தோழர் றொபேட் அவர்களின் 10 வது ஆண்டு நினைவு தினம்

தோழர் றொபேட் அவர்களின் 10 வது ஆண்டு நினைவு தினம் பத்மநாபா ஈபிஆர்எல்எவ் யாழ் பிராந்திய அலுவலகத்தில் நேற்று (14.06.2013) முற்பகல் 10.30 மணியளவில் அனுஷ்டிக்கப்பட்டது. தோழர் றொபேட்டின் உருவப்படத்திற்கு கட்சியின் பொதுச்செயலாளர் தோழர் சுகு மலர் மாலை அணிவித்து அஞ்சலி செலுத்தினார். கலந்துகொண்ட தோழர்கள் மலர் தூவி அஞ்சலி செய்தனர். தோழர் மோகன் தலைமையில் நடைபெற்ற இந்த அஞ்சலி நிகழ்வில் தோழர் குமார், தோழர் ஞானசக்தி, தோழர் சுகு ஆகியோர் உரையாற்றினர்.

தோழர் றொபேட் கட்சி வழங்கிய எந்த ஒரு பணியையும், எந்த ஒரு பொறுப்பையும் ஏற்றுச் செயற்படுவதற்கு பின்நின்றதில்லை. நிதியில்லை என்றோ, ஆள்பலம் போதாது என்றோ ஒப்படைக்கப்பட்ட எந்த ஒரு பொறுப்பையும் அவர் தட்டிக்களித்ததில்லை. குறித்த பணியினை நிறைவேற்றுவதற்கான நிதி மூலங்களை தேடிக்கொண்டதுடன், ஆளணிகளை திரட்டிக்கொள்வதையும் தனது பொறுப்பாக ஏற்று காரியமாற்றியவர். தனது வேலைத்திட்டத்திற்கு பொருத்தமானவர்களை தேர்ந்தெடுப்பதிலும் அவர் வல்லவராயிருந்தார். என தோழர் மோகன் தனது தலைமையுரையில் குறிப்பிட்டார்.

தோழர் றெபேட் இலங்கை சிறையில் அடைக்கப்பட்டிருந்த சமயம் அவரோடு சிறையில் அடைக்கப்பட்டிருந்து, சிறைச்சாலையின் கொடுமைகளை அனுபவித்தவரான தோழர் குமார், தோழர் றொபேட்டின் ஆழுமை வியக்கத்தக்கதுஎனக் குறிப்பிட்டார். சிறையில் எமது கட்சியை சேர்ந்தவர்கள் மட்டுமல்ல சிறையில் அடைக்கப்பட்டிருந்த பல்வேறு அமைப்புக்களைச் சேர்ந்தவர்களும் அவரை ரஞ்சன் தோழர் என்றே அழைக்கும் அளவிற்கு அனைவரதும் மதிப்பை பெற்றிருந்தார். என்ன நோக்கத்துக்காக அவர் தனது உயிரை அர்ப்பணித்தாரோ அதே இலட்சியத்திற்காக நாம் எம்மாலியன்ற பங்களிப்பை செய்வது தான் அவருக்கு செய்யும் உண்மையான அஞ்சலி எனவும் தோழர் குமார் தெரிவித்தார்.

1980 களிலிருந்தே தோழர் றொபேட்டுடன் கட்சியின் அரசியல் நடவடிக்கைகளில் பங்குகொண்டதாக தெரிவித்த தோழர் ஞானசக்தி தோழர் றொபேட் நெருக்கடியான காலகட்டங்களில் நிதிக்கஷ்டம், பாதுகாப்பு நெருக்கடி என்பவற்றுக்கு முகங்கொடுத்த போதும் தோழமை உணர்வோடும், கொள்கைப் பிடிப்போடும் செயற்பட்ட காலங்களை தோழர் ஞானசக்தி நினைவுபடுத்தினார். அவற்றை மறக்க முடியாது எனவும் குறிப்பிட்டார்.
கட்சியின் பொதுச்செயலாளர் தோழர் சுகு தனது உரையில் தோழர் றொபேட் ஈபிஆர்எல்எவ் இல் இணைந்த பின்னர் மட்டுமல்ல அதற்கு முன்னரும் தனது ஊரில் சமூக பிரக்ஞை கொண்ட ஒருவராகச் செயற்பட்டது பலருக்கும் தெரிந்த அவரது ஊரவர்கள் நினைவு கூருகின்ற விடயமாகும். அவர் 1985 ம் வருடம் இராணுவத்தினரால் கைது செய்யப்பட்டு பலத்த சித்திரவதைக்கு உள்ளானபோதும் அவரை விசாரணைக்கு உட்படுத்தியவர்களால் அவரிடமிருந்து எந்த ஒரு பயனுள்ள தகவலையும் பெற முடியவில்லை. அவரது ஓர்மம் அவரை விசாரணைக்கு உட்படுத்தியவர்களுக்கு வியப்பையும், அவர்மீது ஒரு மரியாதையையும் ஏற்படுத்தியிருந்ததை நான் அறிவேன் எனத் தெரிவித்தார். சிறையில் முகங்கொடுக்க நேர்ந்த எந்த ஒரு கஷ்டத்தையும் பிரச்சினையையும் துணிச்சலாக எதிர்கொண்டவர்.

அவர் எப்போதும் தோழர்களுடன் நெருக்கமான உறவை பேணிவந்தவர், அவர்களை மிகவும் மதித்து செயற்பட்டார். அவரைப்போன்ற திறமையுள்ள ஒருவர் தங்கள் அணிக்கு வாய்க்கவில்லை என யாழ் குடாநாட்டில் செயற்பட்ட புலிகள் தங்களுக்குள் பேசிக்கொண்டதை நாங்கள் அறிந்திருக்கிறோம். யாழ் மாநகர சபை உறுப்பினராக அவர் ஆற்றிய பணிகள் கட்சி வேறுபாடுகளுக்கப்பால் பலராலும் பாரட்டப்பட்டிருக்கின்றன. அவர் வெறுமனே இயக்கப் பணிகளில் மாத்திரமல்ல இலக்கியம், சினிமா போன்ற துறைகளிலும் ஈடுபாடு கொண்ட ஒருவராக ஆழுமையுள்ள ஒருவராக விளங்கினார் எனவும் பொதுச்செயலாளர் தனது உரையில் தெரிவித்தார்.