13ஆவது திருத்தத்தை ரத்துச் செய்ய கோருவது அரசாங்கமல்ல: சிறுதரப்பினர் - இடதுசாரி, சுதந்திரக் கட்சி தலைவர்கள்

அரசியலமைப்பின் 13 வது திருத்தத்தை ரத்துச் செய்ய வேண்டுமென்பது அரசாங்கத்திலுள்ள பெரும்பான்மை தரப்பினரின் நிலைப்பாடல்ல. இதில் திருத்தம் மேற்கொண்டு மாகாண சபைமுறையை மேலும் பலப்படுத்தப்பட வேண்டுமென அரசாங் கத்தில் அங்கம் வகிக்கும் இடதுசாரி கட்சி மற்றும் சுதந்திரக் கட்சி தலைவர்கள் தெரிவித்தனர். 13 வது திருத்தத்தை ரத்துச் செய்வதன் மூலம் மீண்டும் யுத்தம் வெடிக்கும் என்று குறிப்பிட்ட அவர்கள், அரசியல மைப்பைத் திருத்துவதற்காக நியமிக்கப் பட்டுள்ள தெரிவுக்குழுவில் தமிழ்த் தேசிய கூட்டமைப்பையும் ஐ.தே.கவையும் பங்கேற்க வைக்க சகல முயற்சிகளும் மேற்கொள்வதாகவும் தெரிவித்தனர்.

13வது திருத்தம் தொடர்பாக விளக்க மளிக்கும் ஊடகவியலாளர் மாநாடு நேற்று லங்கா சமசமாஜ கட்சி தலைமை யகத்தில் நடைபெற்றது. இதில் சிரேஷ்ட அமைச்சர்களான டி.யு. குணசேகர, திஸ்ஸவிதாரண, அமைச்சர்களான ராஜித சேனாரத்ன, வாசுதேவ நாணயக்கார, ரெஜினோல்ட் குரே, சந்திரசிறி கஜதீர மற்றும் ராஜாகொல்லுரே ஆகியோர் கலந்து கொண்டனர்.

இங்கு கருத்துத் தெரிவித்த சிரேஷ்ட அமைச்சர் திஸ்ஸ விதாரண, ஒரே இலங்கையராக மக்களை ஐக்கியப்படுத்து வதற்காக மாகாண சபை முறை மேலும் பலப்படுத்தப்பட்டு அதிகாரப் பகிர்வு மேற்கொள்ளப்பட வேண்டும். சிலர் 13 வது சட்டத்தை நீக்குமாறு கோரு கின்றனர்.

அவ்வாறு செய்தால் மீண்டும் நாட்டில் யுத்தம் ஏற்படும். 13 வது திருத்தத்தில் சில குறைபாடுகள் உள்ளன. எமது நாட்டிற்கு ஏற்றவாறு மாகாண சபை முறை மாற்றப்பட வேண்டும்.

1926 முதல் மாகாண சபை முறை குறித்து பேசப்பட்டது. இது பலாத்காரமாக இந்தியாவினால் திணிக்கப்பட்டதல்ல.

தமிழ் மக்களின் மனங்களை வெல்ல 13 வது திருத்தம் முறையாக அமுலாக வேண்டும்.

அமைச்சர் ராஜித சேனாரத்ன கூறியதாவது,

13 வது திருத்தம் முழுமையான தீர்வு முறையென நாம் கூறவில்லை. வெவ்வேறு பெயர்களில் குறிப்பிடப்பட்டாலும் இது புதியதொன்றல்ல. மாகாண சபை என்பது ஈழம் என்று 1988 களில் குற்றஞ் சாட்டப்பட்டது. 25 வருடங்களின் பின் மீண்டும் அதனை இனவாத குழுக்கள் எதிர்க்கின்றன.

வடக்கு, கிழக்கு பிரச்சினைக்கு தீர்வாக வந்த மாகாண சபை முறையை வடக்கிற்கு வழங்காதே என்று இன்று கூறுகின்றனர். புலிகள் ஒருபோதும் இனவாதம் பேசுவோரைக் கொன்றது கிடையாது. 13 வது திருத்தத்தை காப்பாற்ற இறுதிவரை போராடுவோம் என்றார். சிரேஷ்ட அமைச்சர் டி.யு. குணசேகர கூறியதாவது,

13 வது திருத்தத்தை கொண்டு வந்த ஐ.தே.க. இன்று அது குறித்து மெளனம் சாதிக்கிறது.

1983 கறுப்பு ஜூலை வரை இலங்கை விவகாரங்களில் இந்தியா தலையிடவில்லை. இந்தியாவின் பங்களிப்புடன் அமுல்படுத் தப்பட்ட 13வது திருத்தத்தை நாம் ரத்துச் செய்தால் கச்சதீவு ஒப்பந்தத்தை இந்தியா ரத்துச் செய்யும். தமிழ் முஸ்லிம் மக்க ளுக்காக சிங்களவர்கள் உயிர் தியாகம் செய்துள்ளனர்.

13 வது திருத்தம் குறித்து முன்பும் தேவையற்ற பீதி பரப்பப்பட்டது. தமிழ் தேசிய கூட்டமைப்பு வடக்கில் இன வாதத்தை பரப்பாது தெரிவுக்குழுவில் பங்கேற்று முன்வர வேண்டும். அமைச்சர் ரெஜினோல்ட் குரே கூறியதாவது,

எமது நாட்டுக்கு உகந்தவாறு அதிகாரப் பகிர்வு மேற்கொள்ளப்பட வேண்டும். நாட்டைத் துண்டாடாது ஐக்கியப்படுத்தவே நாம் கோருகிறோம். 13 வது திருத்தத்தை ரத்துச் செய்வது அரசின் பெரும்பான்மை நிலைப்பாடல்ல யுத்தத்தின் போது இந்தியா அமைதியாக எமக்கு ஒத்துழைத்தது.

13 வது திருத்தத்தை அகற்றுவது சுதந்திரக் கட்சியின் நிலைப்பாடு என்று காட்ட சிலர் முயல்கின்றனர். சுதந்திரக் கட்சியிலுள்ள அநேக எம்.பிக்கள். அதிகாரப் பகிர்விற்கு ஆதரவாக உள்ளனர். சிறு குழுவே இனவாதமாக செயற்படு கின்றனர்.

வடக்கில் தேர்தலை நடத்த முடிவு செய்துள்ளோம். 13 வது திருத்தத்தில் மாற்றங்கள் செய்வது குறித்து தெரிவுக் குழுவில் ஆராய்ந்து சகலரும் ஏற்கும் முடிவு எட்டப்படும். ஆரம்ப காலம் முதல் இனவாத குழுக்கள் அதிகாரப்பகிர்விற்கு எதிராக தலைதூக்கி வந்துள்ளன. அமைச்சர் வாசுதேவ நாணயக்கார கூறியதாவது,

அரசாங்கத்தின் நிலைப்பாடு வேறாக இருக்க 13 வது திருத்தத்தை அகற்றுவதே அரசின் நிலைப்பாடு என்று காண்பிக்க சிலர் முயல்கின்றனர். தெரிவுக்குழுவில் அங்கம் வகிக்க வேண்டியது த.தே.கூ. பொறுப்பாகும். அவர்களை இதில் பங்கேற்க வைக்க முயற்சி செய்வோம். தெரிவுக்குழுக்களான அரச குழுவில் மு.கா. சேர்க்கப்படாத போதும் தனியாக சேர்க்கப்படும் என்றார்.