கொக்காவில் தொலைத் தொடர்பு கோபுரம் ஜனாதிபதியால் திறந்து வைப்பு

இற்றைக்கு 20 ஆண்டுகளுக்கு பின்னர் கிளிநொச்சி கொக்காவில் தொலைத்தொடர்பு கோபுரம் மீண்டும் மக்களின் பாவனைக்காக இன்று ஜனாதிபதி மஹிந்த ராஜபக்ஷ அவர்களினால் திறந்து வைக்கப்படுகின்றது. கிளிநொச்சியில் இருந்து வவுனியா செல்லும் பிரதான வீதியான ஏ9 வீதியில் அருகே இந்த கொக்காவில் தொலைத் தொடர்பு கோபுரம் அமைக்கப்பட்டுள்ளது. 1990 ஆம் ஆண்டு ஜூன் மாதம் 11 ம் திகதியன்று எல். ரி. ரி. ஈயினால் நடத்தப்பட்ட பயங்கரவாத தாக்குதலினால் கெப்டன் அலதெனிய வீர மரணம் எய்தினார். 1990 ஆண்டுகளுக்கு முன்பிருந்தே இப்பகுதியில் 100 மீற்றர் உயரத்தில் தொலைத் தொடர்பு கோபுரம் அமைக்கப்பட்டிருந்தது. இலங்கையின் வடக்கே தொடர்ச்சியாக இடம்பெற்று வந்த வன்முறையின் காரணமாக கொக்காவில் தொலைத் தொடர்பு கோபுரம் முற்றாக அழிக்கப்பட்டது.

பயங்கரவாத யுத்தம் நாட்டில் 2009 மே 18 ம் திகதியன்று முடிவடைந்ததை அடுத்து ஜனாதிபதியின் வடக்கின் வசந்தம் வேலைத்திட்டம் மிக வேகமாக முன்னெடுக்கப்பட்டது.

வடக்கு பகுதிகளில் மீள் குடியேற்றம், கண்ணிவெடி அகற்றுதல், பாதை புனரமைப்பு, வீடுகள் நிர்மாணித்தல் போன்ற இன்னோரன்ன வேலைத்திட்டங்கள் நடைபெற்று வருகின்றன.

அந்த வகையில் மக்களின் வாழ்க்கையோடு பின்னிப் பிணைந்த ஒன்றாக வானொலி, தொலைக்காட்சி என்பன நவீன உலகில் முக்கியத்துவம் பெற்ற ஒன்றாக காணப்படுகிறது.

யுத்தம் நிறைவு பெற்று சில காலங்களிலேயே அரசாங்கத்தின் அபிவிருத்தி செயற்பாடுகள் முன்னெடுக்கப்பட்டன. மக்களின் வாழ்வியலோடு பொதுவான விடயம் உட்பட களியாட்ட நிகழ்வுகளையும், பொழுது போக்கு அம்சங்களையும் பார்வையிடுவதற்காக தொலைக்காட்சி, வானொலி சேவைகளை ஆரம்பிக்க வேண்டிய தேவை ஏற்பட்டது.

இதற்காக 2009 ஆம் ஆண்டு ஓகஸ்ட் 11 ஆம் திகதி வடக்கின் வசந்தம் வேலைத் திட்டத்தின் கீழ் பொருளாதார அபிவிருத்தி அமைச்சர் பசில் ராஜபக்ஷவினால் கொக்காவில் தொலைத் தொடர்பு கோபுரத்திற்கான அடிக்கல் நட்டி வைக்கப்பட்டது. மிகக் குறுகிய காலத்தில் சீன அரசாங்கத்தின் உதவியுடன் தொலைத் தொடர்பு கோபுர வேலைத்திட்டங்கள் ஆரம்பிக்கப்பட்டன.

இலங்கை வரலாற்றில் ஜப்பானியர்களால் தொலைக்காட்சி சேவை அறிமுகப்படுத்தப்பட்ட காலத்தில் பேதுருதாலகால மலை உச்சியில் தொலைத் தொடர்பு கோபுரம் அமைக்கப்பட்டது. அதன் பிறகு வட மாகாணத்திற்கென தொலைக்காட்சி சேவையை ஆரம்பிப்பதற்காக மிகவும் நவீன தொழில்நுட்ப வசதியுடன் கொக்காவில் கோபுர வேலைத்திட்டம் ஆரம்பிக்கப்பட்டது.

கொக்காவில் இலங்கையிலேயே மிகவும் உயரமான கோபுரமாக கணிக்கப்படுகிறது. சுமார் 174 மீற்றர் உயரம் கொண்ட இக்கோபுரம் வட மாகாணத்தின் அநுராதபுரம், வவுனியா, கிளிநொச்சி, முல்லைத்தீவு மற்றும் யாழ்ப்பாண பகுதிகளுக்கு இக்கோபுரத்தின் ஊடாக சேவையை வழங்க முடியும்.

கொக்காவில் கோபுரம் இலங்கை இராணுவமும், உள்நாட்டு தொழிலாளர்களின் முயற்சியினால் நிர்மாணிக்கப்பட்டன.

இத் தொலைத் தொடர்பு கோபுரத்தின் விசேட அம்சம் யாதெனில் நவீன தொழில்நுட்பங்களுடள் கூடிய டிஜிட்டல் முறையிலான தொலைக்காட்சி மற்றும் வானொலி சேவைகளை வழங்குவதாகும்.

கொக்காவில் தொலைத் தொடர்பு கோபுரம் இலங்கை அரசாங்கத்தின் முழுமையான நிதி ஒதுக்கீட்டின் கீழ் உருவாக்கப்பட்டுள்ளது. இதற்காக இலங்கை தொலைத் தொடர்பு ஒழுங்குபடுத்தும் ஆணைக்குழு அதிக முதலீடுகளை செய்துள்ளதுடன் இலங்கை ரூபவாஹினி கூட்டுத்தாபனம், இலங்கை ஒலிபரப்புச் செவை, சுயாதீன தொலைக்காட்சி சேவை என்பனவும் இக் கோபுரத்திற்காக முதலீடுகளை செய்துள்ளன.

சுமார் 450 மில்லியன் ரூபா செலவில் நிர்மாணிக்கப்பட்டுள்ள இக் கோபுரம் வரலாற்று சிறப்பு மிக்க ஒரு இடமான கொக்காவிலில் நிர்மாணிக்கப்பட்டுள்ளமையானது வடபகுதி மக்களின் வாழ்க்கையில் மீண்டும் சுபீட்சம் நிறைந்த பொன் எழுத்துக்களால் பொறிக்கப்பட வேண்டிய ஒன்றாகும்.

இதேவேளை இலங்கையில் தற்போது பாவனையில் உள்ள எனலொக் சேவையானது சில குறைபாடுகளை கொண்டுள்ளது. ஒளித்திரையின் பிரகாசமும், ஒளிபரப்பப்படும் நிறங்களில் ஏற்படும் மாற்றமும் முழுமை பெறாமல் திரையிடப்படுவதாகும். இத்தகைய குறைபாடுகள் டிஜிட்டல் சேவையில் நிவர்த்தி செய்யப்படுகின்றது.

டிஜிட்டல் சேவையானது கொக்காவில் கோபுரத்தின் ஊடாகவே இலங்கையின் முதல் முதலாக ஆரம்பிக்கப்படவுள்ளது. மேலும் வடக்கு மற்றும் மேற்கின் கொழும்பில் இவ்வருட இறுதிக்குள் டிஜிட்டல் சேவையை வழங்க எதிர்பார்த்துள்ளதாக ஊடக மற்றும் தகவல் துறை அமைச்சின் செயலாளர் தெரிவித்துள்ளார்.

இதற்காக நாட்டில் உள்ள சகல பிரதேசங்களுக்கும் 2017 ஆம் ஆண்டில் டிஜிட்டல் சேவையை வழங்கவுள்ளதாகவும் அவர் தெரிவித்தார். கொழும்பு பகுதிகளில் தற்போது காணப்படும் சிறிய கோபுரங்களை கொண்டு இவ்வருட இறுதியில் டிஜிட்டல் சேவையை ஆரம்பிக்கவுள்ளனர்.

ஐரோப்பிய நாடுகளில் பயன்படுத்தும் டிஜிட்டல் Digital Visual Broadcast 2  சேவையை இலங்கையில் அறிமுகப்படுத்தவுள்ளனர். இந்த டிஜிட்டல் சேவையானது ஐரோப்பிய நாடுகளில் 1998 ஆம் ஆண்டு ஆரம்பிக்கப்பட்ட போதிலும் அதன் புதிய சேவையான டிஜிட்டல் 2 சேவையையே இலங்கையில் அறிமுகப்படுத்தவுள்ளனர்.

அத்துடன் டிஜிட்டல் சேவையின் ஊடாக வட மாகாணத்தில் தற்போது சேவையில் உள்ள அரசாங்க தொலைக்காட்சி சேவைகளுக்கு மேலதிகமாக தனியார் தொலைக்காட்சி மற்றும் வானொலி சேவைகளும் வழங்கப்பட உள்ளன.

எம். ஐ. நிஸாம்தீன்