மும்பை தாக்குதலில் பாகிஸ்தானுக்கு தொடர்பு இருப்பது முற்றிலும் உறுதி

மும்பையில் நடைபெற்ற பயங்கரவாதத் தாக்குதல் சம்பவத்தில் பாகிஸ்தானுக்கு தொடர்பு இருப்பது உறுதிப்படுத்தப் பட்டுள்ளது என்று மத்திய உள்துறை அமைச்சர் ப. சிதம்பரம் தெரிவித்துள்ளார். இந்தச் சம்பவம் தொடர்பாக அண்மையில் கைது செய்யப்பட்ட பயங்கரவாதி அபு ஜிண்டாலிடம் நடத்தப்பட்ட விசார ணையில் இது தெரிய வந்துள்ளதாகவும் அவர் குறிப்பிட்டார். இப்போது கைது செய்யப்பட்டுள்ள பயங்கரவாதி அபு ஜிண்டாலிடம் நடத்தப்பட்ட விசாரணையில் நாங்கள் சந்தேகப்பட்ட பல விடயங்கள் உண்மையானவை என்பது உறுதி செய்யப்பட்டுள்ளன. பாகிஸ்தானில் உள்ள பயங்கரவாதத் தலைவர்களின் உத்தரவுப்படி நடந்துகொண்டுள்ளதை அவர் ஒப்புக்கொண்டுள்ளார் என்றார். தொடர்ந்து பாகிஸ்தான் குறித்துப் பேசிய அவர், மும்பை தாக்குதலுக்கு மூளையாகச் செயல்பட்ட பயங்கரவாதக் குழுவினர் தங்கள் நாட்டில்தான் உள்ளனர் என்பதை பாகிஸ்தான் தொடர்ந்து மறுத்து வருகிறது. ஆனால் மும்பைக்குள் புகுந்த அஜ்மல் கசாப் உள்ளிட்ட 10 பயங்கரவாதிகளுக்கு, பாகிஸ்தானில் இருந்துதான் தொலைபேசி மூலம் உத்தரவுகள் வந்துள்ளன. இந்த விவகாரத்தில் மேலும் பல உண்மைகள் விரைவில் வெளிவரும். அப்போது பாகிஸ்தானின் நிலைமை மேலும் மோசமாகிவிடும்.

இரகசிய நடவடிக்கை:

இப்போது கைது செய்யப்பட்டுள்ள பயங்கரவாதி அபு ஜிண்டாலை ஓராண்டுக்கு முன்பே அடையாளம் கண்டுகொண்டோம். மிகவும் இரகசியமாக நடவடிக்கை மேற்கொண்டு அவரை சவூதி அரேபியாவில் இருந்து இந்தியாவுக்கு வரவழைத்து கைது செய்தோம். இதனிடையே பாகிஸ்தான் பிரதமரின் உள்துறை விவகாரங்களுக்கான ஆலோசகர் ரஹ்மான் மாலிக், எனக்கு ஒரு தகவல் அனுப்பியுள்ளார்.

அதில் அபு சலிம் குறித்த தகவல்களை தங்களுக்கு அளிக்குமாறு அவர் கேட்டுக்கொண்டுள்ளார். அதனை நாங்கள் அளிக்க இருக்கிறோம். அதற்கு பதிலாக நாங்கள் கேட்கும் பாகிஸ்தானிய நபர்களின் குரல் மாதிரிகளை தருவதாக அந்த நாடு அளித்த வாக்குறுதியை நிறைவேற்ற வலியுறுத்துவோம். இதற்கு பாகிஸ்தான் தரப்பில் இருந்து எந்தவிதமான பதில் கிடைக்கிறது என்பதைப் பொறுத்திருந்து பார்க்கலாம்.

அனைவரும் சிக்குவர்:

பயங்கரவாதிகள் விவகாரத்தால் பாகிஸ்தானுக்கு தான் அதிக நெருக்கடி ஏற்படுமே தவிர இந்தியாவுக்கு அல்ல. மும்பை தாக்குதலில் முக்கியக் குற்றவாளியான அபு ஜிண்டாலிடம் நடத்தப்பட்ட விசாரணையில், சில பெயர்களைக் கூறியுள்ளார். இவர்கள் தான் கராச்சியில் இருந்தபடி இந்தியாவில் ஊடுருவிய பயங்கரவாதிகளுக்கு கட்டளைகளைப் பிறப்பித்துள்ளனர்.

அவர்களில் சிலர் அடையாளம் காணப்பட்டுள்ளனர். ஆனால் இது தொடர்பான கூடுதல் விவரங்களை இப்போது தெரிவிக்க முடியாது. மும்பை தாக்குதலை திட்டமிட்டு நடத்தியவர்கள், அவர்களுக்கு உதவியவர்கள் என அனைவரையும் விரைவில் அடையாளம் கண்டுவிட முடியும். நிழல் உலக தாதா தாவூத் இப்ராஹிமும் பாகிஸ்தானில் தான் உள்ளார். ஆனால், பாகிஸ்தான் தொடர்ந்து இதை மறுத்து வருகிறது என்றார்.

ப. சிதம்பரம், கைது செய்யப்பட்டுள்ள பயங்கரவாதி அபு ஜிண்டாலிடம் நடத்தப்பட்ட விசாரணையில் நாங்கள் சந்தேகப்பட்ட பல விடயங்கள் உண்மையானவை என்பது உறுதி செய்யப்பட்டுள்ளன. இந்த விவகாரத்தில் மேலும் பல உண்மைகள் விரைவில் வெளிவரும்.