'போதைப்பொருள் பயன்பாட்டினால் தமிழ் இளைஞர் சமூகம் சீரழியுது' -  'சிங்கம்' சிறிதரன்

'போதைப்பொருள் பயன்பாட்டினால் தமிழ் இளைஞர் சமூகம் சீரழியுது' எண்டு 'சிங்கம்' சிறிதரன் 05.06.2014 அண்டைக்கு பாராளுமன்றத்தில முழங்கியிருக்கிறாரல்லோ... மன்னிக்க வேணும்... பாராளுமன்றத்தில் கவலைப்பட்டிருக்கிறாரல்லோ... இதைப் பேப்பரில படிச்சபோது எனக்குத் தலைசுத்திச்சுது. எங்கட சனங்களுக்கு என்னமாதிரி அழுகின வாழைப்பழத்தைத் தோலோட தீத்துறாங்களப்பா... சனங்களுக்கும் இந்த அழுகின வாழைப்பழம்தான் அந்த மாதிரி ருசிக்குது. அந்தோனியாரே... செபமாலை மாதாவே... மாவிட்டபுரக்கந்தா... வற்றாப்பளை அம்மாளாச்சி... இதுகளையெல்லாம் கேட்கிறதுக்கும் பாக்கிறதுக்கும் உங்களுக்கு மனசில்லையோ... 'போதைப்பொருள் மற்றும் மதுபான பயன்பாட்டைக் கட்டுப்படுத்த எவ்வித நடவடிக்கையும் எடுக்கவில்லை' எண்டு 'சிங்கம்' மேலும் மேலும் சொல்லிக்கொண்டு போகுது.

இதைப்படிக்கப் படிக்க எனக்குப் புரக்கடிக்குது. இந்தப் போதைப்பொருள், மதுபானப் பயன்பாட்டுக்கு எதிராக அரசாங்கம் முறையாக நடவடிக்கை எடுத்தால் 'சிங்கத்தின்ரை' ஆதரவுத்தளம் சுக்குநூறாகிச் சிதறிப்போயிடும். 'சிங்கமும்' கூட்டுக்குள்ளதான் போகவேணும். ஏன் தெரியுமோ? 'சிங்கம்'தான் இந்த மதுபானப் பாவனையை வன்னியில – கிளிநொச்சியில ஊக்குவித்துக் கொண்டிருக்கிற நம்பர் வண் ஆள். ஏன் தெரியுமோ? தேர்தல்களில் வெல்லுறதுக்காக. அதுக்குப் பிறகு தனக்கு வாற பிரச்சினைகளைச் சமாளிக்கிறதுக்காக எண்டுதான். ஒவ்வொரு தேர்தலுக்கும் கேஸ் கணக்கில பியரும் சாராயமும் கிளிநொச்சிக்கு வரும். அப்பிடி வாற கேஸ்களை இறக்கி, அதைப் படிக்கிற பெடியளுக்கு தாராளமாகத் தானம் வழங்குவார் அண்ணாச்சி. ஆளோட சேர்த்தியான வாத்திமாரும் இந்தச் சந்தர்ப்பத்தில தாராளமாக வாத்துக்கொள்ளுவினம்.

சிங்கம் அரசியல்ல நேரடியாகக் குதிக்க முதல் வவுனியாவில தங்கி நிண்டு, கிளிநொச்சிப் பெடியளோட தண்ணி போடு போடெண்டு போட்டு ஆடிய ஆட்டம் கொஞ்சமல்ல. அப்ப இந்தச் சிங்கம் (சிறிதரன்) புலிகளைத் தாறுமாறாகத் திட்டினதை அவரும் அவரோட நிண்ட ஆட்களும் இப்ப மறந்திருக்கலாம். ஆனால், இவருக்கு தண்ணி ஏற்பாடு பண்ணின தம்பிமார் மறக்கயில்லை. இப்ப கூட வவுனியாக திருநாவக்குளத்தில இருக்கிற ஒரு (கிளிநொச்சி) வாத்தியாரின்ர வீட்ட அடிக்கடி இந்தத் 'தண்ணி வார்ப்பு' நடக்குது. பிறகு வந்த ஒவ்வொரு தேர்தல்லயும் சிங்கம் தண்ணிவார்த்துத்தான் வெற்றிக் கொடி நாட்டுது.

இதுக்குத் தோதாக சிங்கத்தோட அரசியல் களத்தில நிக்கிற ரியுட்டறி ஓணர்கள், பத்துப்பன்னிரண்டு பிரதேச சபை உறுப்பினர்கள், ஒரு மாகாணசபை உறுப்பினர் எண்டு ஒரு பெரிய படையே தண்ணியில்தான் சீவியம் நடத்துகினம். தேர்தல் காலத்தில ரியூட்டறி ஓணர்கள் தங்கட ரியூட்டறியில படிக்கிற பெரிய பெடியளுக்கு முதுகில தடவி, வாயில பியரை ஊத்துவினம். 'தம்பிமார் இதுதான் தேசியச் சாமான். அந்த மாதிரிச் சரக்கு. அரசாங்கத்தை அப்பிடியே தூக்கி உங்கட கமக்கட்டுக்குள்ள வையுங்கோ' எண்டு அப்பிடியே போஸ்ரர் கட்டையும் பசை வாளியையும் தூக்கிக் குடுத்து 'நீங்கள் முன்னுக்குப் போங்கோ. நான் பின்னால வாறன்' எண்ட கணக்கில தமிழரின் தாகம் தமிழீழ தாயகம் எண்டு ஒரு சீன் விடுவார். அப்ப நீங்கள் ஆளைப் பாக்கோணும். தேசியத்தலைவர் தோற்றுப்போவார்.

இந்தச் சீனில –ஆரும் சும்மா நிக்கலாமோ. உள்ளுக்குள்ள இறங்கின போதையும் சிங்கம் வாயால ஏத்திற அரச எதிர்ப்பு – தமிழ்த் தேசியப் போதையும் சேரப் பெடியள் சும்மா புயல்போலச் சீறிக்கொண்டு போவாங்கள். ஆள், முந்தின பள்ளிக்கூட வாத்தியாரெல்லோ. ஆளுக்கு ஆதரவாக நிக்கிற ஆட்களில அரைவாசிப்பேர் ஆளைப்போல வாத்திமார். அவை இந்தப் பெடியளை மேய்க்கத் தொடங்கீடுவினம். பகலில் தேசியம், இரவில் தேசியப் பானம் எண்ட கணக்கில வார் வார் எண்டு வாத்துப்போட்டு, ஊரில இருக்கிற எல்லாப் பொம்பிளையளைப் பற்றியும் அரசாங்க அதிகாரிகளைப்பற்றியும் எதிரணிக் காறரைப்பற்றியும் அரசாங்கத்தைப்பற்றியும் அக்கு வேறு ஆணி வேறாக சல்லடை போட்டு அலம்பிக் கொண்டிருப்பினம் இரவிரவாக.

இப்பிடியே தேர்தற்காலங்களில படிக்கிற பெடியள் தொடக்கம், படிப்பியாத வாத்திமார் (எல்லாரும் அல்ல) வரை தண்ணியோடதான் சீவியம். தேர்தலுக்குப் பிறகு, அவனவன் விடுகிற பிழைகள், தவறுகள் எல்லாத்துக்கும் தண்ணியிலதான் கணக்குப் பாக்கிறது. தண்ணியாலதான் சமாதானம் செய்யிறது. இந்தச் சீரில சிங்கம் சொல்லுது, 'போதைப்பொருள் பயன்பாட்டினால் தமிழ் இளைஞர் சமூகம் சீரழியுது' எண்டு. நல்லாய்த்தானிருக்கு, உனக்கல்லடி உபதேசம், ஊருக்கடி. படிக்கிறது சிவபுராணம். இடிக்கிறது சிவன்கோயிலாம்.