அரசுதமிழ்க் கூட்டமைப்பு பேச்சு விரைவில் முறிவடையும் அறிகுறி நல்லூர் கூட்டத்தில் கூட்டமைப்பு எம்.பி.க்கள் சூசகம்

வட, கிழக்கு தமிழ் மக்களின் பெரும்பான்மைப் பிரதிநிதித்துவத்தைக் கொண்ட பெரிய கட்சியான தமிழ்த் தேசியக் கூட்டமைப்பிற்கும் அரசாங்கத்திற்கும் இடையிலான பேச்சுவார்த்தைகள் விரைவில் முறிந்துவிடும் அபாயம் காணப்படுகிறது. அக்கட்சியின் பேச்சாளரான யாழ்.மாவட்ட எம்.பி. சுரேஷ் பிரேமச்சந்திரன் இது தொடர்பான நம்பிக்கையீனத்தை நேற்று யாழ்ப்பாணம் நல்லூரில் இடம்பெற்ற கூட்டத்தின் போது தெரிவித்துள்ளார். அரசியல் தீர்வு காண்பதற்காக பாராளுமன்ற தெரிவுக் குழுவை அமைக்கப்போவதாக அரசாங்கம் தெரிவித்துள்ள நிலையில், அது காலம் கடத்தும் நாடகம் என சுரேஷ் பிரேமச்சந்திரன் குறிப்பிட்டுள்ளார். யுத்தம் முடிவடைந்த நிலையிலும் தமிழ் மக்களின் பிரச்சினைகளுக்கு  தீர்வு காணப்படவில்லை.

அதற்கான வலியுறுத்தல்களைத் தொடர்ந்து விடுத்துவரும் நாம் இன்று சிவில் நிர்வாகம் அற்ற நிலையிலேயே தொடர்ந்தும் இருந்து வருகிறோம். இதனை பகிரங்கமாகக் கூறினால். இராணுவத்தினருக்கு விசனம் ஏற்படுகிறது. இத்தகைய நிலையில் ஜனநாயகம் எங்கே இருக்கின்றது என்று அவர் கேள்வி எழுப்பினார்.

யாழ்.மாவட்டத்தில் உள்ளூராட்சிச் சபைத் தேர்தலில் தமிழ்க் கூட்டமைப்பின் சார்பில் போட்டியிடவுள்ள வேட்பாளர்களின் அறிமுகக் கூட்டம் நல்லூர் இளம்கலைஞர் மன்றத்தில் நேற்று சனிக்கிழமை இடம்பெற்றது. தமிழரசுக் கட்சியின் பொதுச் செயலாளர் மாவை சேனாதிராஜா தலைமையில் இடம்பெற்ற இக்கூட்டத்தில் உரையாற்றிய சுரேஷ் பிரேமச்சந்திரன் இலங்கை சுதந்திரமடைந்த காலம் தொட்டே தமிழ் மக்களின் பிரச்சினைகளுக்குத் தீர்வு காணப்படாமல் இழுத்தடிக்கப்படுவதாகத் தெரிவித்தார்.

அவ்வப்போது பிரச்சினைகளுக்குத் தீர்வு காண்பதாக உடன்படிக்கைகள் மேற்கொள்ளப்படுவதும் அவை கிழித்தெறியப்படுவதும் கடந்த கால வரலாறு எனக் கூறிய அவர் யாவுமே குப்பைத் தொட்டிக்குள் சென்றுவிட்டதாகச் சுட்டிக்காட்டினார்.

 
கடந்த 6 மாத காலமாக அரசாங்கம் தமிழ்க் கூட்டமைப்புடன் பேசி வருவதாகவும் ஆனால் அதனையும் விரைவில் முறித்துவிட அரசு போகிறது என்றும் அவர் குறிப்பிட்டார். பாராளுமன்றத் தெரிவுக் குழுவை அமைக்கப்போவதாக தற்போது கூறுவது போர்க்குற்றச்சாட்டுகளிலிருந்து தப்புவதற்கான முயற்சி எனவும் காலம் கடத்தும் நாடகம் என்றும் அவர் வர்ணித்துள்ளார். அரசாங்கத்திற்கு பல்வேறு அழுத்தங்கள் ஏற்பட்டுக்கொண்டிருக்கின்றன. எமக்காக உலகம் பேசும் காலம் இது சர்வதேச அரங்கில் என்றும்  இல்லாதவாறு தமிழ் மக்களுக்கு சாதகமான நிலைமை உள்ளது. ஆனால், அரசாங்கமோ நீண்டகாலத்திட்டங்களுடன் இராணுவமயமாக்கலை மேற்கொள்கிறது. ஒட்டுமொத்தத் தமிழ் இனமும் அடிமைகளாக வாழ வேண்டும் என்பதே அவர்களின் பதிலாகத் தென்படுகிறதே தவிர வேறு எதுவும் இல்லை.

சர்வதேசத் தலைவர்களை நாம் சந்திக்கும் போது எம் மக்களினது மீள்குடியேற்றம் உயர்பாதுகாப்பு வலயம் நீக்கப்படவேண்டும். தடுத்து வைக்கப்பட்டோர் விடுவிக்கப்படவேண்டும் என்ற விடயங்களைப் பேசிவருகிறோம். அது தொடர்பாக அவர்கள் அரசாங்கத்திடமும் கேட்கின்றது. இத்தகைய அழுத்தங்களினால் அரசாங்கம் சில நடவடிக்கைகளை மேற்கொள்கிறது. இன்று தமிழ் மக்களின் நிலங்கள் ஆக்கிரமிக்கப்பட்டு அபகரிக்கப்படுகிறது. இந்தப் பரந்த உலகில் எல்லோருக்கும் சகல நேரத்திலும் சந்தர்ப்பம் கிட்டிவிடாது ஆனால், இத்தனை இழப்புகளுக்கு மத்தியிலும் எமக்கு சந்தர்ப்பம் கிட்டியுள்ளது. தலைநிமிர்ந்து உரிமையுடன் வாழக்கூடிய சுதந்திரம் எமக்குக் கிடைக்கவேண்டுமென்பதே எதிர்பார்ப்பு. அதனையே நாம் கோருகின்றோம் என்று சுரேஷ் பிரேமச்சந்திரன் தெரிவித்தார்.

இதேவேளை, இக்கூட்டத்தில் கலந்துகொண்டு உரையாற்றிய சுமந்திரன் எம்.பி. கருத்துத் தெரிவிக்கையில்; அரசாங்கத்திற்கும் கூட்டமைப்பிற்குமிடையிலான பேச்சுகளில் பலனில்லை. ஆனால், அதில் பங்குபற்ற வேண்டிய தேவையுள்ளது. நாங்கள் பேசாவிட்டால் வேறு சிலர் பேசித் தீர்த்துவிடுவார்கள். அரசாங்கம் யாருடனும் பேசலாம். ஆனால், தமிழ்த் தேசியக் கூட்டமைப்பை ஏற்றுக்கொள்ளாத தீர்வை தமிழ் மக்கள் மத்தியில் திணிக்க முடியாது என்று கூறினார்.

உள்ளூராட்சித் தேர்தல் பிரசாரம் சூடாக ஆரம்பித்திருக்கிறது. கூட்டமைப்பை எவ்வளவு தூரத்திற்கு பின்தள்ளி சிதைக்க முடியும் என்பதற்கான மிகத் தேவையான காலகட்டம் அரசுக்கு உள்ளது. அதனால் எமது நீண்டகால அரசியல் அபிலாசைகளை நிறைவேற்றுவதற்கு நாங்கள் நிதானத்துடனும் அரசியல் சாணக்கியத்துடனும் சிந்தித்து செயற்பட வேண்டிய தேவையுள்ளது. அரசுடன் பேசுவதால் பயனில்லை என்று அறிந்தும் பேச வேண்டிய தேவை இருப்பதால் பேசுகிறோம். அதைத் தவிர வேறு ஒன்றும் இல்லை. தமிழ் மக்களுக்காக எங்கெல்லாம் அமர்ந்து பேச வேண்டுமோ அங்கெல்லாம் பேசி வருகிறோம்.

சர்வதேச பலம் எப்போதும் தமிழ் மக்களுக்கு இருத்தல் வேண்டும். தற்போது சர்வதேச அழுத்தமே தமிழ் மக்களுக்கு பிரதான பலமாக உள்ளது. உரிமைக்காகப் பேசும் நாம் சாதகமான தன்மை இல்லாவிட்டாலும் எமது பொறுப்பிலிருந்து விலகமாட்டோம். மக்கள் விரும்பும் தீர்வை ஏற்றுக்கொள்வோம். காணி, பொலிஸ் அதிகாரிகள் தேவையில்லை என்றும் அபிவிருத்தி மட்டுமே போதும் என்ற தொனியிலும் சிலர் பேசுகின்றனர் என்றும் சுமந்திரன் விசனம் தெரிவித்தார்.