திருமலை கிரிக்கெட் வீரர் கொலைச் சம்பவம்: விமானி உட்பட இருவர் கைது

மனைவியை பிடிக்க இன்டர்போல் உதவியை நாடுகிறது இலங்கை . கள்ளக்காதல் தொடர்பே காரணம்

திருகோணமலை, ஐயனார்கேணி பிரதேசத்தில் கடந்த ஒன்றரை மாதத்திற்கு முன்னர் ஈஸ்ரவதாஸன் கேதீஸ்வரன் என்பவர் வெட்டிக் கொல்லப்பட்ட சம்பவம் தொடர்பில் லண்டனில் உள்ள அவரது மனைவியை கைதுசெய்ய இன்டர்போலின் உதவியை இலங்கை நாடியுள்ளது. இந்தக் கொலைச் சம்பவத்துடன் தொடர்புடைய பிரதான சந்தேக நபர்கள் இருவரை குற்றப் புலனாய்வுத் திணைக்கள பொலிஸார் கைது செய்துள்ளதாக பொலிஸ் ஊடகப் பேச்சாளர், பொலிஸ் அத்தியட்சகர் அஜித் ரோஹன தெரிவித்தார்.

கொழும்பு பிரதேசத்தைச் சேர்ந்த 26 மற்றும் 30 வயதுடைய இரண்டு சிங்கள வர்களே கைது செய்யப்பட்டுள்ளனர். இவர்களில் ஒருவர் விமானி என ஆரம்பக்கட்ட விசாரணைகளிலிருந்து தெரிய வந்துள்ளதாக அவர் மேலும் தெரிவித்தார். தனது கணவரை கொல்ல விமானிக்கு 1750 பவுன் பணம் கொடுத்த குற்றச்சாட்டின் பேரிலேயே லண்டனிலுள்ள பெண்ணை கைது செய்ய சி. ஐ. டி. பொலிஸார் சர்வதேச பொலிஸாரின் ஒத்துழைப்பை நாடவுள்ளதாக அவர் மேலும் சுட்டிக்காட்டினார்.

இந்தச் சம்பவம் தொடர்பாக மேலும் தகவல் தருகையில் :கடந்த 2012, 4 ஆம் மாதம் 18 ஆம் திகதி 28 வயதுடைய கிரிக்கெட் வீரரான ஈஸ்வரதாஸன் கேதீஸ்வரன் என்பவர் கழுத்து வெட்டப்பட்டு கொலை செய்யப்பட்டிருந்தார்..

இவரது சடலத்தை மீட்டெடுத்த பொலிஸார் விசாரணைகளை ஆரம்பித்தனர். எனினும் இந்தக் கொலைச் சம்பவத்திற்கும் இராணுவம் மற்றும் பொலிஸாருக்கும் தொடர்பு என்று வெளிநாடுகளிலுள்ள சில புலம் பெயர் தமிழர்களால் குற்றஞ் சுமத்தப்பட்ட நிலையில் சி. ஐ. டி. பொலிஸார் இந்தச் சம்பவம் தொடர்பான விசாரணைகளை முடுக்கிவிட்டனர்.

இந்த கொலைச் சம்பவம் தொடர்பான பகுப்பாய்வு அறிக்கையை வைத்து விசாரணைகளை துரிதமாக மேற்கொண்டு வந்த சி. ஐ. டியினர் நேற்றுக் காலை பிரதான சந்தேக நபர்கள் இருவரை கைதுசெய்துள்ளனர்.

கைது செய்யப்பட்டவர்களில் ஒருவரான விமானிக்கும் கொலை செய்யப்பட்ட ஈஸ்வரதாஸன் கேதீஸ்வரனின் மனைவிக்கும் இடையில் லண்டனில் வைத்து கள்ளத் தொடர்பு இருந்து வந்துள்ளமை விசாரணைகளிலிருந்து தெரிய வந்துள்ளன.

லண்டனிலுள்ள பெண் இலங்கையிலு ள்ள தனது கணவனை கொலை செய்வதற்காக 1750 பவுன்பணத்தை கொடுத்துள்ளார். இதன் பின்னணியிலேயே ஈஸ்வரதாஸன் கேதீஸ்வரன் வெட்டிக் கொல்லப்பட்டுள்ளமை தெரிய வந்துள்ளது.

இதனை அடுத்து இந்த கொலைச் சம்பவத்தின் பிரதான சூத்திரதாரியான லண்டனிலுள்ள பெண்மணியை கைது செய்ய சர்வதேச பொலிஸார் ஊடாக சிவப்பு அறிக்கை வெளியிட நடவடிக்கை எடுத்துள்ளதாக குற்றப் புலனாய்வு திணைக்கள பொலிஸார் தெரிவித்தனர். கைது செய்யப்பட்ட இரு சந்தேக நபர்களையும் திருகோணமலை மஜிஸ்திரேட் நீதிவான் முன்னிலையில் ஆஜர்படுத்த பொலிஸார் நடவடிக்கை எடுத்துள்ளனர்.

சந்தேக நபர்களின் வாக்குமூலங்களின் அடிப்படையில் பல்வேறு கோணங்களில் விசாரணைகளை சி. ஐ. டி. யினர் மேற்கொண்டு வருகின்றனர்.

இந்தச் சம்பவத்துடன் தொடர்புடைய சந்தேக நபர்கள் கைதுசெய்யப்பட்டதன் மூலம் படையினர் மற்றும் பொலிஸார் மீது அடிப்படை அற்ற முறையில் மேற்கொள்ளப்பட்ட குற்றச்சாட்டுக்கள் பொய்யாகியுள்ளது என்றும் பொலிஸ் ஊடகப் பேச்சாளர் சுட்டிக்காட்டினார்.

(தினகரன்)