வட மாகாணசபை

தமிழ்க் கூட்டமைப்பின் முதலமைச்சர் வேட்பாளர் சி.வி.விக்னேஸ்வரன் தெரிவின் பின்னணியில்

வட மாகாண சபைக்கான தேர்தலில், தமிழ்த் தேசிய கூட்டமைப்பின் முதலமைச்சர் வேட்பாளராக முன்னாள் உச்ச நீதிமன்ற நீதியரசர் சி. வி. விக்னேஸ்வரனை நியமிப்பதற்கு தமிழ் தேசிய கூட்டமைப்பு ஏகமனதாக தீர்மானித்துள்ளதாக தமிழ் தேசிய கூட்டமைப்பு தலைவர் இரா. சம்பந்தன் நேற்று உத்தியோகபூர்வமாக அறிவித்தார். முதலமைச்சர் வேட்பாளராக மாவை சேனாதிராஜாவா அல்லது சி. வி. விக்னேஸ்வரனா நியமிக்கப்படுவார் என்ற சர்ச்சை பூதாகரமாகியிருந்த நிலையிலே நேற்று நடைபெற்ற கூட்டமைப்பின் ஒருங்கி ணைப்புக் குழுக் கூட்டத்தில் இந்த முடிவு எடுக்கப்பட்டது. கூட்டமைப்பில் அங்கம் வகிக்கும் கட்சித் தலைவர்கள் உள்ளடங்கிய ஒருங்கிணைப்புக் குழுக் கூட்டம் கூட்டமைப்புத் தலைவர் இரா. சம்பந்தனின் தலைமையில் கட்சி தலைமையகத்தில் நேற்று காலை நடைபெற்றது.

கூட்டமைப்பின் முதலமைச்சர் வேட்பாளரை தெரிவு செய்வதற்காக கட்சி ஒருங்கிணைப்புக் குழுக் கூட்டம் கடந்த வாரங்கள் பல தடவைகள் கூடியபோதும் முடிவுகள் இன்றியே கூட்டங்கள் நிறைவடைந்தன. முதலமைச்சர் வேட்பாளராக கூட்டமைப்பின் செயலாளரும் பாராளுமன்ற உறுப்பினரான மாவை சேனாதிராஜாவை நியமிக்க வேண்டும் என ஒரு சாராரும் முன்னாள் உயர் நீதிமன்ற நீதியரசர் சி. வி. விக்னேஸ்வரனை நியமிக்க வேண்டுமென்று மற்றொரு சாராரும் வலியுறுத்தி வந்தனர். மாவை சேனாதிராஜாவுக்கு ஆதரவாக சில த. தே. கூட்டமைப்பு எம். பி. களும் தமிழரசுக்கட்சி கிளைகளும் அறிக்கை விட்டிருந்ததோடு சி. வி. விக்னேஸ்வரனுக்கு ஆதரவு தெரிவித்து சிலர் கருத்து வெளியிட்டு வந்தனர்.

முதலமைச்சர் வேட்பாளர் தெரிவு விவகாரத்தினால் கூட்டமைப்பு உடைபடும் நிலை ஏற்படலாம் என பரவலாக பேசப்பட்டதோடு ஏனைய பிரதான கட்சிகளும் கூட்டமைப்பின் முதலமைச்சர் வேட்பாளர் யார் என்பதை அறிவதில் ஆர்வமாக இருந்தன.

விக்னேஸ்வரனை முதலமைச்சராக தெரிவு செய்தால் தனித்துப் போட்டியிடுவதாக சில தமிழரசுக் கட்சி முக்கியஸ்தர்கள் அறிவித்திருந்தனர். இந்த நிலையில் முதலமைச்சர் வேட்பாளர் குறித்த ஒருங்கிணைப்புக் குழுவின் கூட்டம் நேற்று நீண்ட நேரம் கூடி ஆராய்ந்தது. காரசாரமான வாதப் பிரதிவாதங்கள் இங்கு இடம் பெற்றதாக கட்சி வட்டாரங்கள் கூறின. சி. வி. விக்னேஸ் வரனை முதலமைச்சர் வேட்பாளராக நிறுத்துவதில் கட்சித் தலைவர் இரா. சம்பந்தன் விடாப்பிடியாக இருந்ததாகவும் அறிய வருகிறது.

நேற்றைய கூட்டமும் முடிவு எதுவும் எடுக்காமல் நிறைவடையும் சூழல் காணப்பட்டது. இந்த இழுபறிக்கு முற்றுப்புள்ளி வைக்கும் வகையில் தான் முதலமைச்சர் தெரிவில் இருந்து ஒதுங்குவதாக மாவை சேனாதிராஜா எம். பி. அறிவித்துள்ளார்.

அதனைத் தொடர்ந்து கூட்டமைப்பின் தலைவர் சம்பந்தன் எம். பி. முதலமைச்சர் வேட்பாளராக சி. வி. விக்னேஸ்வரன் தெரிவு செய்யப்பட்டிருப்பதாக உத்தியோ கபூர்வமாக அறிவித்தார்.

முதலமைச்சர் வேட்பாளர் தெரிவு தொடர்பில் கடந்த காலங்களில் கூட்டமைப்பிற்குள் பல்வேறு கருத்து வேறுபாடுகள் நிலவிய போதும் வேட்பாளர் தெரிவினைத் தொடர்ந்தும் இவ்வாறான கருத்து வேறுபாடுகள் இனிமேலும் நீடிக்காது. அனைவரும் ஏகமனதாகவே கூட்டமைப்பிற்கான முதலமைச்சர் வேட்பாளரை தெரிவு செய்துள்ளோமென செல்வம் அடைக்கலநாதன் எம். பி. தெரிவித்தார்.

மேலும் மாவை சேனாதிராஜா வட மாகாண சபைத் தேர்தலில் போட்டியிட மாட்டாரெனவும் தெரிய வருகிறது.

நேற்றைய கூட்டத்தில் தமிழ் தேசியக் கூட்டமைப்பின் 5 கட்சிகளையும் சேர்ந்த 21 பிரதிநிதிகள் கலந்து கொண்டிருந்தமை குறிப்பிடத்தக்கது.

2001 முதல் 2004 வரை உச்சநீதிமன்ற நீதியரசராக பணி புரிந்த சி. வி. விக்னேஸ் வரன் அதற்கு முன்னர் மேன்முறையீட்டு நீதிமன்றம், மேல் நீதிமன்றம், மாவட்ட நீதிமன்றம் என்பவற்றிலும் பணியாற்றி யிருந்தார். மட்டக்களப்பு, சாவகச்சேரி மற்றும் மல்லாகம் மாவட்ட மற்றும் நீதவான் நீதிமன்றங்களில் பணியாற்றியுள்ள அவர் 1995 இல் மேன் முறையீட்டு நீதியரசராக நியமிக்கப்பட்டார். இவரின் மகன் அமைச்சர் வாசுதேவ நாணயக்காரவின் மகளை மண முடித்துள்ளது குறிப்பிடத்தக்கது.