கட்டுநாயக்க சம்பவம்

பொலிஸ் உயர்மட்டத்தில் அதிரடி மாற்றம்!

பொலிஸ் மா அதிபர் பதவி விலகினார்!!

மேல்மாகாண பிரதி பொலிஸ் மா அதிபர் இடமாற்றம்!!!

2 இன்ஸ்பெக்டர்கள் கைது!!!!

பொலிஸ் மா அதிபர் மஹிந்த பாலசூரிய தனது பதவி விலகல் கடிதத்தை ஜனாதிபதி மஹிந்த ராஜபக்ஷவுக்கு நேற்று புதன்கிழமை சமர்ப்பித்துள்ளார்.  எனினும் பொலிஸ் மா அதிபரின் பதவிக் காலம் எதிர்வரும் 18 ஆம் திகதியுடன் முடிவடையும் நிலையில் அவர் ஓய்வு பெறுகிறாரே தவிர பதவி விலகவில்லை என்று பொலிஸ் ஊடக பேச்சாளர் பொலிஸ் அத்தியட்சர் பிரிசாந்த ஜயகொடி தெரிவித்துள்ளார். அத்துடன், பொலிஸ் மா அதிபர் மஹிந்த பாலசூரிய தனது பதவிக் காலம் முடிவடையும் தினமாக ஜூன் மாதம் 18 ஆம் திகதியை குறிப்பிட்டு ஓய்வுபெறுவதற்கான கடிதத்தை ஜனாதிபதிக்கு சமர்ப்பித்து அதற்கு முன்னதாக விடுமுறை கோரியும் விண்ணப்பித்திருப்பதாக ஜனாதிபதி ஊடக பணிப்பாளர் பந்துல ஜயசேகர தெரிவித்தார்.

2009 ஆம் ஆண்டு நவம்பர் மாதம் 2 ஆம் திகதி பொலிஸ் மா அதிபராக நியமிக்கப்பட்ட மஹிந்த பாலசூரிய, கட்டுநாயக்க சுதந்திர வர்த்தக வலய ஊழியர்களுக்கும் பொலிஸாருக்கும் இடையில் கடந்த மே மாதம் 30 ஆம் திகதி ஏற்பட்ட மோதல் சம்பவத்தை அடுத்து இரண்டாவது நாளில் தனது      ஓய்வுக் கடிதத்தை சமர்ப்பித்திருக்கிறார்.

இந்தச் சம்பவத்தை அடுத்து மேல் மாகாண சிரேஷ்ட பிரதி பொலிஸ் மா அதிபர் காமினி நவரட்னவும் இடமாற்றம் செய்யப்பட்டுள்ளார்.
காமினி ரவரட்ன மீண்டும் மத்திய மாகாணத்துக்கான சிரேஷ்ட பிரதி பொலிஸ் மா அதிபர் பதவிக்கே திருப்பி அனுப்பப்பட்டுள்ளதாக பொலிஸ் பேச்சாளர் பி.ஜயகொடி தெரிவித்துள்ளார். நேற்று இந்த இடமாற்றம் வழங்கப்படுவதற்கு 4 தினங்களுக்கு முன்னதாகத்தான் காமினி நவரட்ன மேல் மாகாண சிரேஷ்ட பிரதி பொலிஸ் மா அதிபராக நியமிக்கப்பட்டிருந்தார்.

அத்துடன் மேல் மாகாணத்துக்கான புதிய சிரேஷ்ட பிரதி பொலிஸ் மா அதிபராக அசோக விஜேதிலக நியமிக்கப்பட்டுள்ளார்.  பொலிஸ் மா அதிபர் மஹிந்த பாலசூரியவின் பதவி விலகலை அடுத்து அப் பதவிக்கு சிரேஷ்ட பிரதி பொலிஸ் மா அதிபர் என்.கே.இளங்ககோன் நியமிக்கப்படக் கூடுமென பொலிஸ் வட்டாரங்கள் எதிர்வு கூறுகின்றன.

இந்த நிலையில், கட்டுநாயக்க சுதந்திர வர்த்தக வலய சம்பவம் தொடர்பாக நீர்கொழும்பு பொலிஸ் பிரிவைச் சேர்ந்த இரு சிரேஷ்ட பொலிஸ் அதிகாரிகள் குற்றப் புலனாய்வு பிரிவினரால் (சி.ஐ.டி.) கைது செய்யப்பட்டிருப்பதாக பொலிஸ் பேச்சாளர் ஜயகொடி தெரிவித்துள்ளார்.

ஆர்ப்பாட்டத்தில் ஈடுபட்ட சுதந்திர வர்த்தக வலய ஊழியர்கள் மீது துப்பாக்கிப் பிரயோகம் மேற்கொண்ட குற்றச்சாட்டின் பேரில் பொலிஸ் சப் இன்ஸ்பெக்டர் ஒருவரும் பொலிஸ் இன்ஸ்பெக்டர் ஒருவரும் கைது செய்யப்பட்டுள்ளதாக அவர் தெரிவித்துள்ளார்.  அத்துடன், அவ்விரு பொலிஸ் அதிகாரிகளும் நேற்று பிற்பகல் நீர்கொழும்பு நீதிமன்றத்தில் ஆஜர்படுத்தப்பட்டதாகவும் பொலிஸ் அத்தியட்சர் பிரிசாந்த ஜயகொடி தெரிவித்தார்.
அரசாங்கம் கொண்டு வர முயற்சித்த தனியார் ஓய்வூதிய திட்டத்திற்கு எதிர்ப்பு தெரிவித்தே கடந்த மே மாதம் 30 ஆம் திகதி கட்டுநாயக்க சுதந்திர வர்த்தக வலய ஊழியர்கள் ஆர்ப்பாட்டம் செய்திருந்தனர். இதன்போது ஆர்ப்பாட்டக்காரர்களுக்கும் பொலிஸாருக்கும் இடையில் ஏற்பட்ட மோதலில் இருதரப்பிலும் பலர் காயமடைந்தனர்.

இதில் ஒரு கட்டத்தில் பொலிஸார் ஆர்ப்பாட்டக்காரர்கள் மீது துப்பாக்கி பிரயோகம் செய்த சம்பவமும் இடம் பெற்றிருந்தது. இது தொடர்பாகவே இரு பொலிஸ் அதிகாரிகளும் சந்தேகத்தின் பேரில் கைது செய்யப்பட்டுள்ளனர்.  இந்த ஆர்ப்பாட்டத்தை அடுத்து ஆளும் ஐக்கிய மக்கள் சுதந்திர முன்னணியின் தலைமைக் கட்சியான ஸ்ரீ லங்கா சுதந்திரக் கட்சியின் மத்தியகுழுக் கூட்டத்தில் தனியார் ஓய்வூதிய திட்டத்தை தற்காலிகமாக இடைநிறுத்தி வைப்பதென்றும் தீர்மானிக்கப்பட்டது.

இதேநேரம், கட்டுநாயக்க சுதந்திர வர்த்தக வலய ஆர்ப்பாட்டத்தில் துப்பாக்கிச் சூட்டில் காயமடைந்த 22 வயதான ஊழியர் ஒருவர் ஆபத்தான நிலையிலிருப்பதாக ராகம வைத்தியசாலை வட்டாரங்கள் தெரிவித்துள்ளன.  இது இவ்வாறிருக்க, ஆர்ப்பாட்டத்தினரால் ஏற்பட்ட பதற்ற நிலைமையை போக்கி இயல்பு நிலைமையை கொண்டுவரும் பொருட்டு கடந்த திங்கட்கிழமை தொடக்கம் 3 தினங்களுக்கு தற்காலிகமாக மூடப்பட்ட கட்டுநாயக்க சுதந்திர வர்த்தக வலயம் இன்று மீண்டும் திறக்கப்படுவதாக இலங்கை முதலீட்டுச் சபை நேற்று புதன்கிழமை தெரிவித்துள்ளது.