சங்கரி, சித்தார்த்தன், சிறிதரன் சந்திப்பு

‘தமிழ் மக்களுடனேயே நாம்’ - இந்திய தூதுக்குழு

யுத்தத்திற்குப் பின்னரான தற்போதைய நிலைமையில் தமிழ் மக்கள் எதிர்கொண்டுள்ள பிரச்சினைகள் மற்றும் நீண்டகாலமாக இழுபறிபட்டுக்கொண்டிருக்கும் அரசியல் தீர்வு உட்பட பல்வேறு பிரச்சினைகள் குறித்து இலங்கைக்கு வருகை தந்துள்ள இந்திய உயர்மட்ட தூதுக்குழுவினருடன் தமிழ்த் தேசியக் கூட்டமைப்பு நேற்று சனிக்கிழமை விரிவான பேச்சுவார்த்தையை நடத்தியதாக தெரிவித்திருக்கும் அதேசமயம், தமிழ் மக்களுக்கு நீங்கள்  விடுக்கும் செய்தி என்ன? என்று கேட்ட போது "நாங்கள் தமிழ் மக்களுடனேயே இருக்கின்றோம்' என்று இந்திய உயர் அதிகாரிகள் குழு சுருக்கமான பதிலை அளித்ததாக சந்திப்பில் கலந்துகொண்ட கூட்டமைப்பின் முக்கியஸ்தர் ஒருவர் தெரிவித்தார்.

இலங்கைக்கு வருகை தந்துள்ள இந்திய தேசிய பாதுகாப்பு ஆலோசகர் சிவ்சங்கர் மேனன், வெளிவிவகாரச் செயலாளர் நிருபமா ராவ், பாதுகாப்புச் செயலாளர் பிரதீப் குமார், இந்தியத் தூதுவர் அசோக் கே காந்தா, ஆகியோரைக் கொழும்பிலுள்ள இந்திய இல்லத்தில் தமிழ்த் தேசியக் கூட்டமைப்பின் பிரதிநிதிகள் சந்தித்து பேச்சுவார்த்தை நடத்தினர்.
சுமார் ஒரு மணிநேரம் இடம்பெற்ற இச்சந்திப்பில் தமிழ்த் தேசியக் கூட்டமைப்பின் பாராளுமன்றக் குழுத் தலைவர் இரா.சம்பந்தன், தமிழரசுக் கட்சியின் பொதுச் செயலாளர் மாவை சேனாதிராஜா மற்றும் அக்கட்சி எம்.பி.க்களான சுரேஷ் பிரேமச்சந்திரன் செல்வம் அடைக்கலநாதன், எம்.ஏ. சுமந்திரன், ஜனாதிபதி சட்டத்தரணி கே.கனகஈஸ்வரன் ஆகியோர் கலந்துகொண்டனர்.

இச்சந்திப்பு தொடர்பாக கூட்டமைப்பு எம்.பி. சுரேஷ் பிரேமச்சந்திரன் கூறுகையில்;
யுத்தத்தால் பாதிக்கப்பட்ட வட, கிழக்கு மக்கள் மீண்டும் இயல்பு வாழ்க்கைக்குத் திரும்புவதற்குத் தேவையான உடனடி நடவடிக்கைகள் அப்பகுதிகளில் வாழும் மக்களது எதிர்காலத்தை மோசமாகப் பாதிக்கக்கூடிய விதத்தில் இடம்பெற்று வரும் விடயங்கள் நிலையான அரசியல் தீர்வு போன்ற விடயங்களை இந்திய தரப்பிற்கு எடுத்துக் கூறினோம் என்று குறிப்பிட்டார்.

 
வட, கிழக்கில் வாழும் மக்களுக்கு மோசமான பாதிப்பை ஏற்படுத்தக் கூடிய விதத்தில் காணிகள் சுவீரிக்கப்படுதல், காணிகள் கையகப்படுத்தல், வணக்கஸ்தலங்கள் கலாசார இடங்கள் சுவீகரிக்கப்படுதல் போன்ற நடவடிக்கைகள் முன்னெடுக்கப்படுவது குறித்து நாம் இந்திய உயர்மட்டத் தூதுக்குழுவிடம் எடுத்துரைத்தோம்.

 
தமிழ் பேசும் மக்களின் கௌரவத்தையும் பாதுகாப்பையும் உறுதிப்படுத்தக் கூடியதும் நீடித்து நிலைபெறக்கூடியதுமான அரசியல் தீர்வொன்றின் அவசியம் குறித்தும் அவர்களின் கவனத்திற்குக் கொண்டு சென்றோம். இந்த உடனடித் தேவைகளை நிறைவேற்றுவதன் மூலமே தமிழ் மக்கள் இந்த நாட்டிற்கு உரித்துடையவர்கள் என்ற நம்பிக்கை ஏற்படும் என்ற விடயத்தையும் நாங்கள் அவர்களின் கவனத்திற்குக் கொண்டு சென்றோம் என்று சுரேஷ் பிரேமச்சந்திரன் கூறினார்.

தமிழ் மக்களின் இந்த அபிலாஷைகள் நிறைவேற்றப்படுவதன் மூலமே இலங்கையில் இனங்கள் மத்தியில் உண்மையான நல்லிணக்கத்திற்கு வழிவகுக்கும் என தாங்கள் எடுத்துக் கூறியதாகவும் இந்தியத் தரப்புடனான பேச்சுவார்த்தை ஒளிவு மறைவின்றி திறந்த மனதுடன் இடம்பெற்றதாகவும் குறிப்பிட்டார்.

இதேவேளை, இந்தியத் தூதுக்குழுவினரின் பதில் என்ன என்று யாழ்.மாவட்ட எம்.பி. மாவை சேனாதிராஜாவிடம் தொடர்பு கொண்டு கேட்டபோது நாங்கள் தமிழ் மக்களுடன் இருக்கின்றோம் என்ற பதிலை அவர்கள் தந்ததாக அவர் கூறினார்.

சங்கரி, சித்தார்த்தன், சிறிதரன் சந்திப்பு
இதுஇவ்வாறிருக்க தமிழர் விடுதலைக் கூட்டணியின் தலைவர் வி.ஆனந்தசங்கரி, புளொட் அமைப்பின் தலைவர், த.சித்தார்த்தன், ஈ.பி.ஆர்.எல்.எவ்.பத்மநாபா அணியின் தலைவர் சிறிதரன் ஆகியோரும் இந்திய தூதுக்குழுவினரை நேற்று சந்தித்துக் கலந்துரையாடியுள்ளனர்.
வட, கிழக்கில் பாரிய பிரச்சினையாக சிவில் நிர்வாகத்தில் காணப்படும் இடையூறுகள் இராணுவத்தின் அளவுக்கு மீறிய இடையூறுகள் என்பன குறித்த பல சம்பவங்களை இந்தியத் தூதுக்குழுவினரிடம் தாங்கள் எடுத்துரைத்ததாக சித்தார்த்தன் கூறினார்.
இந்திய அரசாங்கம் இடம்பெயர்ந்த தமிழ் மக்களின் புனர்வாழ்வுக்காக உதவிய பொருட்கள் தற்போது ஓரளவுக்கு பயன்படுத்தக் கூடியதாக இருப்பதாகத் தாங்கள் கூறியதாக அவர் தெரிவித்தார். அதேவேளை, காணிப் பிரச்சினைகள் அதிகாரப் பரவலாக்கம் தொடர்பாக தாங்கள் மிகத் தெளிவாகவும் விளக்கமாகவும் இந்தியக் குழுவினருக்கு எடுத்துக் கூறியதாகவும் சித்தார்த்தன் தெரிவித்தார். இந்த விடயங்களைக் கவனமாக செவிமடுத்த இந்திய அதிகாரிகள் குழுவினர் இவை தொடர்பாக கவனமெடுப்பதாகவும் கிடைக்கும் விடயங்களை உடனுக்கடன் தங்களுக்கு அறிவித்தால் தங்களால் இயன்ற அளவுக்கு அரசுக்கு அழுத்தம் கொடுத்து அவற்றை நிறைவேற்ற ஆவன செய்ய முயற்சிப்பதாகவும் தங்களிடம் உறுதியளித்ததாக சித்தார்த்தன் குறிப்பிட்டார்.