ஊழலை எதிர்த்துப் போராடுவதில் அரசு உறுதி

தயாநிதிமாறன் விவகாரம் எமது கையில் இல்லை - மன்மோகன் சிங்

ஸ்பெக்ட்ரம் ஊழல் விவகாரத்தில் மத்திய அமைச்சர் தயாநிதி மாறனுக்கு எதிரான குற்றச்சாட்டுகள் தொடர்பாக பிரதமர் மன்மோகன் சிங் பதிலெதுவும் அளிக்காமல் மெளனம் காத்து வருவதாகவும் அவர் வாய் திறக்க வேண்டுமெனவும் பாரதிய ஜனதா கட்சி உட்பட எதிர்க்கட்சிகள் கண்டனம் தெரிவித்து வந்ததையடுத்து மன்மோகன் சிங் தற்போது இதுகுறித்து கருத்தொன்றை வெளியிட்டுள்ளார்.

நேற்று முன்தினம் செய்தியாளர்களி டம் பேசிய பிரதமர் மன்மோகன் சிங், "தயாநிதிமாறன் விவகாரத்தை சட்ட அமுலாக்கல் பிரிவைச் சேர்ந்தோர் கவனித்து வருகின்றனர். அவர்கள் நடுநிலையுடன் செயற்பட அனுமதிக்கப்படுவர். ஊழலை எதிர்த்துப் போராட வேண்டுமென்பதில் நாங்கள் உறுதியாக இருக்கிறோம்" என்று கருத்துத் தெரிவித்துள்ளார்.

இது இவ்விதமிருக்க 2ஜி ஸ்பெக்ட்ரம் ஒதுக்கீடு விவகாரம் தொடர்பாக விசாரணை நடத்தி வரும் சி.பி.ஐ.யிடம் எயார்செல் நிறுவனத்தின் முன்னாள் தலைவர் சிவசங்கரன் ஆஜராகி விளக்கம் அளித்துள்ளார்.

எயார்செல் நிறுவனத்தை மலேசிய நிறுவனத்திற்கு விற்பதற்கு, தயாநிதிமாறன் கொடுத்த நெருக்கடியே காரணம் என்று அவர் வாக்கு மூலம் அளித்துள்ளதாக கூறப்படுகிறது.

தயாநிதிமாறன் தன் மீதான குற்றச்சாட்டுக்குப் பதிலளிக்கையில், நான் குற்றமற்றவன் என்பதை முறையான அமைப்பிடம் நிரூபிப்பேன் என்றார்.

"தொழில் நிறுவனத்தை விற்குமாறு யாரையும் நிர்ப்பந்தித்ததில்லை" என்றும் மத்திய அமைச்சர் தயாநிதிமாறன் கூறியுள்ளார்.

சென்னையில் செய்தியாளர்களிடம் பேசியபோது இதனை தெரிவித்த தயாநிதிமாறன், "பெரும் பணக்காரரான நிறுவனர் சிவசங்கரன், தான் எயார்செல் நிறுவன பங்குகளை விற்குமாறு நிர்ப்பந்தித்திருந்தால் நீதிமன்றத்தை நாடியிருப்பார்" என்று குறிப்பிட்டார்.

தான் நிரபராதி என்று நிரூபிக்க ஏராளமான ஆதாரங்கள் உள்ளன என்றும் அவர் கூறினார்.

"என் மீது குற்றம் சாட்டப்பட்டுள்ள நிலையில் ஊடகங்களே தீர்ப்பளிக்க முனைவது சோகமானது. என்னிடம் மேலும் ஆதாரங்கள் உள்ளன.

அவற்றைத் தேவைப்படும் போது உரியவர்களிடம் வழங்கி நான் நிரபராதி என்பதை நிரூபிப்பேன்" என்று தெரிவித்த அவர், தான் அமைச்சர் ஆகும் முன்பே எயார்செல் நிறுவனம் இருந்தது" என்றும், கூறியதுடன் இதற்கான ஆதாரங்களாக அப்போதைய நாளிதழ்கள் வெளியிட்ட செய்தியையும் சுட்டிக்காட்டினார்.

எயார்செல் நிறுவனம் விற்பனைக்கு வந்தமை ஏப்ரல் 2004 எகனாமிக் டைம்சில் செய்தியாக வந்தது. ஜுன் 2004 எகனாமிக் டைம்சில் எயார்செல் நிறுவனத்தை ஹட்சிசன் ரூ. 1,600 கோடிக்கு விற்ற செய்தி உள்ளது.

டைம்ஸ் ஒப் இந்தியாவுக்கு அளித்த பேட்டியில் 1,600 கோடியை வைத்து என்ன செய்வது என்று தெரியவில்லை என சிவசங்கரன் கூறியுள்ளார். ஆகவே எயார்செல் நிறுவனம் நான் அமைச்சராகும் முன்பே விற்பனைக்கு வந்துவிட்டது" என்று தயாநிதிமாறன் தெரிவித்தார்.