நல்லிணக்க ஆணைக்குழுவின் பரிந்துரைகளில் பலவற்றை இவ்வாண்டினுள் அமுல்படுத்த தீர்மானம்

கற்றுக்கொண்ட பாடங்கள் மற்றும் நல்லிணக்க ஆணைக்குழுவின் அறிக்கையில் தெரிவிக்கப்பட்டுள்ள 135 பிரதான பரிந்துரைகளில் பலவற்றை அரசாங்கம் இவ்வாண்டில் நடைமுறைப்படுத்தும் என்று ஜனாதிபதியின் செயலாளர் லலித் வீரதுங்க கூறினார். அடுத்தாண்டில் இந்த சிபாரிசுகளை நிறைவேற்றுவதற்கு நிதி அவசியம் என்பதனால் அடுத்த வரவு செல வுத்திட்டத்தில் அதற்கான நிதி ஒதுக்கப்படும் என்றும் அவர் கூறினார். அரசாங்கத்துடன் தொடர்புடைய சகல திணைக்களங்கள் மற்றும் ஏனைய அமைப்புகளுடன் ஒன்றிணைந்து ஒரு முகமாக நல்லிணக்க ஆணைக்குழுவின் சிபாரிசுகளை நிறைவேற்றுவதற்கு நடவடிக்கை எடுக்க வேண்டும்.  அதற் காக, நல்லிணக்க ஆணைக்குழுவின் சிபாரிசுகளை நிறைவேற்றுவதற்காக தனது தலைமையில் ஒரு செயலணியை ஏற்படுத்துவதென்று கடந்த மே மாதம் 2ம் திகதியன்று அமைச்சரவை தீர்மானித்திருக்கிறதென்றும் திரு. லலித் வீரதுங்க தெரிவித்தார்.

ஜனாதிபதி அவர்கள் இந்த நல்லிணக்க ஆணைக்குழுவின் சிபாரிசுகளை நடைமுறைப்படுத்துவது குறித்து பிரிட்டிஷ் வெளிவிவகார அமைச்சர் வில்லியம் ஹேக்குடனும் பேச்சுவார்த்தை நடத்தியுள்ளார். எல்.ரீ.ரீ.ஈயை ஆதரிக்கும் புலம்பெயர் ந்த தமிழர்களுக்கு தலைகுனிவதா? அல்லது அவர்களின் சவால்களுக்கு வெற்றிகரமாக முகம் கொடுப்பதா? என்ற கேள்விக்கு ஜனாதிபதி அவர்களும் அரசாங்கமும் எந்த சவாலுக்கும் வெற்றிகரமாக முகம் கொடுப்பதென தீர்மானித்துள்ளார்கள்.

எல்.ரீ.ரீ.ஈயின் இந்த புலம்பெயர்ந்த தமிழர்களில் பெரும்பாலானோர் சுமார் 40 ஆண்டுகளுக்கு முன்னர் இலங் கையில் இருந்து லண்டன் சென்றி ருக்கும் பொருளாதார அகதிகளாகும். அவர்களுக்கு இங்குள்ள தமிழர்களைப்பற்றி கரிசனையில்லை. அவர்களை நாம் பொருட்படுத்தவும் மாட்டோம் என்று ஜனாதிபதியின் செயலாளர் லலித் வீரதுங்க தெரிவித்தார்.

ஜனாதிபதி ஆற்றவிருந்த உரை மாத்திரமே ரத்து

ஜனாதிபதி மஹிந்த ராஜபக்ஷ அவர்களின் 3 நாள் உத்தியோகபூர்வ பிரிட்டிஷ் விஜயம் இலங்கை பிரிட்டன் ஆகிய நாடுகளின் நட்புறவில் ஒரு புதிய மைல் கல்லாக அமைந்துள்ளது.

இந்த விஜயத்தின் போது ஜனாதிபதி அவர்கள் தமது பாரியார் சகிதம் பிரிட்டிஷ் மகாராணி எலிசபெத், பிரிட்டனின் முடிக்குரிய இளவரசர் சாள்ஸ், பிரிட்டிஷ் பிரதமர் டேவிட் கெமரூன் மற்றும் பிரிட்டனின் பல கட்சிகளைச் சார்ந்த பலம் வாய்ந்த 20 பாராளுமன்ற உறுப்பினர்களையும், பிரபுக்கள் சபை உறுப்பினர்களையும் சந்தித்து இலங்கையின் அரசியல் நிலைமை குறித்தும் நல்லிணக்க ஆணைக்குழு அறிக்கை சிபாரிசுகளை நிறைவேற்றுவது குறித்தும் ஜனாதிபதி பேச்சுவார்த்கைளை நடத்தினார்.

ஜனாதிபதி அவர்களின் பிரிட்டிஷ் விஜயத்தின் முக்கிய நிகழ்வுகளில் ஒன்றாக பெக்கிங்ஹம் மாளிகையில் பிரிட்டிஷ் மகாராணியார் அளித்த விருந்துபசாரத்தில் கலந்து கொண்டது அமைந்துள்ளது. அதையடுத்து, றோயல் ஹவுஸில் பிரிட்டனில் உள்ள பிரபல இசைக்கலைஞர்களின் ஒரு இசை நிகழ்ச்சி ஒன்றிலும் ஜனாதிபதி மஹிந்த ராஜபக்ஷ தனது பாரியார் சகிதம் கலந்து கொண்டார்.

அதையடுத்து, சென்போல்ஸ் தேவாலயத்தில் சுமார் 1000 விருந்தினர்கள் கலந்து கொண்ட நன்றி திருப்பலி பூஜையிலும் ஜனாதிபதி பாரியார் சகிதம் கலந்து கொண்டார். அதற்கு பின்னர் லண்டனில் உள்ள இலங்கையின் உயர்ஸ்தானிகர் டாக்டர் கிறிஸ் நொனிஸ் தமது உத்தியோகபூர்வ வாசஸ்தலத்தில் அளித்த விருந்துபசாரத்தில் ஜனாதிபதியை 20 பிரிட்டிஷ் பாராளுமன்ற உறுப்பினர்கள் சந்தித்து பலதரப்பட்ட விடயங்கள் குறித்தும் ஜனாதிபதியுடன் கலந்துரையாடினார்கள்.

இந்த நிகழ்ச்சிகள் அனைத்தும் பெரும் வெற்றிகரமாக நடைபெற்ற போதிலும் மென்சன் ஹவுஸில் ஜனாதிபதி அவர்கள் பிரிட்டனில் உள்ள வர்த்தக முதலீட்டாளர்கள் முன்னிலையில் ஆற்றவிருந்த உரை மாத்திரமே எல்.ரி.ரி.ஈயை ஆதரிக்கும் புலம்பெயர்ந்த தமிழர்களின் ஆர்ப்பாட்டம் காரணமாக ரத்து செய்யப்பட்டது.

இதனை விட மற்ற ஜனாதிபதி கலந்து கொண்ட நிகழ்ச்சிகள் அனைத்துமே மகத்தான வெற்றியடைந்தன என்று உயர்ஸ்தானிகர் டொக்டர் கிறிஸ் நோனிஸ் மேலும் தெரிவித்தார்.