தெரிவுக்குழுவில் இணைவதா ? இல்லையா ? தமிழ்க் கூட்டமைப்பு விரைவில் இறுதி முடிவு

இனநெருக்கடிக்கான அரசியல் தீர்வு தொடர்பான விஷேட பாராளுமன்றத் தெரிவுக் குழுவில் தமிழ்த் தேசியக் கூட்டமைப்பு பங்கேற்பதா ? இல்லையா? என்பது பற்றி கூட்டமைப்பின் அடுத்த சந்திப்பில் பேசப்படும் என்று அக் கட்சியின் பேச்சாளரும் யாழ். மாவட்ட எம். பி. யுமான சுரேஷ் பிரேமச்சந்திரன் தெரிவித்தார். தனிப்பட்ட பயணமாக இந்தியா சென்றிருந்த  தமிழ்க் கூட்டமைப்பின் தலைவர் இரா. சம்பந்தன் நேற்று புதன்கிழமை நாடு திரும்பியுள்ள நிலையில் அவரது இந்திய பயணத்தின் பின்னரான கூட்டமைப்பின் முதலாவது சந்திப்பிலேயே மேற்படி  விடயம்  பற்றிப் பேசப்படும் என்று சுரேஷ் பிரேமச்சந்திரன் எம். பி. குறிப்பிட்டார்.

இன நெருக்கடிக்கான அரசியல் தீர்வு தொடர்பான அரசு  தமிழ்க் கூட்டமைப்பு  இருதரப்பு பேச்சுக்கள் மட்டுமல்லாது விஷேட  பாராளுமன்ற தெரிவுக் குழு விடயமும்  தொடர்ந்து இழுபறி நிலையில் இருந்து வருவதால் தமிழ்த் தேசியக் கூட்டமைப்பின் அடுத்தகட்ட நடவடிக்கை என்ன  என்ற கேள்விக்கு பதிலளித்த சுரேஷ் பிரேம சந்திரன், பேச்சுக்களை முன்னெடுக்க கடந்த  ஜனவரி மாதம் முதல் தற்போதைய ஜூன் மாதம் வரை அரசாங்கம் எந்த நடவடிக்கையையும் எடுக்கவில்லை. பாராளுமன்ற தெரிவுக்குழு என்று ஏமாற்று வித்தை காட்டிக் கொண்டு பிரச்சினைக்கான தீர்வு , இரு தரப்பு பேச்சுக்கள் என்பன தொடர்பான எந்த முயற்சிகளையும் முன்னெடுப்புகளையும் அரசாங்கம் மேற்கொள்ளவில்லை.

ஆதலால் சம்பந்தன் இந்தியாவில் இருந்து நாடு திரும்பியதும் நடைபெறும் தமிழ்க் கூட்டமைப்பின் முதலாவது கூட்டத்தில் இவ் விடயத்தில் திட்டவட்டமான முடிவொன்று எடுப்பது தொடர்பாக கூட்டமைப்பு பேசும் என்று நம்புகிறோம். அதாவது தமிழ்த் தேசியக் கூட்டமைப்பு எப்படியாவது பாராளுமன்றத் தெரிவுக் குழுவுக்கு வரும் என்ற எண்ணப்பாட்டில்  அரசாங்கம் இருக்கிறது.  எனினும், தெரிவுக் குழுவுக்குப் போவதில்லை என்று தமிழ்த் தேசிக் கூட்டமைப்பு இருக்கிறது. அது மட்டுமல்லாது தெரிவுக் குழுவுக்கு அழைத்தும் தமிழ்த் தேசியக் கூட்டமைப்பு வரவில்லை என்று அரசாங்கம் பிரசாரம் செய்து கொண்டிருக்கிறது.

எனவே இதற்குச் செல்வதா அல்லது இல்லையா என்று தெளிவான முடிவொன்று எடுக்க வேண்டும். அரசாங்கம் பிரசாரம் செய்வது  போன்று தெரிவுக் குழுவின் மூலம் எதுவும் நடந்துவிடாது என்பதை சர்வதேச சமூகத்துக்கு தெளிவாக எடுத்துக் கூற வேண்டும். அதற்கு உறுதியான முடிவொன்றை எடுத்தாக வேண்டும். அரசாங்கம்  உலக நாடுகளை ஏமாற்றுவதற்கு தமிழ்த் தேசியக் கூட்டமைப்பு இடமளிக்கக் கூடாது. அதற்கேற்றவாறு உறுதியான முடிவொன்றை எடுக்க வேண்டும் என்று கூறினார்.

இதேநேரம் இனநெருக்கடிக்கான அரசியல் தீர்வு தொடர்பாக அரசாங்கத்துக்கும்  தமிழ்த் தேசியக் கூட்டமைப்புக்கும் இடையில் ஏற்கனவே இருதரப்பு பேச்சுக்கள் நடைபெற்று  வந்த நிலையில் இடை நடுவே பாராளுமன்றத் தெரிவுக்குழு யோசனையை முன்வைத்த அரசாங்கம் தமிழ்த் தேசியக் கூட்டமைப்பு தெரிவுக் குழுவில் பங்கேற்றால் தான் பேச்சுக்கள் தொடரும் என்று இருதரப்பு பேச்சுக்களை இடை நிறுத்தியது. எனினும், இரு  தரப்பு பேச்சுக்களின் போது காணப்பட்ட   உடன்பாட்டுக்கு அமைய இரு தரப்பு பேச்சுக்களின் இறுதியில் காணப்படும் இணக்கப்பாடுகளின் அடிப்படையிலேயே தெரிவுக்குழுவில் பங்குபற்ற வேண்டும் என்ற உறுதியான நிலைப்பாட்டில் தமிழ்த் தேசியக் கூட்டமைப்பு இருந்து வருவதால் இருதரப்பு பேச்சுக்கள் மட்டுமன்றி தெரிவுக்குழு விவகாரமும் இழுபறி நிலையில் இருந்து வருகின்றமை  இங்கு குறிப்பிடத்தக்கது.