13வது திருத்தச் சட்டத்தை பலவீனப்படுத்த இடமளியோம் இணக்கப்பாட்டு அரசியலினூடாகவே பிரச்சினைகளுக்கு தீர்வு

மத்தியில் கூட்டாட்சி மாநிலத்தில் சுயாட்சி என்ற இலட்சியத்துடன் ஈழமக்கள் ஜனநாயக கட்சி செயற்பட்டு வருகிறது. கடந்த 20 ஆண்டுகாலமாக நாம் கடைப்பிடித்து வரும் இணக்க அரசியல் கோட்பாட்டின் மூலம் பல விடயங்களை சாதித்துள்ளோம். வடக்கிற்கு ஒரு மாகாணசபை தேவை என்ற எமது நீண்டகால கனவு நிறைவேற இருப்பது குறித்து நாம் பெருமகிழ்ச்சி அடைந்துள்ளோம் என இந்த சந்தர்ப்பத்தை தமிழ் மக்கள் சாதகமாக பயன்படுத்திக் கொள்ள வேண்டும் என கட்சியின் செயலாளர் நாயகமும், பாரம்பரிய கைத்தொழில் மற்றும் சிறு கைத்தொழில் முயற்சி அபிவிருத்தி அமைச்சருமான டக்ளஸ் தேவானந்தா தெரிவித்தார்.

சிரேஷ்ட தமிழ் ஊடகவியலாளர்களை கொழும்பில் சந்தித்த அமைச்சர், நாம் அநாவசியமாக பிரச்சினைகளை உருவாக்குவதை தவிர்த்துக் கொண்டு அவதானமான முறையில் அரசியலை நடத்தி வருகின்றோம் எனத் தெரிவித்தார்.

நாம் ஒவ்வொரு செயற்பாட்டினையும் தீவிரமாக சிந்தித்த பின்னரே நடைமுறைப்படுத்துகின்றோம் என்று தெரிவித்த அமைச்சர் டக்ளஸ் தேவானந்தா, சாண் ஏற முழம் சறுக்கும் என்பார்கள் ஆனால் எமது முயற்சிகள் முழம் ஏற சாண் மட்டுமே சறுக்குகிறது. இதன் மூலம் எமது மக்களுடைய பிரச்சினைகளை நாம் தீர்த்து வைப்பதில் வெற்றி கண்டுள்ளோம் என்று கூறினார்.

எதிர்வரும் வடமாகாணசபைத் தேர்தலில் எமது கட்சி போட்டியிடும் என்று தெரிவித்த அமைச்சர், யார் முதலமைச்சர் பதவிக்கான வேட்பாளராக நியமிக்கப்படுவார் என்பதை நாம் சரியான சந்தர்ப்பத்தில் அறிவிப்போம் என்று கூறினார்.

மாகாணசபை மூலம்தான் நாம் தமிழ் மக்களின் அபிலாஷைகளை நிறைவேற்றி அவர்களின் தேவைகளை தீர்த்துவைக்க முடியுமென்பது எமது நீண்டகால கனவாகும். எங்கள் மக்களின் பிரச்சினையை நாம் தான் தீர்த்து வைக்க வேண்டுமே ஒழிய, எமது பிரச்சி னைகளை தீர்த்து வைக்க மற்றவர்கள் உதவி செய்வார்கள் என்று எதிர்பார்க்க முடியாது. ஆகவே, எமது இந்த இலட்சி யக்கனவை நிறைவேற்றுவதற்கு மக்களின் பூரண ஆதரவு எமக்கு அவசியம் என்று அமைச்சர் தேவானந்தா மேலும் தெரிவித்தார்.

எதிர்வரும் மாகாணசபைத் தேர்தலில் போட்டியிட இருக்கும் நாம் நிச்சயம் வெற்றி பெருவோம் என்ற நம்பிக்கை எமக்கு இருக்கிறது. அதன் மூலம் வட மாகாண சபையின் அதிகாரத்தை கைப் பற்றினால் இன்னும் 3 முதல் 5 வருடங் களில் வடமாகாணத்தை வளம்மிக்க மாகாணமாக மாற்றி அதனை தேனும் பாலும் ஊற்றெடுக்கும் ஒரு புண்ணிய பூமியாக மாற்றிவிட முடியுமென்ற அசையாத நம்பிக்கை எனக்கு இருக்கிற தென்று அமைச்சர் தேவானந்தா உறுதியாக அறிவித்தார். எமக்கு ஜனாதிபதி மஹிந்த ராஜபக்ஷ அவர்கள் மீது அசைக்க முடியாத நம்பிக்கை இருக்கிறது என்று தெரிவித்த அமைச்சர், ஜனாதிபதி அவர்கள் ஒரு தடவை “டக்ளஸ் உங்களுக்கு என்ன வேண்டுமென்றாலும் என்னிடம் தாராளமாக கேளுங்கள், நான் உங்கள் சகல கோரிக்கைகளையும் நிறைவேற்றத் தயாராக இருக்கிறேன்” என்று தமக்கு வாக்குறுதி அளித்தாக கூறினார்.

ஜனாதிபதி அவர்கள் ஒரு உன்னதமான தலைவர். அவர் தமிழ் மக்கள் சுதந்திர மாகவும், கெளரவமாகவும் தங்கள் சொந் தப் பிரதேசத்தில் நிம்மதியாக வாழ்வதற்கு வாய்ப்பளிக்கும் உன்னத இலட்சியத்துடன் வடமாகாணசபைத் தேர்தலை நடத்துவ தென்று எடுத்த முடிவை நாம் மனமார பாராட்டுகிறோம் என்றும் அமைச்சர் தேவானந்தா தெரிவித்தார்.

ஒரு தடவை தன்னைப்பற்றி மற்ற வர்களிடம் அபிப்பிராயம் தெரிவித்த ஜனாதிபதி அவர்கள் அமைச்சரவையில் உள்ள ஒரே ஒரு தமிழ் அமைச்சரை தான் இழக்க தயாராக இல்லையென்று கூறியதில் இருந்து நான் வடமாகாண சபைத் தேர்தலில் போட்டியிட மாட்டேன் என்று எவரும் நினைத்துவிடக் கூடாது.

எங்கிருந்தாலும் என்னை தனது அமைச்சரவையில் தொடர்ந்தும் வைத்திருப்பேன் என்பதையே ஜனாதிபதி இதன் மூலம் வலியுறுத்தியுள்ளார் என்றும் அமைச்சர் மேலும் தெரிவித்தார்.

ஜனநாயக வழிமுறையிலேயே நாம் எங்கள் மக்களின் பிரச்சினைகளை தீர்த்து வைக்க முடியும். கடந்த காலத்தில் ஆயு தப் போராட்டத்தின் மூலம் உரிமைகளை பெறுவதற்கு முயற்சித்தவர்களுக்கு ஏற்பட்ட நிலையை நாம் சற்று மனதில் எடுத்து யதார்த்தமாக சிந்தித்து செயற்படுவது அவசியமென்று கூறினார்.

உரிமைப் போராட்டத்தில் சம்பந்தப்பட்ட அனைவரும் வடமாகாணசபைத் தேர்தலில் இணைந்து தங்கள் பங்களிப்பை வழங்க வேண்டும் என்று தெரிவித்த அமைச்சர் தேவானந்தா, எமது மக்கள் சுதந்திரமாகவும், கெளரவமாகவும் வாழ்வதற்கு மாகாணசபைத் செயற்பாடு வழிவகுக்கும் என்றும் தெரிவித்தார்.

எதிர்வரும் வடமாகாணசபைத் தேர்தலில் ஈழமக்கள் ஜனநாயக கட்சியின் செயலாளர் நாயகமும், பாரம்பரிய கைத்தொழில் மற்றும் சிறு கைத்தொழில் முயற்சி அபிவிருத்தி அமைச்சருமான டக்ளஸ் தேவானந்தா அவர்கள் தமது கட்சி வட மாகாணசபைத் தேர்தலில் போட்டியிடும் என்று தெரிவித்ததுடன், நாம் 13ஆவது திருத்தச் சட்டத்தை எவ்வகையிலும் பலவீனப்படுத்த இடமளிக்க மாட்டோம். அரசாங்கம் அதனை பலவீனப்படுத்துவதற்கு முயற்சிகள் எடுத்தால் அதனையும் எதிர்ப்பதற்கு தயங்கமாட்டோம் என்று தெரிவித்தார்.

எங்கள் பகுதியில் உள்ள அதி உயர் பாதுகாப்பு வலையங்கள் தொடர்ந்தும் இருக்க முடியாது. அவை படிப்படியாக அகற்றப்படும் என்றும் உறுதியாக அறிவித்தார். எல்.ரி.ரி.ஈ.யின் அராஜக நிர்வாகத்தின் போது சுதந்திரத்தையும், மகிழ்ச்சியையும் இழந்து பல்லாண்டு காலம் வேதனையில் மூழ்கியிருந்த வடபகுதி மக்கள் இன்று தங்களுக்கு கிடைத்த சுதந்திரத்தையும், அமைதியான சூழலையும் மகிழ்ச்சியாக கொண்டாடுகிறார்கள். அவர்களின் இந்த மகிழ்ச்சியை நாம் சீர்குலைக்க இடமளிக்க மாட்டோம். இதை வைத்துக் கொண்டு சிலர் வடபகுதியில் கலாசார சீரழிவு இடம்பெறுகிறதென்று தப்பபிப்பிராயம் கொள்வது தவறு என்று அமைச்சர் டக்ளஸ் தேவானந்தா கண்டனம் தெரிவித்தார்.

வடமாகாண சபை தேர்தல் என்பது எனது நெடுநாளைய கனவு, எமக்கு கிடைக்கின்ற இந்த சந்தர்ப்பத்தை சாதக மாக பயன்படுத்திக் கொள்ள வேண்டும். கடந்த காலங்களில் எமக்கு கிடைத்த சந்தர்ப்பங்களையெல்லாம் சாதமாக பயன்படுத்தத் தவறிவிட்டோம் என்றும் அமைச்சர் டக்ளஸ் தேவானந்தா தெரி வித்தார்.