவிர இலங்கை அரசாங்கத்துக்கு எந்தவொரு அழுத்தத்தையும் முன்வைக்க வில்லையெனவும் தெரிவித்தார்.