நில ஆக்கிரமிப்பைக் கண்டித்து நாளை யாழ். நகரில் ஆர்ப்பாட்டம்

தமிழர் தாயகப் பகுதிகளில் தொடரும் நில ஆக்கிரமிப்பை கண்டித்து நாளை திங்கட்கிழமை யாழ்.நகரினில் தமிழ் தேசிய மக்கள் முன்னணி நடத்தவிருக்கும் எதிர்ப்பு போராட்டத்திற்கு பல்வேறு தரப்புக்களும் தமது ஆதரவை வெளிப்படுத்தி வருகின்றன. நாளை பிற்பகல் ஒரு மணிக்கு யாழ். மத்திய பஸ் நிலையம் முன்பதாக தமிழ்த் தேசிய மக்கள் முன்னணியின் ஏற்பாட்டில் இந்த எதிர்ப்புப் போராட்டம் நடைபெறவுள்ளது. வடகிழக்கு தமிழர் தாயகப் பகுதிகளில் நிரந்த படைத்தளங்களை அமைப்பதற்கு முப்படைகளும் தயாராகி வருகின்றன. வன்னியில் அண்மைக் காலங்களில் சுவீகரித்த இடங்களிலும், யாழ் .குடாநாட்டில் 1996ஆம் ஆண்டு முதல் படைதரப்பு நிலைகொண்டுள்ள அரச மற்றும் தனியார் நிலங்கள் மற்றும் கட்டிடங்களிலும் நிரந்தர படைத்தளங்களை அமைக்கும் முயற்சிகள் முனைப்பு பெற்றுள்ளன.

குறிப்பாக உள்ளூராட்சி சபைகள் வசமிருக்கும் காணிகளை மீள சுவீகரிக்கவும் அரசு தயாராகி வருவதாக தகவல்கள் வெளியாகியுள்ளன. அரசு சத்தமின்றி திட்டமிட்டு முன்னெடுத்து வரும் நில அபகரிப்பு நடவடிக்கைக்கு முழுமையாக எமது எதிர்ப்பை அகிம்சை வழியில் தெரிவிக்கவே நாம் முற்பட்டுள்ளோம். உயர் பாதுகாப்பு வலயம் காரணமாக வெளியேற்றப்பட்ட 40 ஆயிரத்திற்கும் மேற்பட்ட மக்கள் 22 வருடங்கள் கடந்தும் அகதிகளாக வாழ்கின்றனர். நலன்புரி நிலையங்களிலும் உறவினர் , நண்பர்கள் வீடுகளிலும் அவர்களது சகல வாழ்க்கை தொடர்கின்றது. எவ்வாறு மீளக்குடியமர முடியும், சொந்த இடங்களுக்கு திரும்ப முடியுமென்ற அவர்களது கனவுகள் பொய்த்துப் போயுள்ளது.

எம்மை பொறுத்தவரை மக்கள் குடியிருப்புக்கள் மத்தியில் படைத்தரப்புக்களது பிரசன்னம் ஏற்றுக்கொள்ள முடியாததொன்று. எமது எதிர்ப்பை வெளிப்படுத்தும் வகையில், எம்முடன் ஒன்று திரள பல தரப்புக்களும் முன் வந்துள்ளன. மக்கள் தமது கருத்துக்களை அகிம்சை வழியில் தெரிவிக்க கூட அனுமதி மறுக்கப்பட்டுள்ள சூழலில், இத்தகைய போராட்டத்திற்கு கட்சி வேறுபாடுகளை கடந்து அனைவருக்கும் அழைப்பு விடுப்பதாக தமிழ் தேசிய மக்கள் முன்னணி பொதுச் செயலாளர் செல்வராசா கஜேந்திரன் தெரிவித்தார்.