சிவராத்திரி பண்டிகையை முன்னிட்டு கனடா டொரென்டோவிலுள்ள இலங்கை உயர்ஸ்தானிகர் இந்து ஆலயத்திற்கு விஜயம்

கனடா ஸ்கார்புரோவிலுள்ள பழமை வாய்ந்ததும்,சிறப்பு மிக்க “பெரிய சிவன்” கோவிலில் நடைபெற்ற சிவராத்திரி பிரார்த்தனையில் இலங்கை உயர்ஸ்தானிகர் கருணாரத்ன பரணவிதான கலந்து கொண்டார்.இவரை பெரிய சிவன் கோவில் நிர்வாகத்தின் தலைவர் திரு.சிவனடியார் வரவேற்று ஆலயத்தில் நடைபெற்ற சிவலிங்க அபிடேக பூசையில் பங்கு கொள்ள உதவிபுரிந்தார்.

பின்னர் நடைபெற்ற கலை நிகழ்வில் இலங்கை உயர்ஸ்தானிகர் கருணாரத்ன பரணவிதான அவர்கள் பக்தர்களுக்கு அறிமுகம் செய்து சொற்பொழிவு ஆற்றும் போது திரு.சிவனடியார் குறிப்பிடுகையில் இலங்கை உயர்ஸ்தானிகர் கருணாரத்ன பரணவிதான அவர்கள் நன்கு தமிழ் பேச தெரிந்தவர் என்றும் இந்து சமயத்தில் நம்பிக்கை வைத்துள்ள ஒரு சிவ பக்தன் என்றார்.

கீத வாணி ரேடியோ அதிபர் திரு.நடராஜ்குமார் தனது உரையில் உயர்ஸ்தானிகர் கருணாரத்ன பரணவிதான அவர்கள் இலங்கை ரூபவாஹினி கூட்டுத்தாபனத்தில் அதிபராக இருந்த போது தமிழ் மக்களுக்கு பல உதவிகள் புரிந்தவர் என்றும் இந்த பெரிய சிவன் கோவில் சிவபெருமானின் அருளால் கனடா நாட்டிற்கு வரவழைக்கப்பட்டு கனடா வாழ் தமிழ் மக்களுக்கு சேவை செய்து இலங்கையில் சகல இன மக்களும் சமாதனமாக வாழவேண்டும் என்றார்.

இலங்கை உயர்ஸ்தானிகர் கோவில் வருகை மற்றும் சிவராத்திரி நிகழ்வுகளை லிபரல் கட்சி அமைப்பாளர்கள் சிவம் விநாயகமூர்த்தியும் சூரியகுமார் நவரத்தினமும் ஒழுங்கு செய்தனர் என்பது குறிப்பிடத்தக்கது.

இலங்கை உயர்ஸ்தானிகர் கருணாரத்ன தனது உரையை அழகிய தமிழில் ஆரம்பித்து பேசினார்.தனது உரையில் சிவராத்திரியின் மகிமைகளையும் அழகிய இலங்கைத்தீவின் எத்தனையோ புராதன சிவன் கோவில்கள் தமிழ்,சிங்கள ஊர்களில் உள்ளன என குறிப்பிட்டார்.சிவனுக்கு இன்றைய தினம் ஏற்றிவைக்கப்படும் ஒவ்வொரு ஒளி விளக்கும் அறியாமை என்ற இருளை அகற்றி எமது இலங்கை மக்கள் மத்தியில் ஐக்கியத்துக்கான ஒளியை கொண்டுவரவேண்டும் என்று எல்லாம் வல்ல சிவபெருமானை பிரார்த்திப்பதாக தனது உரையில் குறிப்பிட்டார்.

சுதந்திர இலங்கையில் நல்லொழுக்கமுள்ள ஒரு சமூகத்தை கட்டியெழுப்புவதே தமிழ்,சிங்கள,முஸ்லிம் மக்களின் பொதுவான எண்ணமாகும்.இந்த பெரிய சிவன் கோவிலில் தமிழ் இந்து மக்கள் செய்யும் பிரார்த்தனைகள் எமது எதிர்பார்ப்புகளை நிறைவேற்றும் என்றார்.

தனது டொரொன்டோ தூதரகம் எவ்வாறான சேவைகள் வழங்குகின்றது என்றும் தேவையான நேரம் தன்னை தொடர்பு கொள்ளலாம் என்று கூறினார்.

பின்பு கோவிலுக்கு வருகை தந்த மாணவ மாணவியர்களுடன் கலந்துரையாடினார்.பல மாணவர்கள் கனடாவில் பிறந்தாலும் இலங்கை தீவு தன் அழகால் தங்களை கவருகின்றது என மகிழ்ச்சியுடன் தெரிவித்தனர்.பலர் தங்களின் இலங்கை பயணம் பற்றி தகவல்களை பரிமாறினர்.

பெரிய சிவன் கோவிலுக்கு வருமுன்பு ஸ்ரீ துர்க்கா தேவஸ்தானத்துக்கும் விஷேட சிவராத்திரி பூஜை நிகழ்வுக்காக ஈஸ்ட் யோர்க்(East  York) சென்று அங்கு ந‌டைபெற்ற ஏ.பி.எஸ்.  சிங்கராஜாவின் இசை நிகழ்ச்சியையும் கண்டு களித்தார் என்பது குறிப்பிடத்தக்கது.

ஸ்ரீ துர்க்கா தேவஸ்தானத்துக்கும் இலங்கை உயர்ஸ்தானிகர் கருணாரத்ன அவர்களுக்கும் மிக நெருங்கிய தொடர்பு உள்ளது.இவர் ஸ்ரீ துர்க்கா அன்னையின் பக்தர் என்பது குறிப்பிடத்தக்கது.