தமிழ்த் தேசிய கூட்டமைப்பின் மனு உச்ச நீதிமன்றில் விசாரணை

வடக்கு மக்களை பதிவு செய்யும் நடைமுறையை இடைநிறுத்துவதற்கு சட்டமா அதிபர் இணக்கம்

பாதுகாப்புப் படையினரால் மேற்கொள்ளப்பட்டுவரும் வடக்கு மக்களை பதிவு செய்யும் நடவடிக்கையை உடனடியாக அமுலுக்கு வரும் வகையில் இடைநிறுத்துவதற்கு சட்டமாஅதிபர் உச்ச நீதிமன்றத்தில் நேற்று (03) இணக்கம் தெரிவித்தார். மேலும், அந்த பதிவு செய்யும் நடவடிக்கையினை மேற்கொள்வதற்கு பொருத்தமான முறையொன்றினை ஒழுங்கு செய்யுமாறு உரிய அதிகாரிகளுக்கு உத்தரவிடுவதற்கும் நடவடிக்கை எடுப்பதாக சட்ட மாஅதிபர் சார்பாக நீதிமன்றத்தில் ஆஜரான பிரதி சொலிசிடர் ஜெனரல் புவனெக்க அலுவிஹார உச்ச நீதிமன்றத்திடம் இணக்கம் தெரிவித்தார். யாழ்ப்பாணம் மற்றும் கிளிநொச்சி ஆகிய மாவட்டங்களைச் சேர்ந்த மக்களை பதிவு செய்வதன் மூலம் அடிப்படை உரிமைகள் மீறப்படுவதாக தமிழ் தேசிய கூட்டமைப்பைச் சேர்ந்த ஐந்து பாராளுமன்ற உறுப்பினர்கள் தாக்கல் செய்த மனு விசாரணைக்கு எடுத்துக் கொள்ளப்பட்ட போதே பிரதி சொலிசிடர் ஜெனரல் சட்டமாஅதிபர் சார்பாக இணக்கம் தெரிவித்தார்.

தமிழ் தேசிய கூட்டமைப்பின் பாராளுமன்ற உறுப்பினர் களான மாவை சேனா திராஜா, கே. பிரேமசந்திரன், அப்பாத்துரை விநாயகமூர்த்தி, ஈ. சரவணபவன், எஸ். ஸ்ரீதரன் ஆகியோரால் இந்த மனு தாக்கல் செய்யப்பட்டிருந்தது. பாதுகாப்பு செயலாளர் கோத்தாபய ராஜபக்ஷ, யாழ்ப்பாண கட்டளைத் தளபதி, இராணுவ பேச்சாளர், யாழ்ப்பாண அரசாங்க அதிபர் இமெல்டா சுகுமார் மற்றும் சட்டமாஅதிபர் ஆகியோர் இந்த மனுவில் பிரதிவாதிகளாகக் குறிப்பிட்டிருந்தனர்.

மனுதாரர்கள் சார்பாக நீதிமன்றத்திடம் முன்வைக்கப்பட்ட விடயங்களுக்கேற்ப யாழ்ப்பாணம், கிளிநொச்சி ஆகிய மாவட்டங்களைச் சேர்ந்த கிராம சேவை உத்தியோகத்தர் பிரிவு வாரியாக நிரந்தர வதிவாளர்களை பதிவு செய்யும் பணி பாதுகாப்புப் படையினரால் இடம்பெற்று வருகின்றது. அவ்வாறு பதிவு செய்யும் நடவடிக்கைகள் கோப்பாய், இருபாலை, கல்வியங்காடு ஆகிய பிரதேசங்களில் இதுவரையில் மேற்கொள்ளப்பட்டுள்ளன.

அவ்வாறு பதிவு செய்யும் பணிகள் பாதுகாப்புப் படையினரால் மேற்கொள்ளப்படுகின்றது. ஒரு வீட்டாரிடமிருந்து அதற்காக நூறு ரூபா அறவிடப்படுவதுடன், குடும்ப அங்கத்தவர்களை புகைப்படமெடுக்கும் பணியும் இராணுவத்தினரால் மேற்கொள்ளப்பட்டது.

எனவே இவ்வாறு பதிவு செய்யும் நடவடிக்கைகள் பெறும்பாலும் சிங்கள மொழியிலேயே இடம்பெற்று வருவதாக மனுதாரர்கள் குறிப்பிட்டுள்ள னர். மேலும் தென்பகுதி மக்களை பதிவு செய்யாது வட மக்களை மாத்திரம் இவ்வாறு பதிவு செய்வதன் மூலம் அவர்களுக்கு வித்தியாசம் காட்டப்ப டுவதாகவும் அவர்கள் முறைப்பாடு செய்துள்ளனர்.

தமிழ் மொழி பேசும் மக்களின் தகவல்களை சிங்கள மொழியில் பெற்று பதிவு செய்யப்படுவதன் மூலம் மொழி உரிமை மீறப்பட்டுள்ளதாகவும் மனுதாரர்கள் குறிப்பிடுகின்றனர்.

இதனால் இந்த பதிவு செய்யும் நடைமுறையினை உடனடியாக இடை நிறுத்துமாறும் அவர்கள் உச்ச நீதிமன்றத்திடம் வேண்டுகோள் விடுத்துள்ளனர்.

இந்த மனு மீதான விசாரணை நேற்று எடுத்துக்கொள்ள ப்பட்டபோது சட்டமா அதிபர் சார்பாக நீதிமன்றத்தில் ஆஜரான பிரதி சொலிசிடர் ஜெனரல் புவ னெக்க அலுவிஹார கருத்துத் தெரி விக்கையில், வட பகுதி மக்களால் கைவிடப்பட்ட வீடுகள் மற்றும் காணிகள் என்பவற்றில் வேறு நபர்கள் வந்து குடியேறுவதாக சட்ட ரீதியான உரிமையாளர்களிடமிருந்து ஆயிரக்கணக்கான முறைப்பாடுகள் கிடைக்கப் பெற்றுள்ளதாக தெரிவித் தார்.

அந்த சட்டவிரோதமான செயற்பாட்டினை தடுப்பதற்காக அந்த சட்ட ரீதியான உரிமையாளர்களை இனங்காணும் முகமாக நபர்களை பதிவு செய்யும் பணிகளை பாதுகாப்புப் படையினர் ஆரம்பித்ததாகவும் அவர் மேலும் தெரிவித்தார்.

எவ்வாறாயினும், இந்த பதிவு செய்யும் நடவடிக்கையினை இடை நிறுத்துவதற்கு பிரதி சொலிசிடர் ஜெனரல் இணக்கம் தெரிவித்ததை அடுத்து இந்த மனுவை தொடர்ந்து முன்னெடுக்கும் நோக்கமில்லை யென மனுதாரர்களின் சட்டத்தரணி நீதிமன்றத்திடம் தெரிவித்தார்.

அதன் பிரகாரம், மனு மீதான விசாரணையை முடிப்பதற்கு உச்ச நீதிமன்றம் தீர்மானித்தது. சட்டத்தரணி எம்.ஏ. சுமந்திரன் மனுதாரர்கள் சார்பாக ஆஜரானார்.