காங்கிரஸின் கோரிக்கைக்கு அடிபணிந்தது தி. மு. க

தி. மு. க. - காங்கிரஸ் விரிசல் கலைஞர் கருணாநிதி நடத்திய மற்றுமொரு நாடகம் என கடும் விமர்சனங்கள் எழுந்துள்ளன. இந்த தேர்தல் நாடகத்துக்கு தொகுதிப் பங்கீடு வெறும் சாட்டு என்றும். முதலில் 63 இடங்களை காங்கிரஸ் கட்சிக்கு வழங்க மறுத்துவந்த கலைஞர் கருணாநிதி இப்போது அந்த 63 இடங்களையும் வழங்க ஒப்புக் கொண்டுள்ளதாகவும் தமிழக தகவல்கள் தெரிவிக்கின்றன. ஸ்பெக்ட்ரம் பிரச்சினையால் ஏற்பட்ட கசப்புணர்வு மற்றும் தமிழக சட்டமன்ற தேர்தலுக்கான தொகுதிப் பங்கீட்டில் ஏற்பட்ட முரண்பாடுகளைத் தொடர்ந்து தி. மு. க. காங்கிரசுடனான கூட்டினை முறித்துக்கொள்வதாகவும் மத்திய அரசிலிருந்தும் தமது ஆதரவை விலக்கிக் கொள்வதாகவும் அறிவித்தது. நடைபெறவுள்ள தமிழக சட்டமன்ற தேர்தலுக்கான தொகுதிப் பங்கீட்டில் 60 இடங்களை காங்கிரஸ் கட்சிக்கு ஒதுக்க தி. மு. க. இணக்கம் தெரிவித்த போதும் தமக்கு 63 இடங்களை காங்கிரஸ் அடம்பிடிப்பது நியாயமற்றது என்று தமிழக முதல்வர் கலைஞர் மு. கருணாநிதி குற்றம் சாட்டியிருந்தார்.

தமிழக சட்டசபைத் தேர்தலுக்கான அ. தி. மு. க. கூட்டணி முடிவாகிவிட்ட நிலையில் தி. மு. க. காங்கிரஸ் உடனான கூட்டினை முறித்துக் கொண்டமை காங்கிரஸ¤க்கு பாரிய அரசியல் நெருக்கடிகளை உருவாக்கும் எனவும் இதனால் காங்கிரஸ் ஒரு வழிக்கு வரும் எனவும் தி. மு. க. கணக்குப் போட்டது.

எனினும் தேர்தல் கூட்டணியை நிர்ணயித்துக்கொண்ட அ. தி. மு. க. காங்கிரஸ் வேறுவழியின்றி தம்முடன் கைகோர்க்கும் என்ற எதிர்பார்ப்பில் தேர்தலுக்கான தொகுதிப்பங்கீட்டினை தள்ளிப்போட்டுள்ளது.

மறுபுறத்தில் தி. மு. க. கூட்டணியில் மேலும்சில கட்சிகள் இணைந்து கொள்ள வாய்ப்புண்டு என்று தெரிவித்துள்ள கலைஞர் கருணாநிதி காங்கிரஸ் தரப்பிலிருந்து எவரும் தன்னுடன் பேசவில்லை என்றும் குறிப்பிட்டுள்ளார்.

இந்த நிலையில், மத்தியிலும், மாநிலத்திலும் காங்கிரஸ் ஆட்டம் காணும் எனவும், உள்ளூர் அரசியலில் தி. மு. க. ஆட்சி கவிழும் என்றும், இந்த பூசலினால் அ. தி. மு. க. மீண்டும் தமிழகத்தில் ஆட்சி அமைக்க வாய்ப்பு உள்ளதாகவும் பல்வேறு எதிர்வுகூறல்கள் தோன்றின.

இந்த எதிர்வுகூறல்களை எல்லாம் முறியடிக்கும் வகையில் காங்கிரஸின் போக்கிற்று எதிர்ப்புத் தெரிவித்து மத்திய அரசியல் அங்கம் வகிக்கும் தி. மு. க. அமைச்சர்கள் பதவி விலகுவது என்ற முடிவு தள்ளிப்போடப்பட்டுள்ளதாக முதலில் தமிழக துணை முதல்வர் ஸ்டாலின் அறிவித்தார்.

எனினும் அந்த முடிவு கைவிடப்பட்டு ள்ளதாகவே தி. மு. க. தகவல்கள் தெரிவிக்கின்றன.

மறுபுறத்தில் தி. மு. க. தலைவர் கருணாநிதி காங்கிரஸ் தொகுதிப் பங்கீட்டில் கோரிய 63 இடங்களையும் வழங்க முடிவு செய்துள்ளார் என மற்றுமொரு தகவல் வெளியாகியுள்ளது.

மேலும், தொகுதிப் பங்கீட்டுப் பிரச்சினைகள் குறித்து மத்திய அமைச்சர்களான மு. க. அழகிரி மற்றும் தயாநிதி மாறன் உள்ளிட்ட அமைச்சர்கள் காங்கிரஸ் தலைவி சோனியா காந்தியைச் சந்தித்துப் பேசியுள்ளனர்.

தனால், காங்கிரஸ் கட்சியின் இறுமாப்புக்கு தி. மு. க. பணிந்து விட்டதாகவும், இது தி. மு. க. - காங்கிரஸ் கூட்டணி மீதுள்ள உட்கட்சி அதிருப்தியாளர்களையும், ஸ்பெக்ட்ரம் போன்ற ஊழல் குற்றச்சாட்டுகளால் தமக்கு மக்கள் மத்தியில் ஏற்படக்கூடிய ஆதரவு இழப்பையும் ஈடுசெய்ய கருணாநிதி ஆடிய மற்றும் ஒரு நாடகம் இது என விமர்சிக்கப்படுகிறது.