அபிமன்யு பதில்கள் நூல் வெளியீடு

கண்ணோட்டம் பத்திரிகையில் பிரசுரமான கேள்வி- பதில்களின் தொகுப்பு நூல் வடிவில் வெளியிடப்பட்டது. இன்று பிற்பகல் (06-07-2014) 3.45 மணியளவில் கண்டி வீதியில் அமைந்துள்ள பத்மநாபா ஈழ மக்கள் புரட்சிகர விடுதலை முன்னணியின் அலுவலக கேட்போர் கூடத்தில் இடம்பெற்ற இந்நிகழ்வுக்கு திருநாவுக்கரசு ஸ்ரீதரன் (சுகு)- பொதுச்செயலாளர் தலைமை வகித்து உரையாற்றும்போது அபிமன்யு பதில்கள் நூலில் குறிப்பிடப்பட்டுள்ள விடயங்கள் நெருக்கடியான, ஜனநாயக உரிமைகள் மறுக்கப்பட்ட காலகட்டத்தில் கண்ணோட்டம் பத்திரிகையில் வெளிவந்த வகையில் முக்கியத்துவம் மிக்கதாகும். கேள்வி பதில்கள் சற்று விரிவாக காணப்பட்டாலும் இலங்கை தமிழர் அரசியல் நிலைமைகளை யதார்த்தமாக மக்கள் புரிந்துகொள்ளும் வகையில் எடுத்துச் சொல்லப்பட்டிருக்கிறது

கா. ஜெயக்குமாரன் (கங்கா) வரவேற்புரையுடன் ஆரம்பமான இந் நிகழ்வில் அறிமுக உரையை ஆசிரியரும், சமூக சேவையாளருமான இரா. செல்வவடிவேல் ஆற்றினார். அவர் அங்கு குறிப்பிடுகையில் இந்த நூலை திருத்தும் பணியை மேற்கொள்ளும் சந்தர்ப்பம் எனக்கு கிட்டியிருந்தது. இந் நூலை தொடக்கத்திலிருந்து முடியும் வரை ஆர்வத்தோடு வாசிக்கும் வகையில் கேள்வி பதில்கள் அமைந்திருந்தன. வௌ;வேறு காலகட்டத்தில் இடம்பெற்ற சம்பவங்களை இளம் சமுதாயத்திற்கு எடுத்துக் கூறுவனவாயும் உள்ளன என்று குறிப்பிட்டார்.

மிகவும் இக்கட்டான காலகட்டத்தில் வெளிவந்த பத்திரிகையான கண்ணோட்டம் அச்சமில்லாத இந்த காலகட்டத்தில் வெளிவராதது மிகவும் கவலைக்குரிய விடயமாகும். எனவே கண்ணோட்டம் பத்திரிகை வெளிவர வேண்டும் என்றார். கேள்வி பதிலில் வெளிவந்த விடயங்கள் அபிமன்யுவால் பல ஆண்டுகளுக்கு முன் வெளிவந்த விடயமாக இருந்தாலும் தற்போதைய காலத்திலும் பொருந்தமான விடயங்கள் காணப்படுகின்றன.

மதிப்பீட்டு உரையை முன்னாள் ஆசிரியர் ஆலோசகர் ஏ.சி.ஜோர்ஜ் ஆற்றும் போது இப் புத்தகத்தில் குறிப்பிடப்பட்டுள்ள விடயங்கள் அனேகமானவை புலிகள் சம்பந்தப்பட்ட விடயங்களாகவே காணப்பட்டாலும் அவை 2009ம் ஆண்டுகாலத்துக்கு முன் காணப்பட்ட நிலையில் அவை பொருத்தமாக அமைந்திருந்தது. ஆனால் 2009ம் ஆண்டுக்குப் பிறகு மக்களுடைய ஏனைய முக்கிய பிரச்சினைகளையும் தொடுவதாக இருந்திருந்தால் நன்றாக அமைந்திருக்கும்.

இறுதியில் நன்றியுரை வழங்கிய வ.விக்னேஸ்வரன்(கிருபா), எங்களுடைய அழைப்பை ஏற்று இந்த நூல் அறிமுகவிழாவில் கலந்துகொண்ட அனைவருக்கும் நன்றிகளை தெரிவித்ததுடன் எங்களுடைய அரசியல் கருத்துக்களோடு மாறுபட்ட வௌ;வேறுஅபிப்பிராயங்கள் இருப்பினும் நட்புறவோடு எமக்கு இந்நிகழ்வில் அளித்துள்ள ஆதரவோடு சமூக அக்கறையோடு பொது வாழ்வில் ஈடுபட்டுள்ள எமக்கு மேலும் ஊக்கமளிக்க உதவுவதாக அமைந்துள்ளது என்றார்.

இந்த நிகழ்வில் சமூக நலன் விரும்பிகள், தோழர்கள் நண்பர்கள் நலன் விரும்பிகள், ஆதரவாளர்கள் என பல தரப்பினரும் கலந்து கொண்டனர்.