லிபியாவில்

ராஸ் லனூபா, அஸ்ஸாவியா, மிஸ்ரடாவில் தொடர்ந்தும் மோதல்

லிபியாவில் பல நகரங்களிலும் தமது கட்டுப்பாட்டை நிலைநாட்ட கடாபி ஆதரவுப் படையும் கிளர்ச்சியாளர்களும் தொடர்ந்து மோதலில் ஈடுபட்டு வருகின்றனர். இதில் எண்ணெய் நகரமான ராஸ் லனூபாவை கைப்பற்ற கடாபி ஆதரவுப்படை தொடர்ந்தும் வான்வழி தாக்குதல்களை நடத்தி வருகின்றது. இது தவிர தரைவழியாகவும் இரு தரப்பும் தீவிர மோதலில் ஈடுபட்டுள்ளது. இதனால் பல்லாயிரக்கணக்கானோர் கொல்லப்பட்டிருக்கலாம் என அஞ்சப்படுகிறது.

இது குறித்து அங்கு நிலைகொண்டுள்ள கிளர்ச்சிப் படையைச் சேர்ந்த காலித் கவாபி, அல் ஜீராவுக்கு தெரிவித்ததாவது: இங்கு பலரும் கொல்லப்பட்டு காயத்திற்கு உள்ளாகியுள்ளனர்.

ஒரு மணி நேரத்திற்கு முன்னர் கூட யுத்த விமானம் ஒன்று ராஸ் லனூபா ஊடாக சென்றது. அதனைத் தொடர்ந்து பெரு வெடிப்பு சத்தம் கேட்டதோடு புகை மண்டலமும் பரவியது. மக்கள் வெடிப்பு இடம்பெற்ற பகுதிக்கு செல்ல முயன்றனர். எனினும் நாம் அவர்களை இடைமறித்தோம் என்றார்.

இதுதவிர தலைநகர் திரிபோலிக்கு 50 கிலோமீற்றர் மேற்கே உள்ள அஸ்ஸாவிய பகுதியிலும் கடும் மோதல் நிலவி வருகிறது. இங்கு எதிர்ப்பாளர்கள் நிலைகொண்டிருந்தாலும் தொடர்ச்சியாக இரண்டு நாட்களாக கடாபி ஆதரவுப் படை ஷெல் தாக்குதல்களை நடத்தி வருகிறது. இதனால் இந்த பகுதியில் பெரும் உயிர்ச்சேதம் ஏற்பட்டுள்ளதாக ராய்ட்டர் செய்தி வெளியிட்டுள்ளது.

கடந்த இரண்டு வாரங்களுக்கு முன்னர் எதிர்ப்பாளர்கள் அஸ் ஸாவியா பகுதியை கைப்பற்றினர். எனினும் திரிப்போலிக்கு அருகாமை நகர் என்பதால் அதனை தனது கட்டுப்பாட்டுக்குள் கொண்டு வர கடாபி ஆதரவுப் படை முயற்சிக்கிறது.

அஸ்ஸாவியாவில் 10 லட்சம் பேர் அளவில் வாழ்ந்து வருகின்றனர். அதேபோன்று திரிபோலிக்கு கிழக்கில் 210 கிலோ மீற்றர் தூரத்தில் அமைந்துள்ள வர்த்தக நகரமான மிஸ்டிடாவிலும் தொடர்ச்சியான மோதல் இடம்பெற்று வருகிறது. லிபியாவின் மூன்றாவது மிகப் பெரிய நகரமான இங்கு அரை மில்லியன் பேர் வசித்து வருகின்றனர்.

எனினும் லிபியாவின் இரண்டாவது மிகப் பெரிய நகரமான பெங்காசி, சுவாரா, அஜிதபியா, பிரெதா, உஜாலா, ஜவவு மற்றும் டொப்ருக் பகுதிகள் கிளர்ச்சியாளர்களின் கைவசம் உள்ளன. அதேபோன்று தலைநகர் திரிபோலி, கடாபி பிறந்தகமான சிர்த் மற்றும் பின் ஜவாத், அபரடா இல்லயித்தான் ஆகிய பகுதிகள் அரசின் கட்டுப்பாட்டில் உள்ளன.

இதேவேளை, கிளர்ச்சிப் படை தலைவரும், முன்னாள் நீதி அமைச்சருமான முஸ்தபா அப்துல் ஜலிலை பிடித்துத் தருபவர்களுக்கு 400,000 டொலர்களை சன்மானமாக தருவதாக லிபிய அரசு நேற்று அறிவித்தது.

இதனிடையே அஸ்ஸவியா பகுதிக்கு செல்ல முயன்ற பிபிசி செய்தியாளர்கள் மீது கடாபி ஆதரவுப்படை கடும் தாக்குதலை மேற்கொண்டுள்ளதாக பிபிசி தொலைக்காட்சி செய்தி வெளியிட்டுள்ளது.

இந்நிலையில் சொந்த மக்களைக் கொன்று குவித்து வரும் கடாபி இராணுவத்தைத் தடுப்பதற்காக, லிபிய வான்வெளி கண்காணிப்பு, மனிதாபிமான உதவிகள் ஆயுதப் பரிமாற்றத் தடை, எதிர்ப்பாளர்களுக்கு ஆயுதம் அளிப்பது, போர் விமானங்கள் பறக்கத் தடை, அமெரிக்க இராணுவத்தின் நேரடி நடவடிக்கை உள்ளிட்ட பல்வேறு சாத்தியங்களை அமெரிக்கா ஆலோசித்து வருகிறது. பிரிட்டன் மற்றும் பிரான்ஸ் இதற்கான நடவடிக்கைகளில் இறங்கியுள்ளன.

ஆனால், போர் விமானங்கள் பறக்க தடை மற்றும் நேரடி இராணுவ நடவடிக்கை ஆகியவற்றில் அமெரிக்க அரசில் கருத்து வேறுபாடு ஏற்பட்டுள்ளது. அமெரிக்க எம்.பிக்கள் சிலர், இரண்டையும் அமெரிக்காவே முன்னின்று செய்ய வேண்டும் என்று வலியுறுத்தி வருகின்றனர். பாதுகாப்பு அமைச்சர் ரொபர்ட் கேட்ஸ் மற்றும் வெளியுறவு அமைச்சர் ஹிலாரி கிளின்டன் இருவரும் அதை மறுத்துவிட்டனர். இரண்டு நடவடிக்கையும் சர்வதேச சமூகம் மற்றும் ஐ.நா. வின் அங்கீகாரத்தோடு மட்டுமே நடக்க வேண்டும் என்று திட்டவட்டமாக தெரிவித்துள்ளனர்.

நேற்று முன்தினம் லிபியத் தலைநகர் திரிபொலியில் இருந்து புறப்பட்ட கடாபிக்குச் சொந்தமான மூன்று விமானங்கள், மூன்று திசைகளில் பறந்து சென்றன. அவற்றில் ஒன்று கிரிஸ் வான்வெளி வழியாக எகிப்துக்கும் மற்றொன்று, ஆஸ்திரியத் தலைநகர் வியன்னாவுக்கும், மூன்றாவது, கிரீஸ் தலைநகர் ஏதென்சுக்கும் சென்றன. அவற்றில் இருந்தவர்கள் யார் என்பது தெரியவில்லை.