தமிழர்களையும், அரசையும் வேறுபடுத்த முனைவோர் வடக்கிற்கு வந்து உண்மை நிலையை அறியுங்கள் - ஜனாதிபதி

பயங்கரவாதம் ஒழிக்கப்பட்டுவிட்டது. இடம்பெயர்ந்தவர்களை மீள்குடியேற்றம் செய்து அவர்களுக்கான பொருளாதாரத்தை மேம்படுத்துவதே அடுத்துள்ள சவால் என ஜனாதிபதி மஹிந்த ராஜபக்ஷ அவர்கள் தெரிவித்தார். சில ஊடகங்கள் தவறான பிரசாரத்தில் ஈடுபட்டுள்ளதுடன் தமிழ் மக்களுக்கும் அரசாங்கத்துக்கும் இடையிலான புரிந்துணர்வை சீர்குலைக்க முயற்சிக்கின்றன. இத்தகைய நடவடிக்கைகளில் ஈடுபடுவோர் வெளிநாடுகளில் ஈழக் கனவு காண்போரைத் திருப்திப்படுத்தவே செயற்படுகின்றனர். அரசாங்கம் வடக்கிற்குப் பெருமளவு நிதியைச் செலவிட்டு வருகிறது. உண்மை நிலையை அறியாதவர்களே வெளிநாடுகளில் அரசுக்கு எதிராக பிரசாரம் மேற்கொள்கின்றனர் எனவும் ஜனாதிபதி தெரிவித்தார்.

வடக்கு தெற்கு மக்களுக்கிடையில் வளர்ந்துவரும் புரிந்துணர்வையும் ஐக்கியத்தையும் சீர்குலைக்க முயலும் இவர்கள் நாட்டுக்கு வந்து உண்மை நிலையைக் கண்டறியுமாறு அழைப்புவிடுப் பதாகவும் ஜனாதிபதி தெரிவித்தார். சுயதொழிலுக்கான கடன் வழங்கும் தேசிய வைபவம் நேற்று ஜனாதிபதி மஹிந்த ராஜபக்ஷவின் தலைமையில் கிளிநொச்சி நகரில் நடைபெற்றது. புனர்வாழ்வு சிறைச்சாலைகள் மறுசீரமைப்பு அமைச்சின் ஏற்பாட்டில் நடைபெற்ற இந்நிகழ்வில் அமைச்சர்கள் சந்ரசிறி கஜதீர, டக்ளஸ் தேவானந்தா உட்பட முக்கியஸ்தர்கள் பலரும் கலந்து கொண்டனர்.

ஜனாதிபதி மஹிந்த ராஜபக்ஷ மேலும் உரையாற்றுகையில்:- 30 வருட யுத்தத்தின் பின்னர் மக்களுக்கான இயல்பு வாழ்க்கையைத் தோற்றுவிக்கும் நடவடிக்கைகளில் அரசாங்கம் கவனம் செலுத்தி வருகிறது. வடக்கின் உட்கட்டமைப்பைக் கட்டியெழுப்புவது போல தமிழ் மக்களின் வாழ்க்கையையும் கட்டியெழுப்பப்பட வேண்டும்.

இழந்த தொழில் துறைகளை மீள ஆரம்பித்தல் வீடுகளை நிர்மாணித்தல், தற்போதுள்ள தொழிலை மேம்படுத்தல் போன்ற நடவடிக்கைகளுக்காகவே இலங்கை வங்கியின் அனுசரணையுடன் இக்கடன் வழங்கப்படுகிறது.

மக்களை வலிமைப்படுத்துவதில் பக்கபலமாக அரசாங்கம் இருக்க வேண்டும். பயங்கரவாதத்தினால் மக்களின், உடமைகள், அரச கட்டிடங்கள் வீதிகள், குளங்கள் என சகலதும் அழிக்கப்பட்டுள்ளன. அவற்றை மீளக் கட்டியெழுப்பவும் மக்களுக்கான நட்டஈடுகளை வழங்கவும் நடவடிக்கை எடுத்து வருகிறோம்.

அழிவுற்ற பிரதேசங்களைக் கட்டியெழுப்புவது போன்றே உங்கள் பிள்ளைகளின் எதிர்காலத்தையும் பாதுகாப்பது எமது பொறுப்பு.

கோடிக்கணக்கில் கப்பம் பெற்று வெளி நாடுகளில் இருந்து பெருந்தொகை நிதியைப் பெற்றுக் கொண்டிருந்த புலிகள் உங்கள் பிள்ளைகளின் எதிர்காலம் பற்றிக் கவலைப்படவில்லை.

அதேபோன்று வெளிநாடுகளில் வாழ்பவர்கள் கொழும்புக்கு வந்து போகின்ற போதும், இப்பகுதிக்கு வருவதில்லை. தமிழில் பேசமாட்டார்கள். என்னைப் போன்று கூட அவர்களால் தமிழில் பேச முடியாது. அவர்கள் தமிழ் மக்களின் பெயரை வைத்து ஆங்கிலத்தில் பேசி நிதி திரட்டும் தொழிலையே மேற்கொள்கின்றனர்.

இதே போன்று சில அரசியல்வாதிகள் வசதியான சொகுசான வாழ்க்கை வாழ்ந்து கொண்டு தமது பிள்ளைகள் கூட வெளிநாடுகளிலேயே கல்வி கற்க அனுப்புகின்றனர். அவர்கள் ஒரு பாடசாலையையாவது உங்களுக்காக கட்டியுள்ளார்களா? உங்கள் எதிர்காலம், உங்கள் பிள்ளைகளைப் பற்றிய அக்கறை அவர்களுக்குக் கிடையாது.

தூதரகங்களில் பேச்சுவார்த்தை நடத்தி பத்திரிகைகளுக்கு அறிக்கை விடுவதே அவர்களின் தொழில்.

வடக்கு தெற்கு மக்களிடையே புரிந்துணர்வை ஏற்படுத்தி அதன்மூலம் அவர்களுக்கிடையிலான சந்தேகங்களை நீக்கி வடக்கை அபிவிருத்தியில் கட்டியெழுப்புவதே அரசாங்கத்தின் நோக்கம். இது விடயத்தில் தமிழ் மக்கள் சிந்தித்துச் செயற்பட வேண்டும் எனவும் ஜனாதிபதி தெரிவித்தார்.

இந்நிகழ்வில் தமிழில் உரையாற்றிய ஜனாதிபதி:-

தமிழ் மக்கள் 30 வருடகாலம் அனுபவித்த துன்ப துயரங்களை நான் அறிவேன். அத்தகையதொரு நிலை இனி வேண்டவே வேண்டாம்.