அச்சுவேலி, மிருசுவிலில் புதிய முகாம் இல்லை

யாழ்ப்பாணம், அச்சுவேலி மற்றும் மிருசுவில் பகுதியில் படைத்தரப்புக்காக முகாம்களை அமைப்பதற்கு ஓர் அங்குலம் கூட கைப்பற்றப்படவில்லை என்பதுடன் 1995 ஆம் ஆண்டு நிர்மாணிக்கப்பட்ட முகாம்களே அங்கிருக்கின்றன. அங்கு புதிய முகாம்கள் எதுவுமே இல்லை என்று இராணுவப்பேச்சாளரும் பாதுகாப்பு மற்றும் நகர அபிவிருத்தி அமைச்சின் ஊடக மைய பணிப்பாளருமான பிரிகேடியர் ருவன் வணிகசூரிய நேற்று புதன்கிழமை (23) தெரிவித்தார். அச்சுவேலி, மிருசுவில் பகுதியில் இராணுவத்தினருக்காக காணிகளை அளவீடு செய்யும் பணிகள் நிலஅளவையாளர் திணைக்களத்தினால் முன்னெடுக்கப்படுவதாக குற்றஞ்சாட்டப்பட்டு எதிர்ப்பு ஆர்ப்பாட்டங்கள் முன்னெடுக்கப்பட்டன.

அச்சுவேலியில் 1995ஆம் ஆண்டே இராணுவ முகாம் அமைக்கப்பட்டது. அக்காலப்பகுதியில் குடாநாட்டில் நூற்றுக்கணக்கான முகாம்கள் அமைக்கப்பட்டன. 2009ஆம் ஆண்டில் பயங்கரவாதம் தோற்கடிக்கப்பட்டபோது குடாநாட்டில் 26 ஆயிரம் ஏக்கரில் இராணுவம் இருந்தது. இன்று 6,500 ஏக்கரிலேயே இராணுவம் இருக்கின்றது. 200 முகாம்கள் அண்மைய காலங்களில மூடப்பட்டுள்ளன. பாதுகாப்பு காரணங்கங்களை கவனத்தில் கொண்டு முகாம்கள் சில முகாம்கள் ஆங்காங்கே வைக்கப்பட்டுள்ளன. அச்சுவேலியில் காணியை இராணுவத்திற்கு சுவீகரிப்பதற்காக நில அளவையாரை கொண்டு காணிகளை அளவீடு செய்யப்படுவதாக கூறப்படுவதில் எவ்விதமான உண்மையும் இல்லை.

அவ்விடத்தில் இராணுவ முகாம் இருகின்ற காணியில் அரைவாசி அரசாங்கத்திற்கு சொந்தமானது, அரைவாசி தனியாருக்கு சொந்தமானதாகும்
தனியாருக்கு சொந்தமான காணி உரிமையாளர்களுக்கு நட்டஈடு வழங்குவதற்காகவே இக்காணி அளவீடு செய்யப்படுகின்றது. அவ்விடத்தில் புதிய முகாம் அமைக்கப்படவில்லை என்பதுடன் முகாம் அமைப்பதற்காக ஓர் அங்குலம் கூட சுவீகரிக்கப்படவில்லை.

அந்த அரைவாசி காணிக்கு ஒன்பது உரிமையாளர்கள் இருகின்றனர். அதில், எண்மர் யாழ்ப்பாணத்தில் வௌ;வேறு இடங்களில் சொந்த வீடுகளில் வாழ்க்கின்றனர். ஒருவர் மட்டும் பிரிதொரு காரணத்திற்காக கூலி வீட்டில் இருக்கின்றார். அவருக்கும் சொந்த வீடொன்று இருக்கின்றது. இந்த எண்மரில் இருவர் கொழும்பு, வெள்ளவத்தையில் வசிக்கின்றனர்.

இதில் பலர், காணிக்கான நட்டஈட்டை பெற்றுகொள்வதற்கு விருப்பம் தெரிவித்துள்ளனர். எனினும், அரசியல் உள்ளிட்ட காரணங்களுக்காக காணியை அளவீடு செய்யும் நடவடிக்கைகளுக்கு எதிர்ப்பினை தெரிவிக்கின்றனர்.

மிருசுவில்

மிருசுவிலில் 52 ஆவது படைப்பிரிவின் முகாம் அமைந்துள்ள காணியானது பெண்ணொருவருக்கு சொந்தமானதாகும். அப்பெண் தன்னுடைய சொந்த வீட்டிலேயே இருக்கின்றார். அந்த வீடு புங்குடுதீவில் இருக்கின்றது.

அரசியல் அழுத்தங்கள் காரணமாகவே காணியளவீடு செய்யும் நடவடிக்கையை அப்பெண் எதிர்க்கின்றார். மணல் நிறைந்திருக்கின்ற அக்காணியில் எவ்விதமான விவசாயத்தையும் மேற்கொள்ள முடியாது என்றார்.

அதுமட்டுமன்றி இந்த காணியிலும் தமிழீழ விடுதலைப்புலிகளின் பயிற்சி முகாம் இருந்தது. அதனை இராணுவத்தினரே கைப்பற்றினர் என்பதுடன் புலிகளால் அப்பெண்ணுக்கு நட்டவீடு வழங்கப்பட்டதா என்பது தொடர்பில் தெரியாது என்றார்.

நட்டஈடு பெற்றுகொள்வதற்கு விருப்பம் தெரிவிக்கும் காணி உரிமையாளர்கள் அரசியல் காரணங்களுக்காக எதிர்ப்பினை வெளியிட்டு வருகின்றனர். இவ்வாறான நிலையில் காணி சுவீகரிப்பு சட்டம் மூலமாக காணியமைச்சு நடவடிக்கைகளை மேற்கொள்ளும் என்றும் அவர் கூறினார்.