லண்டன்

23வது தியாகிகள் தின நிகழ்வுகள்

தமிழ் பேசும் மக்களின் போராட்டத்தில் உயிர் நீத்த அனைத்து போராளிகளுக்கும் பொதுமக்களுக்கும் அஞ்சலி செலுத்துவதற்காக பத்மநாபா EPRLF  இனரால் தியாகிகள் தினம் வருடா வருடம் அனுஸ்டிக்கப்பட்டு  வருகின்றது. தமிழ் பேசும் மக்களின் தீர்க்க தரிசனம் மிக்க இளம் தலைவராக இருந்த தோழர் பத்மநாபா புலி பாசிஸ்டுக்களினால் படு கொலை செய்யப்பட தினமான ஜூன் 19 ம் திகதியே தியாகிகள் தினமாகும். தியாகிகள் தின நிகழ்வுகள் இன்று 22 ஜூன் -மாலை வடக்கு லண்டனில் Northoltcommunity மண்டபத்தில் தோழர் சிராப்பின்  தலைமையில் இடம்பெற்றது.

தோழர் ரவி அவர்கள் குத்துவிளக்கேற்றி நிகழ்வுகளை ஆரம்பித்து வைத்தார்.

மறைந் தோழர்களின் புகைப்படங்கள் மற்றும் பெய்ர்ப்பட்டியல்கள் மண்டபம் முழுவதும் பார்வைக்காக வைக்கப்பட்டிருந்தது. அத்துடன் மறைந்த தோழர்களின் ஒளிப்பட காட்சி ஒன்றும் காண்பிக்கப்பட்டது

தோழர் பரமன் அவர்கள் தோழர் திவான் எழுதிய ஒற்றுமையை வலியுறுத்தும் கவிதை ஒன்றை வாசித்தார்

இந்நிகழ்வில் EPRLF உறுப்பினர்களுடன், TULF ,PLOTE, TELO , EPDP அமைப்புக்களின் லண்டன் பிரதிநிதிகளும் மற்றும் சமூக ஆர்வலர்கள் அரசியல் ஆய்வாளர்கள் என பல  தரப்பட பிரமுகர்களும் கலந்து கொண்டனர்.

இரண்டு நிமிட மௌன அஞ்சலியுடன் ஆரம்பிக்கப்பட்ட இந்நிகழ்வில் உரையாற்றிய TULF பிரதிநிதியும் முன்னாள் யாழ் மாநகர சபை உறுப்பினருமான  திரு அரவிந்தன் அவர்கள் தான் தோழர் நாபாவை நேரில் சந்திக்கவில்லை எனினும் EPRLF தலைவர்களில் ஒருவரான மறைந்த  தோழர் ராபர்ட் உடன் யாழ் மாநகரசபை உறுப்பினராக செயற்ப்பட்ட காலங்களை நினைவு கூர்ந்தார். மேலும் TULF இன் தலைவர்கள் திரு அமிர்தலிங்கம் திரு யோகேஸ்வரன் ஆகியோர்  புலிகளால் படுகொலை செய்யப்பட்டபோது நிலவிய அராஜக  சூழலில்பல தடைகளையும் உடைத்து,  வடக்கு கிழக்கில்  மறைந்த  தலைவர்களுக்கான இறுதி யாத்திரையை தோழர் நாபவும் EPRLF இனரும்முன்னின்று ஏற்பாடு  செய்தமையை தனது கட்சியின் சார்பில் நன்றியுடன் நினைவு கூர்வதாக கூறினார்.

அதனை தொடர்ந்து இந்நிகழ்வுக்கான முக்கிய உரையை நிகழ்த்திய பிரபல அரசியல் ஆய்வாளர் தோழர் சிவலிங்கம் அவர்கள், 13வது திருத்தம் பற்றியும் அதிகார பரவலாக்கம் பற்றியும் சமகால அரசியலில் அனைத்து  தமிழ் தரப்பினராலும் பேசப்படுவதும், 13வது திருத்தத்தை பலவீனமாக்க கூடாது என்று கோரப்படுவதும், 24 வருடங்களுக்கு முன்னரே இதே கோரிக்கைகள் EPRLF  இனரால் முன்வைக்கப்பட்டமை தோழர் பத்மனாபாவினதும் EPRLF இனரதும் தீர்க்கதரிசனதிற்க்கு ஒரு எடுத்துக்காட்டு  என்றார். மேலும் அவர் தனது நீண்ட உரையில் தமிழ் தரப்பினர் இன்றைய சூழலில் நடைமுறை சாத்தியமான அணுகுமுறைகள் பற்றி சிந்திக்க வேண்டும் என்றும் இந்த விடயத்தில் தங்களது அனுபவங்களை பகிர்ந்து கொள்வதில் EPRLF இனரும் ஆக்க பூர்வமான பங்களிப்புக்களை வழங்க வேண்டும் என்றும் வேண்டுகோள் விடுத்தார்.

அதனை தொடர்ந்து பேசிய டாக்டர் பாலா அவர்கள் தோழர் நாபா தலைமறைவு வாழ்க்கையை மேற்கொண்டிருந்த காலங்களில் பேராதனை பல்கலை கழகத்தில் தனது விடுதியில் தங்கி இருந்த காலங்களை நினைவு கூர்ந்தார். 13வது திருத்தத்தினூடான அதிகாரப்பரவலாக்கல் முயற்சிகள் EPRLF  இன் அணுகுமுறை களினாலேயே செயலற்றதாகியது என்ற பொருள் பட கருத்துக்களையும் முன்வைத்தார்.

அடுத்ததாக ஸ்ரீ லங்காவில் இருந்து விடுமுறையில் வந்திருந்த திரு சிவசோதி (தோழர் பௌசி)அவர்கள் EPRLF இன் ஆரம்பக்கால நினைவுகளையும் தோழர் நாபாவின் எளிமையான வாழ்க்கை முறையையும் நினவுகூர்ந்ததுடன் தமிழர் தரப்பினர் சாதுரியமாக செயற்பட வேண்டும் என்றும் பிரித்து ஆளும் தந்திரங்களுக்கு இடம் கொடுக்க கூடாது என்றும் குறிப்பிட்டார்.

சமூக ஆர்வலரும் எழுத்தாளருமான திரு பௌசர் அவர்கள் இன்றைய காலகட்டத்தில் 13வது திருத்தம் பற்றிய EPRLF  இனரது அனுபவங்கள் பகிர்ந்து கொள்ளப்பட வேண்டிய அவசியத்தை வலியுறுத்தினார் அத்துடன் EPRLF  ஒரு சமூக மாற்றத்தை வேண்டி நின்ற இயக்கமாகவே தன்னால் பார்க்க முடியும் என்றும் தேசிய விடுதலைக்கான ஒரு பிரதானமான இயக்கம் என்பதை தன்னால் ஏறுக்கொள்ள முடியாமல் உள்ளது என்றும் தெரிவித்தார்.

தோழர் லாபீர் தோழர் நாபாவின் தலைமைத்துவ பண்புகளையும் தீர்க்க தரிசனமான செயல் பாடுகளையும் நினைவு கூர்ந்தார்.

இறுதியாக உரையாற்றிய தோழர் சாந்தன், 13வது திருத்தத்தின் அடிப்படையிலான வடக்கு கிழக்கு மாகாண  அரசு தமிழ் பேசும் மக்களுக்கு ஒரு கௌரவமான தீர்வொன்றை ஐக்கிய இலங்கைக்குள் ஏற்படுத்துவதில் எதிர் கொண்ட சவால்கள் பற்றி குறிப்பிட்டதுடன் பிரேமதாசா வுடன் சேர்ந்து அம்முயற்சிகளை சீர்குலைக்க புலிகளும் அவர்களுடன் நின்ற அரசியல் சக்திகளும் மேற்க்கொண்ட பிரச்சாரங்களையும் சுட்டிக்காட்டினார்.

இந்த பிரச்சாரங்களின் அடிப்படையில் முன்வைக்கப்படும் ஒரு கருத்து EPRLF  இந்த சந்தர்ப்பத்தை சரியாக பயன் படுத்த வில்லை என்பதாகும்.

புலிகளின் இந்த பிரசாரங்களை தங்களை அறியாமலே கற்பிதமாக கொண்டவர்கள் அன்றைய EPRLF  இன் முயற்சிகளை சிறுமைப்படுத்த முனைவதும், EPRLF  இன் தலைவர்கள் மீது தனிப்பட்ட முறையில் சேறுபூச முயல்வதும் துர்ப்பாக்கியமானது என்ற பொருள் பட பேசினார்.

EPRLF இன் நடைமுறைகளில் அன்று ஏற்பட்ட சில தவறுகள் வருந்ததக்கவை ஆனால் EPRLF மேற்கொண்ட அரசியல் அணுகுமுறை நிதானமாக அனுமானிக்கப்படல் வேண்டும் என்றும் இதய சுத்தியுடன் பார்க்கப்படல் வேண்டும் என்றும் குறிப்பிட்டார்.

தோழர் சிராப்பின் நன்றி உரையுடன்  அஞ்சலி நிகழ்வுகள் நிறைவு பெற்றன.