அமெரிக்காவில் உள்நாட்டு தீவிரவாதம்- 2014 என்ற தலைப்பில் கடந்த 20-ம் தேதி வெளியிடப்பட்ட இந்த அறிக்கையில், ‘உச்சகட்டப் போர் முடிவடைந்த பின்னர் இலங்கையில் குறிப்பிடத்தக்க அளவிலான எந்த தாக்குதல்களையும் விடுதலைப் புலிகள் நடத்தவில்லை.
எனினும், இந்தியாவில் உள்ள அமெரிக்க மற்றும் இஸ்ரேல் தூதரகங்கள் மீது தாக்குதல் நடத்த திட்டமிட்டதாக குற்றம்சாட்டப்பட்ட விடுதலைப் புலிகள் இயக்க ஆதரவாளர்களில் 13 பேர் கடந்த 2014-ம் ஆண்டு மலேசியாவில் கைது செய்யப்பட்டனர்.

விடுதலைப் புலிகள் இயக்கத்துக்கு புத்துயிர் அளிக்கும் நோக்கத்தில் நிதி உதவிகளை செய்து வருவதாக கருதப்பட்ட 16 அமைப்புகள் மற்றும் 422 தனிநபர்களை தீவிரவாத அமைப்புகளுடன் தொடர்பு உடையவர்கள் பட்டியலில் இணைத்து கடந்த (2014) ஆண்டு மார்ச் மாதத்தில் அரசு அறிவிப்பு வெளியிட்டுள்ளது’ என தெரிவிக்கப்பட்டிருந்தது.
இந்த அறிக்கையை இலங்கை எதிர்க்கட்சிகள் தற்போது அரசியல் ஆயுதமாக கையில் எடுத்துள்ளன. அமெரிக்கா இந்த அறிக்கையை வெளியிட்டவுடன் இதுதொடர்பாக உடனடியாக மந்திரிசபை கூட்டம் நடத்தி ஆலோசிக்க தவறியதாக இலங்கை அரசு மீது குற்றச்சாட்டு எழுந்துள்ளது.

இது தொடர்பாக, இன்று கருத்து வெளியிட்டுள்ள இலங்கை முன்னாள் வெளியுறவுத்துறை மந்திரியும் ஐக்கிய மக்கள் சுதந்திரக் கூட்டணி கட்சி எம்.பி.யுமான ஜி.எல்.பெரிஸ், அமெரிக்கா வெளியிட்டுள்ள இந்த அறிக்கை இலங்கையின் தேசிய பாதுகாப்பு தொடர்பானது என்பதால் இவ்விவகாரத்தில் அரசு உடனடியாக செயலாற்ற வேண்டும் என வலியுறுத்தியுள்ளார்.

இலங்கையில் மறுசீரமைப்பு பணிக்கு உதவிடும் வகையில் நாடு கடந்து வாழ்ந்துவரும் தமிழர்கள் அனைவரும் உடனடியாக நாடு திரும்ப வேண்டும் என்று கூறி வெளிநாடுகளில் வாழும் தமிழர்களுக்கு அழைப்பு விடுத்துள்ள இலங்கை அரசின் தற்போதைய அணுகுமுறையை குற்றம்சாட்டியுள்ள பெரிஸ், வெளிநாடுகளில் வாழும் தமிழ் அமைப்பினரிடம் இதுபோல் பேச்சுவார்த்தை நடத்திக் கொண்டிருந்தால் உள்நாட்டில் மீண்டும் விடுதலைப் புலிகள் இயக்கம் தோன்ற வேண்டும் என நினைப்பவர்களை ஊக்குவிப்பதாக அரசின் இந்த செயல்பாடு அமைந்துவிடும் என்றும் குறிப்பிட்டுள்ளார்.

அமைதி சமாதானம் ஜனநாயகம்

www.sooddram.com